ရုရှားနိုင်ငံသမ္မတ ဗလာဒီမီယာပူတင်၏ ဖိတ်ကြားချက်အရ တရားဝင်ချစ်ကြည်ရေး ခရီးစဉ်အဖြစ် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်သည် ယနေ့ နံနက်ပိုင်းတွင် အထူးလေယာဉ်ဖြင့် နေပြည်တော် လေဆိပ်မှ ထွက်ခွာသွားကြောင်း စစ်ကောင်စီက သတင်းထုတ်ပြန်သည်။

ခရီးစဉ်သည် မတ်လ ၃ ရက်မှ ၁၀ ရက်အထိ တစ်ပတ်ကြာခရီးဖြစ်ကြောင်း ရုရှားသမ္မတရုံးက ထုတ်ပြန်သည်။

အဆိုပါ ခရီးစဉ်အတွင်း ရုရှားနိုင်ငံသမ္မတ ပူတင်အပါအဝင် ရုရှားနိုင်ငံ ဝန်ကြီးချုပ်၊ လွှတ်တော် ဥက္ကဋ္ဌများ၊ ရုရှားအစိုးရအဖွဲ့မှ တာဝန်ရှိသူများနှင့် တွေ့ဆုံဆွေးနွေးသွားမည်ဖြစ်ကြောင်း စစ်ကောင်စီ၏ သတင်းထုတ်ပြန်ချက်တွင် ဖော်ပြထားသည်။

ထို့ပြင် နှစ်နိုင်ငံအစိုးရနှင့် ပြည်သူများအကြား ချစ်ကြည်ရေး၊ စီးပွားရေး၊ လုံခြုံရေးဆိုင်ရာများနှင့် ကဏ္ဍပေါင်းစုံတွင် မဟာဗျူဟာမြောက် ပူးပေါင်းဆောင်ရွက်မှုဆိုင်ရာ ကိစ္စရပ်များ ဆွေးနွေးဆောင်ရွက်သွားမည်ဟု ဆိုသည်။

ရိုဟင်ဂျာများအပေါ် လူမျိုးတုံးသတ်ဖြတ်မှုစွဲချက်ဖြင့် ပြီးခဲ့သည့် ဖေဖော်ဝါရီလ ၁၃ ရက်၌ အာဂျင်တီးနားတရားရုံးက ဗိုလ်ချုပ်မှူးကြီး မင်းအောင်လှိုင်ကို ဖမ်းဝရမ်းထုတ်ပြီးနောက် ပထမဆုံး ပြည်ပခရီးစဉ်အဖြစ် ရုရှားသို့သွားရောက်ခြင်း ဖြစ်သည်။

အာဏာသိမ်းပြီးနောက်ပိုင်း စစ်ကောင်စီ၏ ရုရှားခရီးစဉ်သည် ယခုတစ်ကြိမ်အပါအဝင် ၄ ကြိမ်မြောက်ရှိပြီ ဖြစ်သည်။