သျှမ်းပြည် ‘ဝ’ဒေသ ပန်ဆန်းမြို့တွင် နေထိုင်သူ၏ အစီအမံဖြင့် မလေးရှားပင်လယ်ပြင်အထိ မူးယစ်ဆေးဝါးများ သယ်ဆောင်ရောင်းဝယ်သည့် မူးယစ်မှောင်ခိုဂိုဏ်းကို ရန်ကုန်တွင် ဖမ်းဆီးရမိကြောင်း စစ်ကောင်စီက သတင်းထုတ်ပြန်သည်။

၎င်းမူးယစ်မှောင်ခိုဂိုဏ်းအဖွဲ့ထံမှ ကျပ်ငွေ ၉၆ ဘီလီယံကျော် တန်ဖိုးရှိ အိုက်စ် (မက်သ်အဖတ်တမင်း) ၃ တန်ကျော်၊ ကတ်တမင်း ၂၀၀ ကီလိုဂရမ် တို့နှင့်အတူ ရန်ကုန်တိုင်းအတွင်း ဖမ်းဆီးရမိခဲ့ကြောင်း ယမန်နေ့ (မတ်လ ၁၈ ) ရက်စွဲဖြင့် စစ်ကောင်စီထုတ်ပြန်ချက်တွင် ဆိုထားသည်။

UWSA ထိန်းချုပ် ‘ဝ’ဒေသ ပန်ဆန်းမြို့တွင် နေထိုင်သည့် တင်မောင်ဝင်း ၏ အစီအမံဖြင့် ရန်ကုန်တိုင်းအတွင်း တောင်ဒဂုံ၊ မြောက်ဒဂုံ၊ သာကေတ၊ မြောက်ဥက္ကလာပနှင့် ဆိပ်ကြီးခနောင်တို မြို့နယ်တို့တွင် တဆင့်ပြန်လည် ရောင်းချသူများကို စိတ်ပြောင်းဆေးဝါးများ၊ စက်လှေနှင့် မော်တော်ယာဉ်များနှင့် အတူ ဖမ်းဆီးရမိကြောင်း ဓာတ်ပုံမှတ်တမ်းဖြင့် စစ်ကောင်စီက ထုတ်ပြန်သည်။

‘ဝ’ဒေသမှ သယ်ဆောင်လာသည့် စိတ်ပြောင်း မူးယစ်ဆေးဝါးများကို ရန်ကုန်တိုင်းအတွင်း ဖမ်းဆီးရမိကြောင်း စစ်ကောင်စီ ထုတ်ပြန်ချက်နှင့် ပတ်သက်၍ သျှမ်းသံတော်ဆင့်မှ ‘ဝ’ပြင်ပဆက်ဆံရေး တာဝန်ခံ ဦးညီရမ်းထံသို့ ဆက်သွယ်မေးမြန်းခဲ့ရာ တင်မောင်ဝင်း ဆိုသည့် နာမည်မရှိသလို မကြားဖူးကြောင်း ပြန်လည်ဖြေကြားခဲ့သည်။

“ကျနော်တို့ စုံစမ်းကြည့်သလောက် ကျနော်တို့ဆီမှာ တင်မောင်ဝင်း ဆိုတဲ့ နာမည် မရှိသလို ကြားလည်း မကြားဖူးကြပါ”ဟု ဦးညီရမ်းက ဆိုသည်။

ထို့အပြင် စိတ်ပြောင်းဆေးဝါးများကို မလေးရှားပင်လယ်ရေပြင်သို့ ချိတ်ဆက်ပို့ဆောင် ရောင်းချရန် စီမံခန့်ခွဲသူမှာ အာရက္ခတပ်တော် AA စီးပွားရေးတာဝန်ခံ ရဲဝင်း(ခ) ကျော်စိုးလင်းနှင့် ဇနီးဖြစ်သူတို့ ဖြစ်ကြောင်း စစ်ကောင်စီဘက်က စွပ်စွဲပြောဆိုထားပြီး ၎င်းတို့မှာ တန့်ယန်း၊ တောင်ကြီး၊ မန္တလေးနှင့် ရန်ကုန်မြို့တို့တွင် မော်တော်ယာဉ်ဂိတ်များ ဖွင့်လှစ်ထားကြောင်း ဆိုသည်။

အလားတူ ရန်ကုန်မြို့တွင် မူးယစ်ဆေးဝါးများ လက်ခံ၍ စက်လှေဖြင့် မလေးရှားပင်လယ်ပြင်သို့ တာဝန်ခံပို့ဆောင်သူအား လွိုင်လင်မြို့တွင် ဖမ်းဆီးရမိခဲ့ကြောင်း ထုတ်ပြန်ချက်တွင် ဖော်ပြထားသည်။

လက်ရှိတွင် ‘ဝ’ဒေသ ပန်ဆန်းမြို့တွင် နေထိုင်ပြီး မူးယစ်မှောင်ခိုဂိုဏ်းကို စီမံနေသည် ဆိုသည့် တင်မောင်ဝင်း၊ မလေးရှားပင်လယ်ရေပြင်သို့ ချိတ်ဆက်ပို့ဆောင် ရောင်းချရန် စီမံခန့်ခွဲပြီး AA စီးပွားရေးတာဝန်ခံ ဟု စစ်ကောင်စီ စွပ်စွဲထားသည့် ရဲဝင်း (ခ) ကျော်စိုးလင်းနှင့် ၎င်း၏ဇနီး မသီတာမြင့်တို့ကို ဖမ်းဆီးရမိခြင်း မရှိသေးပေ။

၎င်းတို့ကို မူးယစ်ဆေးဝါး ဥပဒေအရ အရေးယူပြီး မူးယစ်ဆေးဝါး သယ်ဆောင်ရောင်းဝယ်ရာမှ ရရှိသည့် ငွေကြေး အကျိုးအမြတ်များ၊ ပိုင်ဆိုင်မှုများကို သိမ်းဆည်းနိုင်ရန် ငွေကြေးခဝါချမှု တိုက်ဖျက်ရေးဥပဒေဖြင့် အရေးယူနိုင်ရန် စစ်ကောင်စီလက်အောက်ခံ မြန်မာနိုင်ငံရဲတပ်ဖွဲ့မှ ဆောင်ရွက်နေကြောင်း သိရသည်။