သျှမ်းပြည် မိုးမိတ်မြို့နယ်အတွင်း ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) မှ သေနတ်ပစ်ဖောက်ခဲ့သည့် ကိစ္စကို မဟာမိတ် ဂုဏ်သိက္ခာရှိစွာဖြင့် လာရောက်ဖြေရှင်းရန် TNLA က စာပေးပို့ အကြောင်းကြားခဲ့ကြောင်း စုံစမ်းသိရသည်။

ဖြစ်စဉ်မှာ မတ်လ (၂၃) ရက်တွင် မိုးမိတ်မြို့နယ် မန်ဖွယ်ကျေးရွာရှိ SSPP/SSA စခန်းချနေရာကို တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) က စစ်ရေးအရ ဖိအားပေးပြီး မောင်းထုတ်မှု ပြုလုပ်ရာ SSPP ဘက်မှ သေနတ်ပစ်ဖောက်ခဲ့ကြောင်း သိရသည်။

“ကျနော်တို့ (SSPP) ဘက်ကတော့ သတိပေးတဲ့အနေနဲ့ သေနတ်ဖောက်ခဲ့တာ။ အဲ့ကတည်းက သူတို့လည်း တပ်ပြန်ခေါက်သွားတယ်။ လက်ရှိတော့ ကျနော်တို့ တွေ့ဆုံဆွေးနွေးမှု ကိစ္စတော့ မရှိသေးဘူး။ သူတို့ တပ်ခေါက်သွားပေမယ့် သတိအနေအထားနဲ့ နေရာယူထားတယ်” ဟု ရှေ့တန်းရှိ SSPP မှ စစ်ရေး သတင်းရင်းမြစ် တစ်ဉီးက သျှမ်းသံတော်ဆင့်ကို ပြောသည်။

TNLA မှ ပေးပို့သည့် စာထဲတွင် SSPP/SSA ဘက်မှ မဟာမိတ် ဂုဏ်သိက္ခာနှင့် အဖွဲ့အစည်း၏ ဂုဏ်သိက္ခာကို တာဝန်ခံမှုရှိစွာဖြင့် TNLA တပ်သားကို သေနတ်ပစ်ဖောက်ခဲ့သည့် ကိစ္စရပ်ကို လာရောက် မဖြေရှင်းပါက နောက်ဖြစ်ပေါ်လာမည့် မည်သည့် ပြဿနာကိုမဆို SSPP/SSA မှ တာဝန်ယူရမည်ဟုလည်း ရေးသားထားသည်။

ထိုအကြောင်းကြားစာထဲတွင် TNLA သည် SSPP/SSA တပ်ဖွဲ့အနေဖြင့် မန်ဖွယ်ရွာဟောင်း စေတီကုန်းမှ အခြားနေရာသို့ နေရာရွှေ့ပေးရန် ဉီးတည်ချက်ဖြင့် သွားရောက်အကြောင်းကြားစဉ် တက်သွားသည့် အချိန်တွင် SSPP က လက်နက်ငယ်ဖြင့် ပစ်ခတ်ခဲ့ကြောင်း ဆိုသည်။

“လက်ရှိမှာတော့ ကျနော်တို့ တပ်စခန်းလည်း မဖယ်ပေးသေးဘူး။ သူတို့လည်း အနီးနားမှာ ရှိနေတယ်။ စစ်ရေးကတော့ တင်းမာနေတဲ့ အနေအထားပါ”ဟု ရှေ့တန်းရှိ ၎င်းစစ်ရေး သတင်းရင်းမြစ်က ဆိုသည်။

မိုးမိတ်မြို့နယ်အတွင်း ဖြစ်ပွားခဲ့သည့် SSPP နှင့် TNLA တို့ ထိတွေ့မှုကိစ္စနှင့် ပတ်သက်ပြီး TNLA သတင်းနှင့် ပြန်ကြားရေး တာဝန်ရှိသူထံ ဆက်သွယ်မေးမြန်းရန် ကြိုးစားခဲ့သော်လည်း အဆက်အသွယ် မရရှိခဲ့ပေ။

သျှမ်းပြည်မြောက်ပိုင်းတွင် TNLA နှင့် SSPP တို့အကြား နယ်မြေ အငြင်းပွားမှု မကြာခဏ ဖြစ်ပွားခဲ့ပြီး၊ ပြီးခဲ့သည် ၂၀၂၄ ခုနှစ် ဇူလိုင်လအတွင် SSPP နှင့် TNLA တို့ကြား ကျောက်မဲနှင့် သီပေါမြို့နယ်အတွင်း ဖြစ်ပွားသည့် အငြင်းပွားမှုကို ‘ဝ’တပ်ဖွဲ့ UWSA ဉီးဆောင်သည့် ပြည်ထောင်စု နိုင်ငံရေး ဆွေးနွေးမှု ညှိနှိုင်းရေး ကော်မတီ (FPNCC) က ပန်ဆန်းမြို့တွင် ညှိနှိုင်းပေးမှုကြောင့် ပြေလည်မှု ရရှိခဲ့သည်။

ပြည်ထောင်စု နိုင်ငံရေး ဆွေးနွေးမှု ညှိနှိုင်းရေး ကော်မတီ FPNCC အဖွဲ့ဝင်များမှာ ‘ဝ’တပ်ဖွဲ့ UWSA ၊ သျှမ်းတပ် SSPP/SSA ၊ ကချင်လွတ်လပ်ရေးတပ် KIA ၊ မိုင်းလားတပ်ဖွဲ့ NDAA ၊ တအာင်း(ပလောင်)တပ်ဖွဲ့ TNLA ၊ ကိုးကန့်တပ်ဖွဲ့ MNDAA နှင့် ရက္ခိုင်တပ်တော် AA တို့ ပါဝင်သည်။