သျှမ်းပြည်  တောင်ပိုင်း ဟိုပုံး – ကျောက်တန်း – ပင်လုံလမ်း တွင် တောင်အတက်အဆင်းလမ်း ကြမ်းတမ်း မှုကြောင့် ယာဉ်တိမ်းမှောက်မှု မီးလောင်မှုများ မကြာခဏဖြစ်ပွားကြောင်း သတင်းရရှိသည်။

ယမန်နေ့ ( ဖေဖော်ဝါရီလ ၂၆) ရက်တွင် ဟိုပုံး – ကျောက်တန်း – ပင်လုံလမ်း ပေါ်တွင် လားရှိုးမြို့သို့ ပြန်သည့် စစ်ဘေးရှောင် ကားတစ်စီးမီးလောင်းမှုဖြစ်ပွားခဲ့ကြောင်း တောင်ကြီးကားသမားတစ်ဦးက သျှမ်းသံတော်ဆင့်ကို ပြောသည်။ 

“ကျောက်တန်းလမ်းမှာ ကားမီးလောင်သွားတာ မနေ့က လားရှိုးပြန်တဲ့ကား‌ပေါ့။ တော်သေးတယ် လူက ဘာမှတော့မဖြစ်ဘူး။ ကားကတော့ တစ်စီးလုံးပြာကျသွားတယ်။ ဒီနောက်ပိုင်း ကားတွေက အဲ့ကျောက်တန်း လမ်းဘက်သွား တာများတယ်။အင်ဂျင်ကြောင့်ပေါ့ အတက်အရမ်းဆိုးတာတော့ မီးလောင်တာ။အဲ့လမ်းမှာ ကားမှောက်တာကလည်း မကြာခဏ ဖြစ်နေတာ။”ဟု‌ တောင်ကြီးကားသမားတစ်ဦးက ပြောသည်။ 

အဆိုပါ ကျောက်တန်းလမ်းမပေါ်တွင် လတိုင်းနီးပါး ကားကြီး၊ကားငယ် တိမ်းမှောက်မှုများဖြစ်ပွားနေသည့် အတွက်ကြောင့် ၎င်းလမ်းကို သုံးပြုမည့် ကားသမားအနေဖြင့် ကားသေချာစစ်ဆေးရန် နှင့် သတိထားသွားလာရန် တောင်ကြီးကားသမားတစ်ဦးက ဆက်ဆိုသည်။ 

“အဲ့လမ်းကိုသွားမယ်ဆိုရင်တော့ ကားက ကြံခိုင်မှုမရှိရင် မသွားလာဖို့၊ ကားကိုကုန်ပစ္စည်းတွေအရမ်းကြီး တင်ပြီးတော့လည်း မသွားကြစေချင်ဘူး။ အတက်အဆင်းအရမ်းကြီးတယ် ရွာတစ်ရွာနဲ့ တစ်ရွာက အရမ်းဝေး တော့ တခုခုဖြစ်ရင်အကူညီရဖို့မလွယ်ဘူး။ဘရိတ်တွေလည်း သေချာစစ်ဆေးဖို့လိုတယ်။ ရေလောင်းဖို့လည်း လိုတယ်။ဒီလမ်းက ကားမောင်ကျွမ်းတာမကျွမ်းတာနဲ့မဆိုင်ပါဘူး။”ဟု ၎င်းကပြောသည်။ 

မိုင်းပွန် – လွိုင်လင် လမ်းပိုင်းတွင် ပြည်ထောင်စုလမ်းမကြီပေါ်တွင် လမ်းပြုပြင်မှုများ ပြုလုပ်နေ သဖြင့် တွဲကားကြီးများ၊ကားငယ်များ ပိတ်ဆို့မှုဖြစ်ပွားလေ့ရှိသည့်အတွက် ယခုနောက်ပိုင်းတွင် ခရီးသယ်တင်ယာဉ်များသည် ကျောက်တန်းလမ်း ပို၍ အသုံးပြုသွားလာကြကြောင်း သိရသည်။ 

ယခုနှစ် ၂၀၂၅ ဇန်နဝါရီလမှစ၍ တောင်ကြီး – မိုင်းရှူး သွားသည့် လမ်းပိုင်းရှိ စစ်ကောင်စီ စစ်ဆေးရေးဂိတ်များသည် ပုံမှန်ထပ်ပို၍ စစ်ဆေးမှုများတင်းကြပ်နေကြောင်း သိရသည်။