သျှမ်းပြည် တောင်ကြီးမြို့တွင် ပြည်သူ့စစ်မှုထမ်းအကြောင်းပြကာ စစ်တပ်၊ ရဲ ၊ရပ်ကွက်အုပ်ချုပ်ရေးမှူးနှင့် စာရေးမများက ပြည်သူများကို ခြိမ်းခြောက်ငွေညှစ်တောင်းယူမှုများ လုပ်ဆောင်နေကြောင်း ဒေသခံများထံမှ သိရသည်။

ဇန်နဝါရီလ ၂၀ ရက်မှစတင်ကာ ပြည်သူ့စစ်မှုထမ်းသင်တန်း အမှတ်စဉ် (၉) ကို သက်ဆိုင်ရာ တိုင်းစစ်ဌာနချုပ်နယ်မြေများရှိ သင်တန်းကျောင်းအသီးသီး၌ ဖွင့်လှစ်ပြီးနောက် ယင်းကဲ့သို့ ငွေညှစ်တောင်းခံမှုများ လုပ်ဆောင်နေခြင်း ဖြစ်သည်။

“ရပ်ကွက်ထဲမှာ မဲပေါက်တယ်ဆိုပြီး ဗလီကရှေ့ဆောင်ဘုန်းကြီးကို ဝင်ဆွဲတယ်။ သာသနာဆို ကွင်းလွတ်ခွင့်ရတယ်ဆိုတာကို အထက်မရဘူးတဲ့။ သူက စေတနာနဲ့ညှိနှိုင်းပေမယ်ဆိုပြီး သိန်း ၁၀၀ ယူလိုက်တယ်။ ပြီးတော့ ကင်းလွတ်ခွင့်ရသွားတယ်” ဟု တောင်ကြီးမြို့ ဒေသခံတစ်ဦးက ပြောသည်။

ထိုကဲ့သို့ ငွေပေးဆောင်ရသည့်သတင်းများ ထွက်ပေါ်လာပါက စစ်မှုထမ်းထဲသို့လိုက်ရမည်ဟု ခြိမ်းခြောက်ခဲ့သေးကြောင်း ဆိုသည်။

“ဒီလကတော့ အရင်လအကြွေးနဲ့ဆိုပြီး နှစ်သိန်းတောင်းတယ်။ ပေးရတဲ့အကြောင်း သတင်းထွက်တာနဲ့ စစ်မှုထမ်းထဲ လိုက်ရမယ်ဆိုပြီး ခြိမ်းခြောက်သေးတယ်။ ဘာလို့ ပိုက်ဆံပေးရမှာလဲလို့ ပြန်မေးရင်လည်း ဝတ္တရား နှောင့်ယှက်မှုနဲ့ ထောင်ချမယ်ဆိုပြီး ပြောတယ်” ဟု အဆိုပါ ဒေသခံတစ်ဦးက ထပ်လောင်းပြောသည်။

စစ်မှုထမ်းအကြောင်းပြ ငွေတောင်းယူမှုပြဿနာများသည် ယခုမှဖြစ်ပွားနေခြင်းမဟုတ်ဘဲ စစ်မှုမထမ်းမနေ ဥပဒေကို စစ်ကောင်စီကပြဌာန်းလိုက်ပြီးသည့်နောက် ဆက်တိုက်ဆိုသကဲ့သို့ ဖြစ်ပွားနေကြောင်း ဒေသခံများကပြောသည်။

အဆိုပါစစ်မှုထမ်းဆင့်ခေါ်ရေးနှင့် ပတ်သက်၍ ခရိုင်၊ မြို့နယ်နှင့် ရပ်ကျေးအဆင့်များတွင် ငွေတောင်ခံခြင်း အပါအဝင် အားနည်းချက်များရှိနေကြောင်း စစ်ကောင်စီဘက်က ဝန်ခံထားပြီး မမှန်မကန် ဆောက်ရွက်မှုများ၊ မတရား ဆောင်ရွက်မှုများကို ထိရောက်စွာ အရေးယူမည်ဟု ပြည်သူ့စစ်မှုထမ်းဆင့်ခေါ်ရေး ဗဟိုအဖွဲ့ဥက္ကဋ္ဌ ဗိုလ်ချုပ်ကြီး မောင်မောင်အေးက ဇန်နဝါရီလ ၂၈ ရက်နေ့မှာ ပြောကြားခဲ့သည်။

သို့သော် လက်ရှိအချိန်ထိ မမှန်မကန် ဆောင်ရွက်သူများ၊ မတရား ဆောင်ရွက်သူများအား ထိရောက်စွာ အရေးယူနိုင်ခြင်းမရှိသေးကြောင်း ဒေသခံများကပြောသည်။