စစ်ကောင်စီတပ်အတွင်း အသက်မပြည့်သေးဘဲ စစ်သားစုဆောင်းခံထားရသည့် ကလေးစစ်သား ၉၃ ဦးကို ယမန်နေ့ (မတ်လ ၁၉) ရက်တွင် ကုလအဖွဲ့အစည်းများနှင့်မိဘများရှေ့၌ လွှဲပြောင်းပေးခဲ့ကြောင်း စစ်ကောင်စီက သတင်းထုတ်ပြန်သည်။
စစ်ကောင်စီ၏ တိုင်းဌာနချုပ်အသီးသီး၌ စိစစ်တွေ့ရှိရသည့် အသက် ၁၀ နှစ်မှ ၁၈ နှစ်ကြား ကလေးစစ်သား ၉၃ ဦးကို မိဘ၊ အုပ်ထိန်းသူများထံသို့ လွှဲပြောင်းပေးအပ်ခဲ့ကြောင်း ဆိုသည်။
ထို့ပြင် မိဘများနှင့် အဆက်အသွယ် မရရှိသေးသည့် ကလေးငယ်များအား ကြားကာလ ပြုစုစောင့်ရှောက်ရေး စခန်းသို့ ပို့ဆောင်ထားသည်ဟု စစ်ကောင်စီ၏ ထုတ်ပြန်ချက်၌ ဖော်ပြသည်။
မြန်မာနိုင်ငံ၌ အရွယ်မရောက်သေးသူ ကလေးသူငယ်များအား စစ်မှုထမ်းခြင်းမျ ကာကွယ်တားဆီးရန် ရည်ရွယ်ချက်ဖြင့် ၂၀၁၂ ခုနှစ် ဇွန်လ ၂၇ ရက်တကည်းက UNCTFMR နှင့် လက်မှတ် ရေးထိုးခဲ့ကြောင်း သိရသည်။
ထိုလုပ်ငန်းစီမံချက်အရ ၂၀၁၂ ခုနှစ်မှ ယနေ့အထိ စစ်ကောင်စီတပ်အတွင်း စစ်သားစုဆောင်းခံထားရသည့် ကလေးစစ်သား စုစုပေါင်း (၁,၁၅၀) ဦး လွှဲပြောင်းပေးနိုင်ခဲ့ကြောင်း ဆိုသည်။
သို့သော် စစ်ကောင်စီတပ်သည် အာဏသိမ်းပြီးနောက်ပိုင်း ၂၀၂၃ ခုနှစ် တစ်နှစ်အတွင်းမှာပင် အသက်မပြည်သေးသည့် (၁,၁၀၂) ဦးကို စစ်သားအဖြစ် စုဆောင်းခဲ့သည်ဟု ကုလသမဂ္ဂအတွင်းရေးမှူး၏ ၂၀၂၄ ခုနှစ် ဇွန်လ ၁၃ ရက်နေ့ထုတ် ကလေးသူငယ်များနှင့် လက်နက်ကိုင်ပဋိက္ခဆိုင်ရာ အစီရင်ခံစာတွင် ဖော်ပြထားသည်။
စစ်ကောင်စီအနေဖြင့် ၂၀၁၂ ခုနှစ်မှ ၂၀၂၀ ခုနှစ်အတွင်း ကလေးစစ်သား ၉၈၄ ဦး၊ ၂၀၂၁ ခုနှစ်မှ ၂၀၂၃ ခုနှစ်အတွင်း ၈၃ ဦး၊ ၂၀၂၅ ခုနှစ် မတ်လ ၁၉ ရက်တွင် ၉၃ ဦး စုစုပေါင်း ၁,၁၄၀ ဦးအထိ မိဘနှင့် အုပ်ထိန်းသူများထံသို့ လွှဲပြောင်းပေးအပ်ခဲ့သည်။
နိုင်ငံတဝှမ်း ဖြစ်ပွားနေသည့် တိုက်ပွဲများတွင် စစ်ရှုံးနေသည့် စစ်ကောင်စီတပ်အနေဖြင့် လက်ရှိကာလ၌လည်း စစ်မှုထမ်းဥပဒေဖြင့် အဓမ္မပေါ်တာဆွဲ ဖမ်းဆီးစုဆောင်းနေလျက်ရှိသည်။ ထို အဓမ္မဖမ်းဆီးမှုအတွင်း အသက် မပြည့်သေးသည့် ကလေးများ ပါဝင်ကြောင်း သိရသည်။
Leave a Comments