သျှမ်းပြည် မြောက်ပိုင်း မိုးမိတ်မြို့နယ်တွင် တအာင်း(ပလောင်)အမျိုးသားလွတ်မြောက်ရေးတပ်မတော် (TNLA ) မှ ရှမ်းပြည်တိုးတက်ရေးပါတီ၊ ရှမ်းပြည်တပ်မတော်( SSPP/SSA) ကို စစ်ရေးအရ ဖိအားပေး မောင်းထုတ်မှုကြောင့် နှစ်ဘက်ကြား စစ်ရေးတင်းမာမှုများဖြစ်ပွားခဲ့ကြောင်း စုံစမ်းသိရသည်။

ယမန်နေ့ (မတ်လ ၂၃) ရက် နေ့လယ် ၁၂ နာရီဝန်းကျင် နှင့် ည ၇ နာရီကျော်တွင် မိုးမိတ်မြို့နယ် မန်ဖွယ်ကျေးရွာရှိ SSPP/ SSA တပ်စခန်း ကို TNLAမှ စစ်ရေးအရဖိအားပေး မောင်းထုတ်မှုများ ပြုလုပ်ခဲ့ပြီး နှစ်ဘက်ကြား စစ်ရေးတင်းမာမှုရှိနေကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“ဟုတ်တယ် စစ်ရေးတင်းမှာမှု တကယ်ဖြစ်ခဲ့တာ အမှန်ပါ။ PDF နဲ့ကိစ္စ ငြိပြီးတော့ ကျနော်တို့ ဒီလယ်ကြီးရွာက အဖွဲ့ကို ဖယ်ဖို့လာပြောတယ်။ ကျနော်တို့ဘက်က သတိပေးမှုတွေ တော့ရှိတယ်” ဟု စစ်ရေးသတင်းရင်းမြစ်တစ်ဉီးက ပြောသည်။

ဆက်လက်ပြီး ယမန်နေ့တွင် လယ်ကြီးကျေးရွာရှိ SSPP တပ်စခန်းကို ထပ်မံ ဆုတ်ခွာရန် TNLA က နှစ်ကြိမ်တိုင်လာရောက်ပြောဆိုမှုကြောင်း နှစ်ဘက် စစ်ရေးတင်းမာနေကြောင်း သိရသည်။

“သူတို့ ဖယ်ပေးခိုင်းတဲ့နေရာကတော့ ကျနော်တို့ နေတဲ့ လယ်ကြီးရွာ(ဝၢၼ်ႈလွၵ်းလူင်)နဲ့ မန်ဖွယ်ရွာ (ဝၢၼ်ႈၽၢႆၵဝ်ႇ) ကို ဖယ်ပေးခိုင် တာပါ။ကျနော်တို့က တော့ အခုချိန်ထိဖယ်ပေးတာမျိုးမရှိပါဘူး။”ဟု ၎င်းကပြောသည်။

အဆိုပါကိစ္စနှင့်ပတ်သက်ပြီး TNLA ပြန်ကြားရေး လွေးယေဉီးကို ဆက်သွယ်မေးမြန်းခဲ့သော်လည်း မရရှိခဲ့ပေ။

သျှမ်းပြည်မြောက်ပိုင်းတွင် TNLA နှင့် SSPP တို့ကြား နယ်မြေ အငြင်းပွားမှု မကြာခဏဖြစ်ပွားခဲ့ပြီး၊ ပြီးခဲ့သည် ၂၀၂၄ခုနစ် ဇူလိုင် ၁၃ရက်တွင် SSPP နှင့် TNLA တို့ကြားဖြစ်ပွားသည့် အငြင်းပွားမှုကြောင့် “ဝ”တပ်ဖွဲ့ (UWSA) ဉီးဆောင်သည့် ပြည်ထောင်စု နိုင်ငံရေး ဆွေးနွေးမှု ညှိနှိုင်းရေး ကော်မတီ (FPNCC) က ညှိနှိုင်းပေးမှုကြောင့် ပြေလည်မှု ရရှိခဲ့သည်။

FPNCC အဖွဲ့များသည် UWSA၊ SSPP/SSA၊ TNLA နှင့် ကချင်လွတ်လပ်ရေးတပ်မတော် (KIA) မိုင်းလားတပ်မတော် (NDAA) ၊ ကိုးကန့်တပ်မတော် (MNDAA) နှင့် ရက္ခိုင်တပ်တော်(AA)တို့ ပါဝင်သည်။

မိုးမိတ်မြို့နယ်တွင် တိုင်းရင်းသားလက်နက်ကိုင်တပ်ဖွဲ့ အများအပြား အခြေစိုက်လှုပ်ရှားပြီး မန္တလေးတိုင်း သပိတ်ကျင်း၊ မိုးကုတ်မြို့နယ်တို့နှင့် နယ်နိမိတ်ချင်း ထိစပ်ပြီး စစ်ရေးအရလည်း အရေးပါသည်။