သျှမ်းပြည်တောင်ပိုင်း၊ ညောင်ရွှေမြို့နယ် တောင်လေးလုံး ထောင်တွင် ရေလုံလောက်မှုမရှိသောကြောင့် ယားနာများ အဖြစ်များနေကြသည်ဟု သတင်းရင်းမြစ်များထံမှ သိရသည်။
နွေရာသီရောက်လာချိန်တွင် ထောင်တွင်း၌ ရေရှားပါးခြင်းကြောင့် အကျဉ်းသားများ ရေလုံလောက်စွာ သုံးစွဲခွင့်မရသဖြင့် ယားနာများ ဖြစ်ပွားနေကြောင်း၊ ရေလုံလောက်စွာ သုံးစွဲလိုလျှင် ကျပ်ငွေ တစ်သိန်းခွဲပေးရကြောင်း အကျဉ်းသားမိသားစုဝင်နှင့်နီးစပ်သူတစ်ဉီးက သျှမ်းသံတော်ဆင့်ကိုပြောသည်။
“ထောင်ထဲမှာက ယားနာတွေ ဖြစ်နေကြတယ်။ သူတို့က ရေကောင်းကောင်းမသုံးရလို့ပြောတယ်။ ရေကောင်းကောင်း သုံးချင်ရင်တော့ တစ်လကို ကျပ်(တစ်သိန်းခွဲ)တန် အဆောင်ငှားနေမှ ရတာ။ပိုက်ဆံ မတတ်နိုင်တဲ့ သူဆို ပိုဒုက္ခရောက်တာပေါ့။” ဟု ၎င်း ကဆိုသည်။
ထို့ပြင် ယားနာဖြစ်လျှင်လည်း ပြင်ပဆေးဝါးများ သုံးစွဲခွင့်ပိတ်ထားသကဲ့သို့ ယားနာဆေးကိုလည်း ထောင်တွင်း၌ ဝယ်ယူခွင့်မရကြောင်း သိရသည်။
“ ပြင်ပ ကပို့တဲ့ဆေးလည်း မသုံးရဘူး။ ကိုယ်လိုချင်တဲ့ဆေးလည်း ထောင်တွင်းမှာ ဝယ်မရဘူး။ သူတို့ဆီမှာ ရှိတဲ့ ဆေးဝါးတွေပဲ ပေးသုံးတာ။” ဟု ၎င်း နီးစပ်သူက ထပ်လောင်းပြောသည်။
လက်ရှိတွင် ထောင်ဝင်စာကို တစ်လလျှင် တစ်ကြိမ်သာ တွေ့ခွင့်ရသော်လည်း တစ်နေကုန်စောင့်ဆိုင်းပြီးမှ ဝင်တွေ့ခွင့်ရသည်။
ဆက်လက်ပြီး ယခင်တွင် ထောင်မှ တာဝန်ရှိသူများကို လဘက်ရည်ဖိုး ကျပ်ငွေ ၅ ထောင်လောက်ပေးပြီး တွေ့ခွင့်ရသော်လည်း လက်ရှိတွင် ကျပ်(တစ်သိန်း)လောက်အထိ ပေးမှ တွေ့ခွင့်ရသည်ဟု ၎င်းက ဆက်ပြောသည်။
ဆက်လက်ပြီး ကုန်စျေးနှုန်းမြင့်တက်မှု နိုင်ငံရေး မတည်ငြိမ်မှုများကြောင့် ထောင်ဝင်စားများကို ပုံမှန်မပို့နိုင်ကြောင်း အကျဉ်းသား မိသားစုဝင်အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“အခုနိုင်ငံရေးအခြေနေတွေ ယော ကုန်ဈေးနူန်းလဲတက်တော့ ဘာမှ လုပ်စားလို့မလွယ်ဘူး။ ကိုယ့်မိသားစုတောင် မငတ်ရုံလေးပဲရှိတယ်။ တောင်ဝင်စာ သွားတွေ့ရင်လည်း တော်တော်ကုန်တာ။ ကိုယ်စားဖို့ ထက် အထဲရောက်နေတဲ့ သားအဆင်ပြေဖို့ ပိုကြိုးစားရတာပေါ့လေ။” ဟု အဆိုပါ အမျိုးသမီးတစ်ဦးက ပြောသည်။
ထောင်ဝင်စာပို့လျှင် ဟင်းစားများကိုသာ ပို့ခွင့်ရပြီး မုန့်ပဲသရေစာ များကို ပို့ဆောင်ခွင့်မပေးဘဲ ထောင်တွင်း၌သာ ဝယ်ယူစားသုံးကြရကာ ထောင်ဝင်စာပို့သည့် ပစ္စည်းများက အကျဉ်းသားထံ အကုန်ရောက် သည်ဟု ၎င်းကဆက် ပြောသည်။
မြန်မာနိုင်ငံ၏ (၇၇)ကြိမ်မြောက် လွတ်လပ်ရေးနေ့ အထိမ်းအမှတ်အဖြစ် အကျဉ်းကျခံနေရသည့် အကျဉ်းသူ၊ အကျဉ်းသား စုစုပေါင်း( ၅၈၆၄) ဦးကို လွတ်ငြိမ်းခွင့် ပေးလိုက်ပြီး ထိုအထဲမှ နိုင်ငံရေးအကျဉ်းသား (၆၀၀) ပါဝင်သည်ဟု ပြီးခဲ့သည့် ဇန်နဝါရီလ (၄) ရက်နေ့တွင် စစ်ကောင်စီမှ ထုတ်ပြန်လာသည်။
စစ်ကောင်စီမှ အကျဉ်းသားများကို လွတ်ငြိမ်းချမ်းသာခွင့်ပေးသော်လည်း သျှမ်းပြည်နယ်ရှိ နိုင်ငံရေးအကျဉ်းသားများ မပါဝင်လာကြောင်းနှင့် မြေပြင်စာရင်းအရ နိုင်ငံရေး အကျဉ်းသား (၂၀၀)ဝန်းကျင်သာ ရှိပြီး (၄၀၀)နီးပါး စာရင်းပျောက်နေကြောင်း မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများကွန်ရက် (PPNM)က ပြီးခဲ့သည့် ဇန်နဝါရီလ (၆)ရက်နေ့တွင် ထုတ်ပြန်လာသည်။
Leave a Comments