ကချင်ပြည်နယ် မံစီမြို့နယ် မန့်ဝိန်းကြီးဒေသ အတွင်းရှိ ကျေးရွာကို စစ်ကောင်စီက ယမန်နေ့ (ဖေဖော်ဝါရီ ၂၃ ရက်) ညသန်းခေါင်ယံ ၁၁ နာရီခွဲခန့်တွင် လေကြောင်းဖြင့် ဗုံးကြဲ တိုက်ခိုက်ခဲ့ကြောင်း စုံစမ်းသိရသည်။
အဆိုပါ စစ်ကောင်စီတပ် လေကြောင်းဗုံးကြဲသည့် မံစီမြို့နယ် မန့်ဝိန်းကြီးဒေသ မန့်ပန်ကောင်းမူးကျေးရွာ (ဝၢၼ်ႈပၢင်ႇၵွင်းမူး) သည် စစ်ကောင်စီ၏ တပ်အဟောင်း တည်နေရာဖြစ်ပြီး ကချင်လွတ်လပ်ရေးတပ်မတော် (KIA) က သိမ်းပိုက်ထားသည့် နေရာ တစ်ခုလည်း ဖြစ်ကြောင်း စစ်ရေး သတင်းမြစ်တစ်ဉီးက သျှမ်းသံတော်ဆင့်ကို ပြောသည်။
“ဗုံးကြဲခံရတဲ့ နေရာက စစ်ကောင်စီရဲ့ တပ်စခန်းအဟောင်း၊ အခုက KIA က သိမ်းပိုက်ပြီး စစ်သင်တန်းတွေ ပေးနေတဲ့နေရာပါ။ ထိခိုက်မှုတော့မရှိဘူး။ ဗုံးက စခန်းကုန်း အဟောင်းပေါ် ချတာ” ဟု စစ်ရေး သတင်းရင်းမြစ် တစ်ဉီးက ဆိုသည်။
အဆိုပါ စစ်ကောင်စီ ကြဲချသည့် ဗုံးကြောင့် မန့်ဝိန်းကြီးရှိ နေအိမ်များ တုန်ခါသည်အထိ ပြင်းထန်ခဲ့ကြောင်း၊ စစ်ကောင်စီတပ်မှ လေကြောင်းဖြင့် ညအချိန်မတော် ဗုံးကြဲခြင်းသည် ၎င်းတို့ ဆုံးရှုံးသွားသည့် တပ်စခန်းကို ပြန်လည်ရလိုသည့် ဆန္ဒကြောင့် ပြုလုပ်ခြင်းသာဖြစ်ကြောင်း စစ်ရေးသတင်းရင်းမြစ်က သုံးသပ်ပြောသည်။
စစ်ကောင်စီတပ်မှ ၎င်းကျေးရွာကို ဗုံးကြဲတိုက်ခိုက်မှုကြောင့် TNLA ထိန်းချုပ်ထားသည့် နမ့်ခမ်းမြို့ ဒေသခံ နေအိမ်များပါ တုန်ခါစေပြီး နမ့်ခမ်းမြို့တွင်လည်း စစ်ကောင်စီမှ ထပ်မံဗုံးကြဲ တိုက်ခိုက်မည်ကို စိုးရိမ်နေကြောင်း နမ့်ခမ်းဒေသခံ အမျိုးသမီးတစ်ဦးက ပြောသည်။
စစ်ကောင်စီ ဗုံးကြဲချသွားသည့် မန့်ပန်ကောင်းမူးရွာသည် နမ့်ခမ်းမြို့နှင့် ၁၃ မိုင် (တစ်နာရီဝန်းကျင်) လောက်သာ အကွာအဝေး ရှိကြောင်း ၎င်းက ဆက်ပြောသည်။
“မနေ့ညသန်းခေါင်ယံအချိန် သူတို့ကြဲချတဲ့ ကျေးရွာနဲ့က ဘယ်လောက်မှ မဝေးဘူး ၁၃ မိုင်လောက်ပဲရှိတာ။ ကြည့်ရတာ သူတို့သုံးတဲ့ ဗုံးက တော်တော်ပြင်းပုံရတယ်။ ဒီထိတောင် နေအိမ်တွေပါ တုန်သွားတယ်ဆိုတော့။ ဒီဘက် ရောက်လာမှာကိုလည်း ကြောက်ရတယ် ဘာလို့ဆို နီးတယ်လေ”ဟု ၎င်းအမျိုးသမီးက ထပ်လောင်းပြောသည်။
ပြီးခဲ့သည့် (ဖေဖော်ဝါရီ ၂၁ ရက်) ညနေ ၄ နာရီ ဝန်းကျင်အချိန်တွင် မံစီမြို့နယ် မန်တာကျေးရွာတွင် စစ်ကောင်စီမှ လေကြောင်းဖြင့် ဗုံးကြဲတိုက်ခိုက်မှုကြောင့် ဒေသခံ ၂ ဦးသေဆုံးပြီး ၃ ဦး ဒဏ်ရာရရှိသွားကြောင်း သိရသည်။
မံစီမြို့နယ် မန့်ဝိန်းကြီးဒေသ အတွင်းရှိ တပ်စခန်း၊ ရဲစခန်းနှင့် စုပေါင်းဂိတ်များကို KIA က ယမန်နှစ် ဇန်နဝါရီ လနှောင်းပိုင်းတွင် သိမ်းပိုက်နိုင်ခဲ့သည်။
“စစ်ကောင်စီက သူတို့ အမြဲတမ်းလုပ်နေကြ သူတို့ရှုံးရင် လေကြောင်းနဲ့ဗုံးကြဲတာ လူထုကို ဉီးတည်ပြီးတိုက်တာပဲ၊ အခု မန့်ဝိန်းကြီးက နမ့်ခမ်းနဲ့နီးတော့ နမ့်ခမ်းကို လည်း ဗုံးထပ်ကြဲလာမှာ စိုးရိမ်ရတာ။ TNLA နဲ့ကလည်း ဆွေးနွေးတာ အဆင်မပြေတော့ လူထုက အလိုလို ကြောက်နေရတယ်” ဟု နမ့်ခမ်း ဒေသခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။
ယခုရက်ပိုင်းအတွင်း သျှမ်းပြည်မြောက်ပိုင်း နောင်ချိုမြို့နယ်နှင့် ကချင်ပြည်နယ် ဗန်းမော်ခရိုင်အတွင်း ပြည်သူများရှိရာ အရပ်များကို စစ်ကောင်စီမှ ရည်ရွယ်ချက်ရှိရှိဖြင့် လေကြောင်းအပါအဝင် ဒရုန်းဖြင့် ဗုံးကြဲတိုက်ခိုက်နေခြင်းကြောင့် ဒေသခံ ထောင်နှင့်ချီ ထွက်ပြေးတိမ်းရှောင်ရပြီး သေဆုံးသူနှင့် ဒဏ်ရာရရှိသူလည်း ထပ်မံတိုးလာနေကြောင်း မန့်ဝိန်းဒေသခံများက ပြောသည်။
ကချင်ပြည်နယ် ဗန်းမော်မြို့ကို ကချင်လွတ်လပ်ရေးတပ် KIA မှ ပြီးခဲ့သည့် ၂၀၂၄ ခုနှစ် ဒီဇင်ဘာလ ၄ ရက်နေ့တွင် စတင်ထိုးစစ်ဆင်ပြီး ၂ လကျော်အတွင်း ဗန်းမော်မြို့၏ မြို့စောင့်တပ်များဖြစ်သည့် အမှတ် ၇၀၀၆ သံချပ်ကာတပ်ရင်း၊ အမှတ် ၅၀၁၄ တင့်ကားတပ်ရင်း၊ ခြေလျင်တပ်ရင်း ခလရ ၂၃၅ နှင့် အမှတ် ၃၆၆ အမြောက်တပ်ရင်းတို့ကို သိမ်းပိုက်နိုင်ခဲ့ကြောင်း သိရသည်။
စစ်ကောင်စီတပ်မှ အဆိုပါ လက်လွတ်လိုက်ရသည့် မံစီမြို့နှင့် ဗန်းမော်မြို့ရှိ တပ်စခန်းများကို ပြန်လည် ထိန်းချုပ်ရန် အပြင်းအထန် ပြန်လည် ထိုးစစ်ဆင်နေကြောင်း သိရသည်။
Leave a Comments