သျှမ်းပြည် အရှေ့ပိုင်း တာချီလိတ်မြို့တွင် အမျိုးသမီးတစ်ဦးကို အမည်မသိလူတစ်စုမှ ပြန်ပေးဆွဲ သွားကြောင်း စုံစမ်းသိရသည်။
ယမန်နေ့ (မတ်လ ၁၀ ရက်) ည ၉ နာရီဝန်းကျင်တွင် တာချီလိတ်မြို့ မယ်ယန်းကျေးရွာတွင် နေထိုင်သည့် အမျိုးသမီးတစ်ဦးကို အမည်မသိလူတစ်စုက နေအိမ်အတွင်းအထိ ဝင်ရောက်ဆွဲခေါ်၍ ပြန်ပေးသွားခဲ့ကြောင်း တာချီလိတ်မြို့ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ပြန်ပေးဆွဲခံသွားရတဲ့ အဒေါ်ကြီးကိုသိတယ်။သူက စီးပွားရေးလုပ်တဲ့လူပါ။ မြေပွဲစားတွေလည်း လုပ်တယ်။ ဘယ်အဖွဲ့ ဘယ်သူက ဖမ်းသွားလဲဆိုတာ မပြောတက်ဘူး။ လူက ၂ ယောက် ကားသမားပါ ရင် ၃ ယောက်လောက်လာတာ။ မီးကလည်း ပျက်နေတော့ CCTV ကနေ ကြည့်လို့မရဘူး။ ဘာ အကြောင်းကြောင့် ဖမ်းခေါ်သွားတယ်ဆိုတာ သေချာမသိရသေးဘူး။သူက အိမ်မှာနေနေတာကို ဝင်ဖမ်းသွားတာ။”ဟု တာချီလိတ်မြို့ ဒေသခံအမျိုးသမီးတစ်ဦးက ပြောသည်။
ထိုပြန်ပေးဆွဲခံရသော အမျိုးသမီးသည် အသက် ၆၀ ကျော် နန်းစံရှဲန်းဆိုသူဖြစ်ကြောင်းသိရသည်။
စစ်တပ်မှ နိုင်ငံတော် အာဏာသိမ်းယူပြီး နောက်ပိုင်း တာချီလိတ်မြို့အတွင်း ပေါက်ကွဲမှုများ၊ ပစ်ခတ်မှုများ၊ ခိုးယူလုယက်မှုများအပြင် ပြန်ပေးဆွဲမှုများလည်း မကြာခဏဖြစ်ပွားလေ့ရှိကြောင်း သိရသည်။
ထို့ပြင် ထိုင်း-မြန်မာနယ်စပ်ဖြစ်သည့် တာချီလိတ်မြို့တွင် မူးယစ်ဆေးဝါးနှင့် ကျားဖြန့်လုပ်ငန်းလုပ် ပိုမိုလုပ်ကိုင်သည့် ဒေသတစ်ခုလည်းဖြစ်ပြီး လူမျိုးပေါင်းစုံမှ အလုပ်လာလုပ်နေကြရပြီး တရားမဝင်ပစ္စည်းများ အလွယ်တကူ ရရှိသည့် ဒေသတစ်ခုဖြစ်သည်။
Leave a Comments