ထိုင်းနိုင်ငံ ချင်းမိုင်မြို့အခြေစိုက် စစ်ကောင်စီလက်အောက်ခံ အလည်ဗီဇာဖြင့် ထိုင်းနိုင်ငံသို့ လာရောက်သည့် မြန်မာနိုင်ငံသားများ ဗီဇာသက်တမ်းတိုးလိုလျှင် မြန်မာပြည် ရဲစခန်းထောက်ခံစာ ပါရမည်ဟု ကြေညာလိုက်သည်။

၁၄ ရက် ဗီဇာကင်းလွတ်ခွင့်နှင့် ခရီးသွားဗီဇာဖြင့် ထိုင်းနိုင်ငံ လာရောက်သူများ ဗီဇာသက်တမ်းတိုးရန် ထောက်ခံစာ ရယူလိုလျှင် မြန်မာနိုင်ငံတွင် နေထိုင်သော ရဲစခန်း/ ရပ်ကွက်မှ ထောက်ခံစာ (မိတ္တူ)နှင့် ထိုင်းနိုင်ငံတွင် လက်ရှိနေထိုင်လျက်ရှိသော လိပ်စာဖော်ပြထားသည့် TM 30 မူရင်းတို့ကို တင်ပြရမည်ဖြစ်ကြောင်း ချင်းမိုင်မြို့ မြန်မာကောင်စစ်ဝန်ချုပ်ရုံးမှ မတ်လ ၁၇ ရက်စွဲဖြင့် ထုတ်ပြန်ခဲ့သည်။

“စစ်ကောင်စီက တစ်နိုင်ငံလုံးကိုလည်း ထိန်းချုပ်နိုင်တော့တာ မဟုတ်ဘူး၊ တချို့ဒေသတွေဆိုရင် တိုင်းရင်းသားတပ်တွေက သိမ်းပိုက်သွားပြီ။ အဲ့ဒီက ထွက်လာတဲ့လူကျတော့ ဘယ်က ရဲစခန်း ထောက်ခံစာကို သွားယူရမှာလဲ။ CDM ဆိုရင်လည်း ကိုယ့်ရပ်ကွက်ထဲက ရဲစခန်းမှာ ထောက်ခံစာ သွားယူရဲမှာ မဟုတ်ဘူး၊ မဟုတ်ခါမှ Black list စာရင်းတွေ ထွက်လာရင် ပိုဒုက္ခရောက်တာမျိုးတွေ ဖြစ်လာမယ်”ဟု ထိုင်းရောက် မြန်မာရွှေ့ပြောင်းအလုပ်အမားအရေး ကူညီပေးနေသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ချင်းမိုင်မြို့တွင် ထောက်ခံစာနှင့် စာရွက်စာတမ်း မှန်ကန်ကြောင်း သက်သေခံလက်မှတ်ယူခြင်း (နိုတြီပြုလုပ်ခြင်း) ကို မတ်လ ၁၉ ရက်မှ စတင်၍ စိစစ်ဆောင်ရွက်သွားမည်ဖြစ်ကြောင်း ကြေညာခဲ့ရာ အလည်ဗီဇာဖြင့် ထိုင်းနိုင်ငံ လာရောက်သူများအား ဗီဇာသက်တမ်းတိုးရန် ထောက်ခံစာမှအပ ကျန်ထောက်ခံစာများကို ဆောင်ရွက်ပေးမည်မဟုတ်ကြောင်း ဆိုသည်။

ယင်းကဲ့သို့ သာမန်ထောက်ခံစာများ ထုတ်ပေးနိုင်ရန် အချိန် ၃ ရက်ခန့် ကြာမြင့်နိုင်ပြီး နိုတြီလက်မှတ် လာရောက်လျှောက်ထားမှုအား စိစစ်ရန် ၇ ရက်မှ ၁၄ ရက်အတွင်း ကြာမြင့်နိုင်သည်ဟု အသိပေးထားသည်။

“ထောက်ခံစာ မရခဲ့ရင် သူတို့ ဘယ်လိုနည်းနဲ့ လည်ပင်းညှစ်ဦးမလဲ ဆိုတာလည်း မပြောတတ်သေးဘူး။ ထောက်ခံစာ မရတဲ့လူဆိုရင် မြန်မာပြည်ပဲ ပြန်ခိုင်းမလားပေါ့၊ ထိုင်းဘက် ရောက်နေတဲ့လူလည်း စိုးရိမ်ရတယ်။ ဒီဟာက ကြီးမားတဲ့ အခက်အခဲ တစ်ခုဖြစ်လာမှာ”ဟု ၎င်းအမျိုးသမီးက ထပ်လောင်းပြောသည်။

စစ်ကောင်စီက အလည်ဗီဇာဖြင့် ထိုင်းရောက်လာသည့် မြန်မာနိုင်ငံသားများကို ဗီဇာသက်တမ်းတိုးချိန် ရဲစခန်းထောက်ခံစာ ထပ်မံတောင်းခံခြင်းသည် မြန်မာပြည်မှ ရဲတပ်ဖွဲ့ကို ဝင်ငွေရရန် နည်းလမ်းဖော်ဆောင်ပေးနေခြင်း ဖြစ်ကြောင်း ရွှေ့ပြောင်းအလုပ်သမားအရေး ကူညီနေသူများက ပြောဆိုသည်။

“အရင်ကတော့ ဒီလိုမျိုး မရှိဘူး၊ အခု သတင်းထွက်ထားတဲ့ အတိုင်းဆိုရင် မြန်မာပြည်က ရဲတွေကို ဝင်ငွေရဖို့ နည်းလမ်းပေးလိုက်တယ်လို့ မြင်တယ်။ အများစုက အလည်ဗီဇာနဲ့ ထိုင်းကို ဝင်လာပြီး ရေရှည်နေဖို့အတွက် ဝေါ့ခ်ပါမစ်လို ဘတ်ရိုက်တာမျိုး လုပ်တယ်၊ ပြီးမှ ပက်စ်ပို့စာအုပ်ထဲ ဗီဇာပြန်ထည့်တာပေါ့။ အခုမှ ကြေညာထားတာဆိုတော့ ဘယ်လိုလာဦးမလဲ စောင့်ကြည့်ရဦးမယ်”ဟု ရွှေ့ပြောင်းအလုပ်သမားများ အထောက်အထားရရှိရေး ကူညီဆောင်ရွက်နေသူတစ်ဦးက သျှမ်းသံတော်ဆင့်ကို ပြောသည်။

ယမန်နှစ် ၂၀၂၄ ဖေဖော်ဝါရီလတွင် စစ်ကောင်စီမှ နိုင်ငံသားတိုင်း စစ်မှုထမ်းရမည့် ပြည်သူ့စစ်မှုထမ်းဥပဒေကို ပြဋ္ဌာန်းလိုက်ပြီးနောက် အရွယ်ရောက်ပြီး လူငယ်အများစုမှာ အိမ်နီးချင်း ထိုင်းနိုင်ငံသို့ နည်းမျိုးစုံဖြင့် ဝင်ရောက်နိုင်ရန် ကြိုးပမ်းလာကြသည်။

၎င်းတို့အထဲမှ အလည်ဗီဇာဖြင့် ထိုင်းနိုင်ငံသို့ လာရောက်သူများသည် မြန်မာပြည်သို့ မပြန်တော့ဘဲ ထိုင်းအစိုးရမှ ပြုလုပ်ပေးသည့် အလုပ်လုပ်ကိုင်ခွင့်လက်မှတ် Work Permit မရခင်စပ်ကြား တရားဝင် နေထိုင်ခွင့် ဆက်လက်ထိန်းသိမ်းရန် ဗီဇာသက်တမ်းတိုး လုပ်ဆောင်စဉ် စစ်ကောင်စီလက်အောက်ခံ သံရုံး သို့မဟုတ် ကောင်စစ်ဝန်ချုပ်ရုံးမှ ထောက်ခံစာ တောင်းခံရခြင်း ဖြစ်ကြောင်း သိရသည်။

ပြီးခဲ့သည့် မတ်လဆန်းပိုင်းကလည်း အမျိုးသားညီညွတ်ရေးအစိုးရ (NUG) လက်အောက်ခံ ဆေးတက္ကသိုလ် (မန္တလေး)မှ ဘွဲ့လက်မှတ် နိုတြီ (Notary – စာရွက်စာတမ်း မှန်ကန်ကြောင်း သက်သေခံချက်) ပြုလုပ်ပေးသူများ ဖမ်းဆီးရမိကြောင်း စစ်ကောင်စီက သတင်းထုတ်ပြန်သည်။