သျှမ်းပြည် ကျောက်မဲမြို့နယ်တွင် တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) မှ ကျွန်းပင်ခုတ်သည်ဟု ပြောဆိုပြီး တစ်လအကြာ ဖမ်းဆီးထားသည့် အရပ်သား ၁၇ ဦး ပြန်လည်လွတ်မြောက်လာကြောင်း စုံစမ်းသိရသည်။

ကျောက်မဲမြို့နယ်ရှိ သတ်မှတ်ကြိုးဝိုင်းအတွင်း ကျွန်းပင်ခုတ်သည်ဟု ဆိုကာ ဇန်နဝါရီ တတိယပတ်တွင် လိုက်လံဖမ်းဆီးပြီး ကျောက်မဲမြို့ပေါ်တွင် ထိန်းသိမ်းထားခဲ့သည့် အရပ်သားများကို TNLA က ပြီးခဲ့သည့် ဖေဖော်ဝါရီလ နောက်ဆုံးပတ်တွင် ပြန်လွှတ်ပေးခဲ့ကြောင်း ဒေသခံများက ပြောဆိုသည်။

ယင်းကဲ့သို့ TNLA မှ ဖမ်းဆီးထိန်းသိမ်းထားစဉ် ရိုက်နှက်စစ်ဆေးမှုကြောင့်လည်း လက်ရှိ အချိန်ထိ ဆေးကုသမှု ခံယူနေရသည့် ဒေသခံရှိနေကြောင်း ကျောက်မဲမြို့ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ဖမ်းခံထားရတဲ့လူတွေနဲ့ ထော်လာဂျီတွေကော အကုန်လုံးတော့ ပြန်လွတ်လာပြီ။ အဲ့ဒီ ဖမ်းသွားတဲ့ လူတွေကို ဉပ‌‌ဒေအရဆိုပြီး ထောင်ဒဏ်တစ်လ ပေးတာတဲ့။ ပြီးတော့ စစ်မေးတဲ့ အချိန် ရိုက်နှက်တာတွေလည်း လုပ်တယ်။ ရိုက်ခံရတဲ့လူဆို အခုချိန်ထိ ရွာထဲက ဆရာမကို ခေါ်ပြီး ဆေးကုနေရတုန်း။ ဖမ်းခံရတဲ့ လူတွေကို ရွာက လူကြီးတွေနဲ့ပဲ သွားပြီးတော့ အာမခံ ပြန်ခေါ်လာရတာ။ တစ်ယောက်ကို ၁၀ သိန်းလောက် ပေးရတယ်”ဟု ဖြစ်စဉ်သိရှိသူ ကျောက်မဲမြို့ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် ဇန်နဝါရီ တတိယပတ်တွင် TNLA တပ်သားများသည် ကျောက်မဲမြို့နယ် ပင်ပေါ၊ လုံကြိမ်၊ ကျောင်းကုန်း၊ မန်ကျောင်း၊ နောင်ပြစ် စသည့် ကျေးရွာများမှ အရပ်သားများကို သတ်မှတ်ကြိုးဝိုင်းအတွင်း ကျွန်းပင်ခုတ်သည်ဟု စွပ်စွဲကာ ဒေသခံများကို လိုက်လံဖမ်းဆီးခဲ့သည်။

“၁၀၂၇ စစ်ဆင်ရေး” ဒုတိယလှိုင်းအတွင်း TNLA မှ ကျောက်မဲမြို့ကို ယမန်နှစ် ၂၀၂၄ ဩဂုတ်လ (၆) ရက်တွင် ထိန်းချုပ်နိုင်ခဲ့ပြီး စစ်ရေးအခြေအနေကြောင့် စီးပွားရေးနှင့် အလုပ်အကိုင် ခက်ခဲနေသည့် အချိန်တွင် TNLA မှ ယခုကဲ့သို့ အာဏာရှင်ဆန်စွာ ပြုမူခြင်း မလုပ်ရန်နှင့် ပြည်သူများဒုက္ခ ပိုရောက်စေကြောင်း ဒေသခံများက ပြောသည်။

ကျောက်မဲမြို့နယ်တွင် တအာင်း(ပလောင်) အမျိုးသားလွှတ်မြောက်ရေးတပ်မတော် TNLA အပြင် ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA တို့လည်း သွားလာလှုပ်ရှားနေသည်။