သျှမ်းပြည် မူဆယ်မြို့နယ်တွင် ကိုယ်ပိုင်ယာဉ်များအတွက် စစ်ကောင်စီဘက်မှ စက်သုံးဆီ ဝယ်ယူခွင့် မှတ်တမ်းစာအုပ်များဖြင့် သတ်မှတ်လီတာအတိုင်း ရောင်းချနေခြင်းကြောင့် သုံးစွဲရန် လုံလောက်မှု မရှိကြောင်း စုံစမ်းသိရသည်။
ယမန်နေ့ (၂၀၂၅ မတ်လ ၂၄ ရက်)မှ စတင်ပြီး မူဆယ်မြို့တွင် လိုင်စင်ရှိ ကိုယ်ပိုင်ယာဉ်နှင့် မော်တော်ဆိုင်ကယ်များကို စစ်ကောင်စီ ထုတ်ပေးသည့် စက်သုံးဆီ ဝယ်ယူခွင့် မှတ်တမ်းစာအုပ်များဖြင့် သတ်မှတ်ထားသည့် ဆီဆိုင်များတွင် အကန့်အသတ်ဖြင့်သာ ဝယ်ယူရရှိခြင်းကြောင့် သုံးစွဲရန် လုံလောက်မှု မရှိကြောင်း ဒေသခံများက ပြောသည်။
“စာအုပ်ကတော့ ၂၀ ရက်နေ့က ထုတ်ပေးတာ၊ ဆီကတော့ မနေ့ကမှ စရောင်းတယ်။ ပြောတာတော့ သူတို့ရောင်းပေးမယ့် ဆီဈေးက အပြင်ဆီဆိုင်တွေထက် လျော့မယ်။ တစ်ပတ်ကို တစ်ဂါလံပဲ ရောင်းပေးတယ်၊ တစ်လကို ၄ ဂါလံပဲ ရတယ်။ ပုံမှန် ရောင်းဝယ် လုပ်တဲ့သူတောင် စက်သုံးဆီ တစ်ဂါလံက တစ်ရက်မောင်းတာနဲ့ ကုန်ပြီ ဘယ်လိုမှ မလောက်ဘူး”ဟု မူဆယ်မြို့မှ ကုန်သည်တစ်ဦးက သျှမ်းသံတော်ဆင့်ကိုပြောသည်။
စစ်ကောင်စီထံမှ ခွဲတမ်းရရှိပြီး အကန့်အသတ်ဖြင့် ရောင်းချရန် သတ်မှတ်ထားသည့် ရွှေရာဇာ၊ သံလွင်၊ စိုးသစ္စာ၊ ပန်းဆေး၊ Royal Muse ၊ မုံးပေါ်နှင့် နမ့်ခွန်ပြည့် ဆီဆိုင်များတွင် တစ်ပတ်လျှင် နှစ်ရက်သာ ရောင်းချခွင့်ရှိပြီး ဓာတ်ဆီ၊ ဒီဇယ်ဆီကို တစ်လီတာလျှင် သတ်မှတ်နှုန်းထား ၅၂၀၀ ကျပ်ဖြင့် ရောင်းချကြောင်း ဒေသခံများထံမှ သိရသည်။
အလားတူ ယာဉ်တစ်စီးကို တစ်ပတ်လျှင် ၄ လီတာခွဲသာ ဝယ်ယူခွင့်ပြုပြီး တစ်လလျှင် စုစုပေါင်း ၁၈ လီတာ သတ်မှတ်ထားသည်။
လက်ရှိတွင် ပြင်ပစက်သုံးဆီဆိုင်များမှာ စက်သုံးဆီ တစ်လီတာလျှင် ၆၅၀၀ မှ ၇၀၀၀ ကျော်အထိ ရောင်းချနေကြပြီး ၁၅၀၀ ခန့် ဈေးနှုန်းကွာခြားမှု ရှိနေသည်။
“ပန့်ဆိုင်မှာ ရောင်းနေတာ တရုတ်ကနေ ဝင်တာပဲ။ တချို့လည်း တရုတ်ပြည်မှာ ကုန်သွားတင်ရင်း ကိုယ့်ကား၊ ဆိုင်ကယ်ထဲ ထည့်လာတဲ့ဟာ ပိုက်နဲ့စုပ်ပြီး ဘူးနဲ့ ပြန်ရောင်းတာ ရှိတယ်။ မန္တလေးဘက်က တက်တဲ့ ဓာတ်ဆီကျတော့ နမ့်ခမ်းနဲ့ ၁၀၅ မိုင်အထိပဲ ရောက်တယ်၊ အဲ့ဘက်မှာ တစ်လီတာကို ၆၅၀၀ ကနေ ၈၀၀၀ ကျပ်အထိ ရှိတယ်”ဟု မူဆယ်မြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
ယမန်နှစ် ၂၀၂၄ ဒီဇင်ဘာလမှ စတင်ပြီး မူဆယ်မြို့ပေါ်ရှိ တရားဝင် လိုင်စင်ရယူထားသည့် ကိုယ်ပိုင်လုပ်ငန်းရှိ မီးစက်များတွင် အသုံးပြုရန်နှင့် ကညနတွင် မှတ်ပုံတင်ထားသည့် ကား၊ ဆိုင်ကယ်များကို သတ်မှတ်ဆီဂါလန်အတိုင်း ခွင့်ပြုရန် စက်သုံးဆီ ဝယ်ယူခွင့်မှတ်တမ်းစာအုပ်ကို လုပ်ငန်းလိုင်စင်၊ မှတ်ပုံတင်နှင့်တကွ စစ်ကောင်စီထံ လျှောက်ထားပြီးမှ ခွင့်ပြုသလောက်သာ ဝယ်ယူနေရကြောင်း ဒေသခံများက ပြောသည်။
ပုံစာ – မူဆယ် စစ်ကောင်စီမှ ထုတ်ပေးသည့် စက်သုံးဆီ ဝယ်ယူခွင့် မှတ်တမ်းစာအုပ်များ (ဓာတ်ပုံ – ဒေသခံ)
Leave a Comments