သျှမ်း – ကရင်နီးနယ်စပ် ၊ မိုးဗြဲမြို့တွင် တိုက်ပွဲများပြင်းထန်နေပြီး စစ်ကောင်စီမှ အသေခံ ဒရုန်းများကို အသုံးပြုတိုက်ခိုက်နေကြောင်း စုံစမ်းသိရသည်။

သျှမ်း – ကရင်နီ နယ်စပ်ရှိ မိုးဗြဲမြို့ကို စစ်ကောင်စီမှ ပြန်လည်ထိန်းချုပ်နိုင်ရန်အတွက် ယခုနှစ်ဆန်းပိုင်း မှ စတင်၍ အင်အားအလုံးအရင်းဖြင့် အပြင်းအထန် ထိုးစစ်ဆင်တိုက်ခိုက်နေပြီး၊ တော်လှန်ရေးတပ် ပေါင်းစု နှင့် တိုက်ပွဲပြင်းထန်ကာ နှစ်ဘက် ကျဆုံးမှုများနေကြောင်း မိုးဗြဲပြည်သူ့ကာကွယ်ရေးတပ်ရဲ့ တပ်ရင်း တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

“စစ်ကောင်စီကတော့ အင်အားအလုံးအရင်းနဲ့ စစ်ကြောင်းထိုးနေတုန်းပဲ။တိုက်ပွဲက ခလရ ၄၂၂ တပ်နဲ့ မြို့အစပ်မှာ ဖြစ်နေတဲ့ အတွက် မြို့ရဲ့နေရာအများစုကိုတော့ ကျနော်တို့တော်လှန်ရေးတပ်တွေ ထိန်းချုပ်ထားဆဲပါ။ အဓိကကတော့ သူတို့က ဖယ်ခုံ၊မိုးဗြဲ၊လွိုင်ကော်လမ်းပိုင်းကို ပြန်ထိန်းချုပ်ချင် တာကြောင့် အစွမ်းကုန် ထိုးစစ်ဆင်နေတာပါ။ နေပြည်တော်နဲ့လည်း နီးပြီး အရေးပါတဲ့နေရာ ဖြစ်နေတာကို”ဟု မိုးဗြဲပြည်သူ့ ကာကွယ်ရေးတပ်ရဲ့ တပ်ရင်း တာဝန်ရှိသူတစ်ဦးက ပြောသည်။

ထို့ပြင် စစ်ကောင်စီမှ လက်နက်ကြီး၊ ဒရုန်း နှင့် လေကြောင်းဗုံးကြဲတိုက်ခိုက်မှုများ အပြင်းအထန် အသုံးပြု၍ တိုက်ခိုက်နေသည့်အပြင် ကာမီကာဇေ (အသေခံ) ဒရုန်းများကိုပါ အသုံးပြု၍ တိုက်ခိုက်နေ ကြောင်း မိုးဗြဲပြည်သူ့ကာကွယ်ရေးတပ်ရဲ့တပ်ရင်းတာဝန်ရှိသူတစ်ဦးကဆက်ဆိုသည်။

“ဒီရက်ပိုင်းမှာတော့ သူတို့က ဒရုန်း နဲ့ လက်နက်ကြီးကို ပိုသုံးတယ်။ စစ်ကောင်စီဘက် ကလည်း ထိခိုက်မှု ပိုများနေတာပေါ့။ တိုက်ပွဲကလည်း အစောပိုင်းထက်ပိုပြင်းထန်လာတော့ စစ်ကောင်စီ ကလည်း ဒီတစ်ရက် နှစ်ရက်မှာ အသေခံ ဒရုန်းတွေကိုပါ သုံးလာတာတွေ့ရပြီ။” မိုးဗြဲပြည်သူ့ ကာကွယ်ရေးတပ်ရဲ့ တပ်ရင်း တာဝန်ရှိသူတစ်ဦးက ပြောသည်။

ထိုပြင် မိုးဗြဲမြို့ကို ပြန်ရရန် စစ်ကောင်စီက ပြီးခဲ့သည့် ဖေဖော်ဝါရီလ တတိယပတ်ကစ၍ မီးလောင်ဗုံး နှင့် အဆိပ်ငွေ့လက်နက် များဖြင့်ပါ အသုံးပြုတိုက်ခိုက်နေကြောင်းသိရသည်။

လက်ရှိတွင် စစ်ကောင်စီမှ နှစ်လကျော်ကြာ ထိုးစစ်ဆင် တိုက်ခိုက်သည့်အတွက် တော်လှန်ရေး တပ်‌ပေါင်းစုနှင့် နေ့စဉ်အပြင်းအထန် တိုက်ပွဲများဖြစ်ပွားနေသည့် အတွက်ကြောင့် လိုအပ်ချက် အဖက်ဖက်များကို ထောက်ပံ့ကူညီပေးရင် မေတ္တာရပ်ခံကြောင်း ၎င်းက တိုက်တွန်းပြောဆိုသည်။

မိုးဗြဲမြို့သည် နေပြည်တော်နှင့် မိုင်း ၁၀၀ ဝန်းကျင်ခန့်သာ ဝေးကွာသည့်အပြင်၊ မိုးဗြဲမြို့၏ မြောက်ဘက်တွင် ပင်လောင်း၊ ညောင်ရွှေနှင့် ဆီဆိုင်၊ တောင်ဘက်တွင် ဖရူဆိုနှင့် သံတောင်၊ အရှေ့ဘက်တွင် လွိုင်ကော်နှင့် ဒီးမော့ဆို ၊ အနောက်ဘက်တွင် ပျဉ်းမနားမြို့နယ်တို့နှင့် နယ်နိမိတ်ချင်း ထိစပ်နေသည့်အတွက် နှစ်ဘက်တပ်တို့၏ စစ်ရေးအရ အရေးပါသည့် နေရာဖြစ်ကြောင်းသိရသည်။

ပြီးခဲ့တဲ့ ၂၀၂၃ ခုနှစ် နိုဝင်ဘာမှာ ၁၁၁၁ စစ်ဆင်ရေးတွင် သျှမ်း – ကရင်နီ နယ်စပ်ရှိ မိုးဗြဲမြို့ကို ကရင်နီတော်လှန်ရေးတပ်ပေါင်းစုတို့က တိုက်ခိုက်နိုင်ပိုင်ခဲ့သော်လည်း စစ်ကောင်စီ၏ မိုးဗြဲမြို့နယ် အခြေစိုက် ခြေမြန်တပ်ရင်း ၄၂၂ တပ်ရင်းကို မထိန်းချုပ်နိုင်ခဲ့ကြောင်း သိရသည်။