ရွာငံမြို့နယ် ဘုရားဖူး လိုက်ထရပ် ကားချောက်ထဲကျ ၁၆ဦး သေဆုံး၊ ၁၀ဦး ဒဏ်ရာရ

0

သျှမ်းပြည် တောင်ပိုင်း ရွာငံမြို့နယ် အတွင်း ယမန် ည ၈နာရီ ဝန်းကျင်တွင် ဘုရားဖူး လိုက်ထရပ် ကားတစီး တိမ်းမှောက်ကာ ခရီးသည် ၁၆ဦး သေဆုံးခဲ့ကြောင်း စုံစမ်းသိရသည်။

 

Photo by Ma Su/ ယမန်နေ့ည ဘုရားဖူးကားတိမ်မှောက်မှုကြောင့် ထိခိုက်ဒဏ်ရာရသူကယ်ထုတ်နေစဉ်

ဖြစ်စဉ်မှာ အောက်တိုဘာ ၂၈ ရက် ည ၈နာရီဝန်းကျင်တွင် ရွာငံမြို့နယ် ယုန်တောင်ကျေးရွာ နှင့် စခန်းကြီး ကျေးရွာ ကြား ပေ ၂၀၀၀ အနက်ခန့် ရှိ ချောက်ထဲသို့ ဘုရားဖူး လိုက်ထရပ် ကားတစီး ကျသွားပြီး ခရီးသည် ၁၆ဦး သေဆုံးကာ၊ ၁၀ဦး ဒဏ်ရာရရှိကြောင်း တောင်ကြီးမြို့ အမျိုးသားလွှတ်တော် ကိုယ်စားလှယ် ဦးဇော်မင်းလတ် က သျှမ်းသံတော်ဆင့် သို့ ပြောသည်။

“ မနက် က ၈နာရီ ဝန်းကျင်လောက်ဖြစ်တယ်။ သေဆုံးသူ ၁၆ဦး၊ သေဆုံးတဲ့ထဲ ရဟန်း ၁ပါးပါတယ်။ ဒဏ်ရာရသူက ၁၀ဦးပါ။ ဒဏ်ရာပြင်းထန်တဲ့သူ ၂ဦးကိုတော့ မန္တလေးဆေးရုံပို့လိုက်တယ်။ ၈ဦးကတော့ ရွာငံပြည်သူ့ဆေးရုံမှာပါ” ဟု ဦးဇော်မင်းလတ် က ဆိုသည်။

Photo by Ma Su/ ယမန်နေ့ည ဘုရားဖူးကားတိမ်မှောက်မှုကြောင့် ထိခိုက်ဒဏ်ရာရသူ

သျှမ်းပြည်တောင်ပိုင်း ကို လိုက်ထရပ် ကားဖြင့် ဘုရားဖူးလိုက်ပါလာကြပြီး ချောက်ထဲကျကာ သေဆုံးသွားသူတို့ ၏ ရုပ်အလောင်း ၁၆ လောင်း ကို ရွာငံပြည်သူ့ဆေးရုံတွင် ထားရှိထားကြောင်း၊ ချောက်ထဲကျသည့် ဘုရားဖူးကားသည် ရွှေဘိုမြို့ဘက် မှ လာသည့် ကားဖြစ်ကြောင်း ဦးဇော်မင်းလတ်က ပြောသည်။

“ အဲ့လမ်းက လက်ရှိမှာ ချဲ့ထားပါတယ်။ လိုက်ထရပ် ကား က ကုန်တင်ဖို့ ထုတ်ထားတာ။ ခရီးသည် ကားမဟုတ်ဘူး။ လိုက်ထရပ်ကားကို ခရီးသည် တင်ကားမသုံးတာ ကောင်းပါတယ်” ဟုလည်း ဦးဇော်မင်းလတ် က ဖြည့်စွတ်ပြောသည်။

ထို သေဆုံးသူ ၁၆ဦးနှင့် ထိခိုက်ဒဏ်ရာရသည့် ၁၀ဦး ၏ ဆွေမျိုးများကို ဆက်သွယ်စုံစမ်း ရရှိပြီး ဖြစ်ကြောင်း လည်း သိရသည်။

Leave a Comments

SHARE