သျှမ်းပြည်တောင်ပိုင်း တောင်ကြီးမြို့နယ်နှင့် နမ့်စန်မြို့နယ်တို့တွင် (၁၂) တန်း G-12 စာမေးပွဲဖြေဆိုချိန်အတွင်း လျှပ်စစ်မီးမပေးနိုင်သည့်အတွက် ကျောင်းသားကျောင်းသူများ အခက်ကြုံနေရကြောင်း စုံစမ်းသိရသည်။

နှစ်စဉ်နှစ်တိုင်း စာမေးပွဲဖြေဆိုသည့် အချိန်တွင် စစ်ကောင်စီက လျှပ်စစ်မီး ပုံမှန်ပေးခဲ့သော်လည်း ယခုနှစ်တွင် မြို့နယ်အများစုတွင် လျှပ်စစ်မီး ပုံမှန်မရရှိခြင်းကြောင့် ကျောင်းသား/သူများ အခက်အခဲဖြစ်နေကြောင်း နမ့်စန်ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

၂၀၂၄-၂၀၂၅ ပညာသင်နှစ် တက္ကသိုလ်ဝင်စာမေးပွဲကို တစ်နိုင်ငံလုံး အတိုင်းအတာဖြင့် မတ်လ ၁၇ ရက်နေ့မှ စ၍ ၂၂ ရက်နေ့အထိ ပိတ်ရက်မရှိဘဲ ဘာသာတွဲအလိုက် ဖြေဆိုသွားမည်ဟု စစ်ကောင်စီ ပညာရေးဝန်ကြီးဌာနမှ ထုတ်ပြန်ထားသည်။

စစ်ကောင်စီခန့် ပြည်ထောင်စုဝန်ကြီး ဦးတင်အောင်စန်းက တက္ကသိုလ်ဝင်တန်း စာမေးပွဲ ဖြေဆိုနေစဉ်နှင့် ပြင်ဆင်နေစဉ် ကာလအတွင်း လျှပ်စစ်ဓာတ်အားမပြတ်တောက်ရေး အလေးထားဆောင်ရွက်ကြရန် မတ်လ (၆) ရက်တွင် ကျင်းပသည့် လျှပ်စစ်နှင့်စွမ်းအင်ဖွံ့ဖြိုးရေး ကော်မရှင် အစည်းဝေးတွင် ပြောကြားခဲ့သည်။

သို့သော် မြေပြင်အခြေအနေတွင် တစ်ရက်လျှင် လျှပ်စစ်မီး လေးနာရီဝန်းကျင်ခန့်သာ ရရှိနေပြီး အချို့ရက်တို့တွင် လျှပ်စစ်မီး လုံးဝ ပြတ်တောက်သည့် အခြေအနေမျိုးတွင် ရှိနေကြောင်း နမ့်စန်ဒေသခံ တစ်ဦးက ဆက်ပြောသည်။

“G-12 စာမေးပွဲဖြေတဲ့အချိန်ဆို နှစ်တိုင်း မီးပုံမှန်ပေးတယ်၊ ဒီနှစ်က မပေးဘူး။ ဒီနေ့တောင် (၁၂)တန်းကလေးတွေ စဖြေနေပြီ မီးပုံမှန် မလာပေးဘူး။ တစ်ရက်ကို ၄ နာရီပဲလာတာ၊ အဲ့တာတောင် သူလာချင်တဲ့အချိန်မှ လာတာ ပုံမှန်မရှိဘူး။ ကလေးတွေ စာကြည့်ဖို့အတွက် မီးအခက်အခဲ ဖြစ်နေတယ်။ ရွာကနေ မြို့အထိ လာဖြေတဲ့သူဆို ပိုဆိုးစေတယ်”ဟု ၎င်းက ပြောသည်။

စာသင်နှစ်တလျှောက် လျှပ်စစ်မီးမရှိသော်လည်း စာမေးပွဲကာလအတွင်း လျှပ်စစ်မီး ဖြန့်ဖြူးပေးစေလိုသည့်အပြင် လက်ရှိတွင် စာကြည့် စားပွဲတင် မီးအိမ်အတွက် အားသွင်းချိန် လျော့နည်းနေသဖြင့် ဖယောင်းတိုင်မီးဖြင့်သာ စာကြည့်နေရကြောင်း တောင်ကြီးဒေသခံ အမျိုးသားတစ်ဦးက ပြောသည်။

“မီးလာတဲ့အချိန်မှ မီးအိမ်တွေ မီးလုံးတွေကို အားသွင်းရတာ၊ အဲ့မီးတွေက အကြာကြီးမခံတော့ ထပ်သွင်းဖို့ အခက်အခဲတွေ ကြုံရတယ်။ ဖယောင်းတိုင်မီးနဲ့ပဲ ကလေးတွေ စာကြည့်နေရတယ်။ အဲ့မီးနဲ့ဆို အရမ်းအာရုံစိုက်ရတယ်။ မတော်ရင် အန္တရာယ်လည်း ဖြစ်နေတတ်တော့ ဖယောင်းတိုင်ကို သိပ်မပေးသုံးချင်ကြဘူး။ ရွာက တက်လာတဲ့ ကလေးတွေဆို ပိုခက်ခဲနေတယ်”ဟု ၎င်းက ပြောသည်။

သျှမ်းပြည်တောင်ပိုင်းတွင် စစ်အာဏာမသိမ်းခင် တက္ကသိုလ်ဝင်တန်းစာမေးပွဲ ဖြေဆိုသူ အရေအတွက် (၃၀၀၀၀) ဝန်းကျင် ရှိခဲ့သော်လည်း စစ်အာဏာသိမ်းပြီးနောက်တွင် ယခုနှစ် စာမေးပွဲ ဖြေဆိုသူ (၁၁၅၃၈) ဦးသာရှိတော့ကြောင်း သိရသည်။

၂၀၂၅ ခုနှစ်၊ မတ်လတွင် ဖြေဆိုရမည့် တက္ကသိုလ်ဝင်တန်း စာမေးပွဲ တွင် ယခင်နှစ်ကထက် အောင်မြင်မှု ရာခိုင်နှုန်း ပိုမိုတိုးတက်စေရေးနှင့် ဂုဏ်ထူးရရှိသူများ ပိုမိုများပြားစွာ ပေါ်ထွက်လာစေရေးအတွက် ဆွေးနွေးပွဲတက်ရောက်လာကြသော ဘာသာရပ်အလိုက် ဆရာ/ဆရာမများက ဝိုင်းဝန်းကြိုးပမ်းဆောင်ရွက်ပေးကြရန်အတွက် နမ့်စန်အထက်တန်းကျောင်းတွင် ကျင်းပ ပြုလုပ်ခဲ့ကြောင်း သိရသည်။