သျှမ်းပြည်တောင်ပိုင်း လွိုင်လင်မြို့အထွက် တိုးဂိတ်အနီးတွင် စစ်ကောင်စီလက်အောက်ခံ မူးယစ်ဆေးဝါးနှင့် လူကုန်ကူးမှု တားဆီးနှိမ်နှင်းရေး ပူးပေါင်းအဖွဲ့များမှ ကားသမားများကို အကြောင်းမဲ့ ဖမ်းဆီးစစ်ဆေးပြီး ခြိမ်းခြောက်ပြောဆိုခဲ့ကြောင်း စုံစမ်းသိရသည်။

မတ်လ (၈) ရက် ည ၈ နာရီကျော်အချိန်တွင် လွိုင်လင်မြို့အထွက် တိုးဂိတ်အနီးရှိ စစ်ကောင်စီလက်အောက်ခံ မူးယစ်ဆေးဝါးနှင့် လူကုန်ကူးမှု တားဆီးနှိမ်နှင်းရေး ပူးပေါင်းအဖွဲ့များမှ တောင်ကြီး-နမ့်စန် ခရီးသည်တင်ကား ပြေးဆွဲနေသည့် ကားသမားများကို အကြောင်းပြချက်မရှိဘဲ ဖမ်းဆီးစစ်ဆေးပြီး ခြိမ်းခြောက်ပြောဆိုခဲ့ကြောင်း ကိုယ်တိုင်ကြုံတွေ့ရသူများက ပြောသည်။

“မူးယစ်အဖွဲ့က မပြောမဆိုနဲ့ ကားပေါ်က ဆင်းခိုင်းပြီး မှတ်ပုံတင် သိမ်းလိုက်တယ်။ ပြီးတော့ တာဝန်ခံဆီ ခေါ်သွားတယ်။ ကားပေါ်မှာလည်း ဘာမှ မပါလာဘူး၊ ကားကလည်း လိုင်စင်ကားပဲ။ အဲ့တာကို ဘာမှ မမေးမပြောဘဲနဲ့ သေနတ်နဲ့ ချိန်တယ်။ မင်းတို့ဘာထင်နေတုန်း၊ ဘာအဖွဲ့အစည်းမဆို ဖြတ်သွားရင် ငါတို့စစ်ပြီးမှ သွားလို့ရမယ်၊ တိုင်းမှူးကနေ နှုတ်နဲ့ တာဝန်ပေးထားတာလို့ ပြောတာ”ဟု ကိုယ်တိုင်ကြုံတွေ့ခဲ့သည့် ကားသမားတစ်ဦးက သျှမ်းသံတော်ဆင့်ကို ပြောသည်။

လွိုင်လင်မြို့အထွက် တိုးဂိတ်အနီး စခန်းချဖွင့်လှစ်ထားသည့် စစ်ဆေးရေးဂိတ်တွင် မူးယစ်ဆေးဝါး တားဆီးနှိမ်နင်းရေးရဲတပ်ဖွဲ့ ရဲအုပ် တင်ထွန်းအောင်နှင့် အဖွဲ့၊ လူကုန်ကူးမှု တားဆီးနှိမ်နင်းရေးရဲတပ်ဖွဲ့မှ ဒုရဲမှူး တင်မောင်မြင့်တို့ ဦးဆောင်ပြီး ပြည်ထောင်စု လမ်းမကြီးတလျှောက် ဖြတ်သန်းသွားလာသည့် ခရီးသည်ယာဉ်များကို အမျိုးမျိုးအကြောင်းပြ စစ်ဆေးပြီး ခြိမ်းခြောက်ငွေတောင်းခံမှုများ ပြုလုပ်နေကြောင်း ဒေသခံများထံမှ သိရသည်။

“သူတို့ကျတော့ ဝစ်သောက်ကားစီးပြီး သူများကို စစ်နေတာ၊ အရက်လည်း မူးထားသေးတယ်။ လူနာမည်မေးလိုက်၊ ကားထဲစစ်လိုက်နဲ့ တခုပြီးတခု မေးပြီး ခြိမ်းခြောက်တယ်။ ၈ နာရီကျော်က စစစ်တာ ၁၁ နာရီကျော်မှ ပေးဖြတ်တယ်။ လူကိုလည်း တွန်းတွန်းထိုးထိုးလုပ်တယ်၊ ဘာမှ ပေးမပြောဘူး။ ဝတ္တရားနှောက်ယှက်မှုနဲ့ တရားစွဲမယ်တို့ အဲ့လို ခြိမ်းခြောက်တာ”ဟု တောင်ကြီး-နမ်စန် ခရီးသည်တင်ကား ပြေးဆွဲနေသည့် ၎င်းကားသမားက ဆက်ပြောသည်။

စစ်ကောင်စီလက်အောက်ခံ စစ်ဆေးရေးဂိတ်များတွင် ခရီးသည်တင်ကားများကို အမျိုးမျိုး အကြောင်းပြကာ စစ်ဆေးနေခြင်းကြောင့် အမျိုးသမီးများ ခရီးသွားလာပါက လုံခြုံရေး စိုးရိမ်ရပြီး သတိထားရန် လိုအပ်ကြောင်း ကားသမားများက ပြောဆိုသည်။

ယမန်နှစ် ၂၀၂၄ နိုဝင်ဘာလမှ စတင်ပြီး လွိုင်လင်မြို့ရှိ စစ်ကောင်စီမှ မူးယစ်ဆေးသုံးစွဲသူများကို ဖမ်းဆီးကာ မြို့အဝင်အထွက်ဂိတ်များတွင် ကင်းစောင့်ခိုင်းခဲ့ကြောင်း ဒေသခံများထံမှ သိရသည်။