ကရင်နီပြည်နယ် ဒီးမော့ဆို အနောက်ဘက်ခြမ်းတွင် ငလျင်လှုပ်ခတ်မှုဖြစ်ပွားပြီးနောက် ကျင်းနက်ကြီး တစ်ခုဖြစ်ပေါ်ခဲ့ကြောင်း သတင်းရရှိသည်။
မတ်လ ၂၈ ရက်နေ့ ငလျင်လှုပ်ခတ်မှုဖြစ်ပွားပြီး နောက်ရက်မတ်လ ၂၉ ရက်နေ့မှစတင်ကာ ဒီးမော့ဆို အနောက်ဖက်ခြမ်းတွင် မြေကျွံကျပြီး တဖြည်းဖြည်းနှင့် အနက်ပေ ၁၀၀ ခန့်ရှိ ကျင်းနက်ကြီးတစ်ခု ဖြစ်ပေါ်ခဲ့ကြောင်း သိရသည်။
ထိုကျင်းနက်ကြီးသည် အကျယ် ပေး ၁၀၀ ပတ်လည်နှင့် အနက်ပေ ၁၀၀ ကျော်ရှိသည်။
ယနေ့ ဧပြီလ ၁ ရက်နေ့ထိ အဆိုပါကျင်းနက်ကြီးသည် တဖြည်းဖြည်းနှင့် မြေကျွံကျလာနေပြီး တွင်းအနက်များလာသလို အကျယ်လည်း တိုးလာကြောင်း သိရသည်။
ထို့အပြင် ဒီးမော့ဆိုမြို့ အနောက််ဘက်ခြမ်းရှိ ပြည်သူများ အဓီကမှီခိုအားထားရသည့် နန်းစံဖူးချောင်း သည်လည်း ငလျင်လှုပ်ခတ်မှုကြောင့် ရုတ်တရက် ရေများခမ်းခြောက်သွားပြီး လက်ရှိအချိန်ထိ ရေများအသုံးပြု၍ မရကြောင်း သိရသည်။
မြန်မာနိုင်ငံအလယ်ပိုင်း စစ်ကိုင်းမြို့ နှင့် မန္တလေးမြို့ ကို ဗဟိုပြုပြီး ရစ်ချ်တာစကေး ၇ ဒသမ ၇ ရှိ အင်အားပြင်း ငလျင်နှင့် နောက်ဆက်တွဲငလျင်များကြောင့် နိုင်ငံတဝန်း သမိုင်းဝင်ဘာသာရေး အဆောက်အဦများ၊ လမ်းတံတားများအပါအဝင် တိုက်များ၊ အိုးအိမ်များ ပျက်စီးဆုံးရှုံးခဲ့ရပြီး လူသေဆုံးမှုနှင့် ထိခိုက်ဒဏ်ရာရမှုများ ဆက်လက်မြင့်တက်နေကြောင်း သိရသည်။
Leave a Comments