သျှမ်းပြည်တောင်ပိုင်း ရွာငံမြို့နယ် ရွာငံ – ဟံမြင့်မိုရ်လမ်းပိုင်း၌ ဘုရားဖူးယာဉ်တစ်စီး ချောက်အတွင်းသို့ တိမ်းမှောက်ကျသွား၍ (၇) ဦးသေဆုံးပြီး အများအပြား ထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။
ယမန်နေ့ (အောက်တိုဘာလ ၂၈ ရက်) နေ့လယ် ၂ နာရီဝန်းကျင် ရွာငံမြို့နယ် ရွာငံ-ဟံမြင့်မိုရ် လမ်းပိုင်း၌ ဘုရားဖူးယာဉ်တစ်စီးသည် ပေ (၃၅၀) အနက်ရှိသော ချောက်အတွင်းသို့ တိမ်းမှောက်ကျသွားပြီး အမျိုးသမီး (၅) ဦး အပါအဝင် ခရီးသည်စုစုပေါင်း (၇) ဦး သေဆုံးခဲ့သည့်အပြင် (၁၇) ဦး ဒဏ်ရာပြင်းထန်စွာ ရရှိခဲ့ကြောင်း မြန်မာနိုင်ငံ လူမှုကယ်ဆယ်ရေးအဖွဲ့ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
“ရွာငံအကျော်ပေါ့၊ ချောက်ကလည်း တော်တော်ကို နက်တယ်။ တောင်ကလည်း မတ်တယ်။ ကားက အဆင်းမှာ သူတို့က အရှိန်မထိန်းနိုင်ဘဲ ချောက်ထဲကို ကျသွားတာ။ သွားလာနေကြ မဟုတ်ရင် ဒီဘက်တောင်တွေကတော့ စိုးရိမ်စရာတော့ ရှိတယ်။ ရန်ကုန်ကလာတဲ့ သူတွေလို့ သိရတယ်”ဟု မြန်မာနိုင်ငံ လူမှုကယ်ဆယ်ရေးအဖွဲ့ တာဝန်ရှိသူတစ်ဦးက ပြောသည်။
ချောက်ထဲကျသွားသည့် ယာဉ်ပေါ်ပါလာသူ ခရီးသည် (၂၈) ဦးရှိပြီး၊ ဒဏ်ရာရရှိသူ (၁၇) ဦးရှိကာ ထိုထဲတွင် စိုးရိမ်လူနာ (၇) ဦးနှင့် သေဆုံးသူ (၇) ဦးကို ကူညီကယ်ဆယ်ပြီးနောက် ရွာငံမြို့ ပြည်သူ့ ဆေးရုံနှင့် မန္တလေးမြို့ ပြည်သူ့ဆေးရုံသို့ ပို့ဆောင်ခဲ့ကြောင်း သိရသည်။
Leave a Comments