အာရှနိုင်ငံ ၁၀ ခုစာရင်းတွင် မြန်မာနိုင်ငံသည် ဒုတိယနေရာမှ အဆင်းရဲဆုံးနိုင်ငံအဖြစ် ရောက်ရှိနေချိန် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က မြန်မာနိုင်ငံသို့ ရှရုားနိုင်ငံ၏ရင်းနှီးမြှုပ်နှံမှုများ လာရောက်ရင်းနှီးမြှုပ်နှံရန် ဖိတ်ခေါ်ခဲ့သည်။

ယမန့်နေ့ (မတ်လ ၄ ရက်) မွန်းလွဲပိုင်းတွင် ရှရုားနိုင်ငံအစိုးရအဖွဲ့ဝန်ကြီးချုပ် H.E. Mikhail Vladimirovich Mishustim နှင့်အဖွဲ့ကို အိမ်တော်အစည်းအဝေး၌ တွေ့ဆုံဆွေးနွေးနေစဉ် ဗိုလ်ချုပ်မှူးကြီး မင်းအောင်လှိုင်က ထိုကဲ့သို့ ပြောကြားခဲ့ခြင်း ဖြစ်သည်။

အဆိုပါ တွေ့ဆုံပွဲတွင် စစ်ကောင်စီ ခေါင်းဆောင်နှင့်အတူ ကောင်စီတွဲဖက်အတွင်းရေးမှူး ဗိုလ်ချုပ်ကြီး ရဲဝင်ဦး၊ ဗိုလ်ချုပ်ကြီး ညိုစော၊ ပြည်ထောင်စုဝန်ကြီးများ၊ ပဲခူးတိုင်းဒေသကြီး ဝန်ကြီးချုပ်၊ ရုရှားနိုင်ငံဆိုင်ရာ မြန်မာနိုင်ငံ သံအမတ်ကြီး ဦးသစ်လင်းအုန်း စသည့်ဖြင့် တက်ရောက်ခဲ့ကြောင်း ဆိုသည်။

ထိုသို့ တွေ့ဆုံရာတွင် နှစ်နိုင်ငံအကြား ချစ်ကြည်ရင်းနှီမှုနှင့် ပူးပေါင်းဆောင်ရွက်မှုများ၊ စိုက်ပျိုးရေး ကဏ္ဍနှင့် ရင်းနှီးမြှုပ်နှံမှု ကဏ္ဍများတွင် ပူးပေါင်းဆောင်ရွက်များ တိုးမြှင့်ဆောင်ရွက်ရေးဆိုင်ရာ ကိစ္စရပ်များ အာကာသနှင့် ဂြိုလ်တုနည်းပညာဆိုင်ရာ ပူးပေါင်းဆောင်ရွက်ရေးနှင့် မြန်မာနိုင်ငံသို့ ရှရုားနိုင်ငံမှ ရင်းနှီးမြှုပ်နှံများ လာရောက်ရင်းနှီးမြှုပ်နှံစေရေး ဖိတ်ခေါ်မှုများ စသည့်ဖြင့် ဆွေးနွေခဲ့ကြောင်း ဆိုသည်။

ထို့ပြင် ယမန်နေ့ ညနေပိုင်းက ရုရှားနိုင်ငံသမ္မတ ပူတင်နှင့်တွေ့ဆုံပြီးချိန်တွင် နျူကလီးယား ဓာတ်အားပေးစက်ရုံ တည်ဆောက်ရေးအပါအဝင် သဘောတူညီချက် (၁၀) ခုကို လက်မှတ်ရေးထိုးနိုင်ခဲ့ကြောင်း စစ်ကောင်စီက သတင်းထုတ်ပြန်သည်။

ဒီပလိုမာများနှင့် ပညာရပ်ဆိုင်ရာဘွဲ့များ အသိအမှတ်ပြုရေးဆိုင်ရာ အစိုးရကြား သဘောတူညီချက်၊ မြန်မာနိုင်ငံတွင် စွမ်းအင်အနည်းငယ်ဖြင့် လည်ပတ်နိုင်သော အသေးစားနျူကလီးယား ဓာတ်အားပေး စက်ရုံများ တည်ဆောက်ရေးနှင့် ပတ်သက်သည့် အခြေခံမှုများ ဆိုင်ရာသဘောတူညီချက်၊ အဏုမြူနှင့် ဓာရောင်ခြည် ဘေးအန္တရာယ်ကင်းရှင်းရေးနယ်ပင်တွင် ပူးပေါင်းဆောင်ရွက်ရေး သဘောတူညီချက်တို့ အပါအဝင် သဘောတူညီချက် (၁၀) ခုကို လက်မှတ်ရေးထိုင်းနိုင်ခဲ့ကြောင်း ဆိုသည်။