ကရင်နီပြည်နယ် လွိုင်ကော်မြို့အတွင်းရှိ အဝေးပြေးယာဉ် ရပ်နားစခန်းကို စစ်ကောင်စီမှ နေရာပြောင်းရွှေ့ ဖွင့်လှစ်ခဲ့ပြီး ဖွင့်ပွဲပြုလုပ်ခဲ့ကြောင်း သတင်းရရှိသည်။

ကရင်နီပြည်နယ် လွိုင်ကော်မြို့ရှိ အဝေးပြေးယာဉ်ရပ်နားစခန်းကို ယခင်က နောင်ယားရပ်ကွက်တွင် ဖွင့်လှစ်ထားသော်လည်း လက်ရှိတွင် ကယားဒေးကွင်း အနီးသို့ ပြောင်းရွှေ့ဖွင့်လှစ်ခဲ့ကြောင်း သိရသည်။

ယမန်နေ့ (မတ်လ ၁၉ ရက်) နံနက်ပိုင်းတွင် ပြုလုပ်ခဲ့သည့် ဖွင့်ပွဲအခမ်းအနားတွင် စစ်ကောင်စီ ခန့် အပ်ထားသည့် ဝန်ကြီးချုပ် ဦးဇော်မျိုးတင်နှင့် ဌာနဆိုင်ရာ ဝန်ထမ်း၊ ယာဉ်လိုင်းပြေးဆွဲသူနှင့် ဒေသခံများ တက်ရောက်ခဲ့ကြောင်း ယာဉ်လိုင်းဂိတ်မှူးတစ်ဦးက သျှမ်းသံတော်ဆင့်ကို ပြောသည်။

“လိုင်းကားတွေက ပြန်ပြေးဆွဲတာကတော့ လနဲ့ချီ ကြာပါပြီ။ သူတို့က နေရောပြောင်းပြီးတော့ ဂိတ်ပေါင်းစုံ ပြန်ပေါင်းပြီး ဖွင့်ပွဲလုပ်ပေးတာပါ။ လမ်းခရီး အခြေအနေက‌တော့ ကောင်းနေပါတယ်။ ဝန်ကြီးတွေ တက်ရောက်တာလား ဆိုတာကတော့ မပြောတတ်ဘူး”ဟု ၎င်းယာဉ်လိုင်း ဂိတ်မှူးတစ်ဦးက ပြောဆိုသည်။

လက်ရှိတွင် တိုက်ပွဲများ ငြိမ်သက်ပြီး ခရီးစဉ် ပြန်လည်ပြေးဆွဲနေသည့် ယာဉ်များသည် သျှမ်း – ကရင်နီပြည် တောင်ကြီးမြို့မှ လွိုင်ကော်မြို့ ကို ပုံမှန် သွားလာနေကြောင်း ဒေသခံများက ထပ်လောင်းပြောသည်။

“သူတို့ အရင်က လမ်းအတိုင်းပဲ ပြန်သွားနေတာ။ တောင်ကြီး – ဆီဆိုင် – လွိုင်လင်လေး – လွိုင်ကော် အဲ့လမ်းမကြီးအတိုင်းပဲ။ လိုင်းကားတွေကတော့ ဖွင့်တာကြာပါပြီ၊ သူတို့က နေရာပြောင်းပြီးတော့ ဖွင့်ပွဲလုပ်တာ။ မှန်လုံယာဉ် လိုင်းကားကြီးတွေကတော့ အရင်လို ပြန်မသွားသေးဘူး”ဟု လွိုင်ကော်မြို့ ဒေသခံ အမျိုးသားတစ်ဦးက ပြောသည်။

ယာဉ်ရပ်နားရန် ပြောင်းရွှေ့ဖွင့်လှစ်ထားသည့် နေရာအသစ်သည် မြို့တွင်းအနီးဖြစ်ပြီး စစ်ကောင်စီဘက်မှ ကင်းစောင့် တပ်စွဲထားသည့် နေရာနှင့် နီးကပ်နေကြောင်း သိရသည်။

သျှမ်း – ကရင်နီပြည် ပြေးဆွဲသည့် တောင်ကြီးမြို့ မှ လွိုင်ကော်မြို့ ခရီးစဉ်ကို ကားခ တစ်ဦးလျှင် ၃ ‌သောင်းကျပ် ပေးရကြောင်း ယာဉ်လိုင်းများထံမှ သိရသည်။