သျှမ်းပြည် ကိုးကန့်ဒေသမှ အွန်လိုင်းကျားဖြန့်လုပ်ငန်းကို အဓိက လုပ်ကိုင်သည့် ကိုးကန့်ခေါင်းဆောင်ဟောင်း ‘မြီ’ မိသားစုများနှင့် ဆက်နွှယ်သူ (၂၃) ဦးကို ရာဇဝတ်မှုများအတွက် တရုတ်နိုင်ငံ တရားရုံးတွင် ရုံးတင်စစ်ဆေးခဲ့ကြောင်း သတင်းသိရသည်။

ဖေဖော်ဝါရီ (၁၄) ရက်မှ (၁၉) ရက်အထိ တရုတ်နိုင်ငံအရှေ့ပိုင်း Zhejiang ပြည်နယ်ရှိ Wenzhou တရားရုံးတွင် ကိုးကန့်ခေါင်းဆောင်ဟောင်း ‘မြီ’မိသားစုနှင့် ဆက်နွှယ်သူ (၂၃) ဦးကို (၆) ရက်ကြာ ရုံးတင်စစ်ဆေးခဲ့ပြီး စီရင်ချက်ချမှတ်ခြင်းကို ထပ်မံကြေညာ ဖြစ်သည်။

၎င်းတို့ကို အွန်လိမ်းငွေလိမ်မှု၊ လူသတ်မှု၊ ရည်ရွယ်ချက်ရှိရှိ ကိုယ်ထိလက်ရောက် ကျူးလွန်မှု၊ ပြည့်တန်ဆာလုပ်ငန်း စီစဉ်မှုနှင့် မူးယစ်ဆေးဝါး ရောင်းဝယ်ဖောက်ကားမှု စသည့် ရာဇဝတ်မှု (၁၁) မျိုးဖြင့် စွဲချက်တင်ခဲ့ကြောင်း တရုတ်သတင်း CCTV တွင် ဖော်ပြသည်။

တရုတ်အစိုးရ ရှေ့နေများက မြန်မာ-တရုတ်နယ်စပ်ရှိ ကိုးကန့်ဒေသ အခြေစိုက် ရာဇဝတ်ဂိုဏ်းကို ‘မြီ’မိသားစုဝင်များမှ “၎င်းတို့၏ ဩဇာနှင့် လက်နက်ကိုင်တပ်များကို အသုံးပြုကာ စက်မှုဇုန် ဖွင့်လှစ်ခဲ့ပြီး ၂၀၁၅ ခုနှစ်မှ စတင်၍ ငွေကြေးထောက်ပံ့သူများနှင့် ပူးပေါင်းကာ ရာဇဝတ်မှု ကျူးလွန်ခဲ့ကြောင်း” စွပ်စွဲထားသည်။ ၎င်းအကျိုးဆက်အဖြစ် တရုတ်နိုင်ငံသား (၁၄) ဦး အသတ်ခံရပြီး (၆) ဦး ဒဏ်ရာရကာ တရုတ်ယွမ်ငွေ ဘီလီယံ နှင့်ချီ၍ ဆုံးရှုံးခဲ့ရကြောင်း ဆိုသည်။

ယမန်နှစ် ၂၀၂၄ ဒီဇင်ဘာလ ၃၀ ရက်တွင် ကိုးကန့်ခေါင်းဆောင်ဟောင်း ‘မြီ’မိသားစုဝင်များ အပါအဝင် ၎င်းတို့နှင့် ပတ်သက်ဆက်နွှယ်သူ (၃၉) ဦးတို့ကို တရုတ်နိုင်ငံ တရားရုံး၌ ရာဇဝတ်မှု သံသယဖြင့် စတင်တရားစွဲဆိုခဲ့သည်။

‘မြီ’မိသားစု၏ ရာဇဝတ်ဂိုဏ်းကို ကိုးကန့်ဒေသ အုပ်ချုပ်ရေး ဦးစီးအဖွဲ့တွင် ပါဝင်ခဲ့သည့် မြီရှောက်ချန်း Ming Xuechang က ဦးဆောင်ခဲ့ပြီး ၎င်းကို ၂၀၂၃ ခုနှစ် နိုဝင်ဘာလတွင် တရုတ်ရဲများ ဝင်ရောက်ဖမ်းဆီးစဉ် သေနတ်ဖြင့် မိမိကိုယ်ကို သေကြောင်းကြံစည်ခဲ့သည်။

အွန်လိုင်းကျားဖြန့် ငွေလိမ်မှုများ အပါအဝင် ရာဇဝတ်မှုများဖြင့် ဆက်စပ်နေသော မြီရှောက်ချန်း၏ သားဖြစ်သူ မြီကော်ဖျင် Ming Guoping ၊ သမီးဖြစ်သူ မြီကျုလန် Ming Julan ၊ မြေးဖြစ်သူ မြီကျိန်းကျန်း Ming ZhenZhen တို့ကိုလည်း ၂၀၂၃ နိုဝင်ဘာလ (၁၆) ရက်တွင် စစ်ကောင်စီက တရုတ်နိုင်ငံသို့ လွှဲပြောင်းခဲ့သည်။

မြီရှောက်ချန်း၏ သားဖြစ်သူ အသက် (၄၃) နှစ် အရွယ်ရှိ မြီကော်ဖျင် Ming Guoping သည် စစ်ကောင်စီ ကွပ်ကဲမှုအောက်ရှိ ကိုးကန့်နယ်ခြားစောင့်တပ် ခေါင်းဆောင်ဖြစ်ပြီး ကျားဖြန့်လုပ်ငန်းများကို ကာကွယ်ရန်နှင့် အမြတ်ထုတ်ရန် ရာဇဝတ်ဂိုဏ်းတွင် တာဝန်ရှိသူဖြစ်ကြောင်း သိရသည်။

တရုတ်နိုင်ငံ နယ်နိမိတ်ပြင်ပရှိ သျှမ်းပြည် ကိုးကန့်ဒေသတွင် ဖြစ်ပွားခဲ့သော ရာဇဝတ်မှုများ ဖြစ်သော်လည်း တရုတ်နိုင်ငံသားများ၏ ကိုယ်ပိုင်အခွင့်အရေးများကို ချိုးဖောက်ခြင်းကြောင့် တရုတ်အာဏာပိုင်များက ယင်းအမှုကို စီရင်ပိုင်ခွင့်ရှိသည်ဟု တရုတ်အစိုးရရှေ့နေများက ပြောဆိုထားသည်။

ယမန်နှစ် ၂၀၂၄ ဇန်နဝါရီလ ၃၀ ရက်တွင် စစ်ကောင်စီသည် တရုတ်နိုင်ငံက ဖမ်းဝရမ်းထုတ်ထားသည့် ကိုးကန့်ပြည်သူ့စစ် ခေါင်းဆောင်ဟောင်းနှင့် လုပ်ငန်းရှင်များ အပါအဝင် အွန်လိုင်းကျားဖြန့်လုပ်ငန်း အဓိကလုပ်ကိုင်သူ တရားခံ(၁၀)ဦးတို့ကို နေပြည်တော်လေဆိပ်တွင် တရုတ်ထံ လွှဲပြောင်းပေးအပ်ခဲ့သည်။

၎င်းတို့အထဲတွင် ကိုးကန့်ပြည်သူ့စစ် ခေါင်းဆောင်ဟောင်း ပယ်ဆောက်ချိန်နှင့် သားဖြစ်သူ ပယ်ရင်ချန်၊ ကိုးကန့်ဒေသ (၁၀၀၆) နယ်ခြားစောင့်တပ်ရင်းဥက္ကဋ္ဌ ဝေဆန်း၊ ဖူလီလိုက်ကုမ္ပဏီမှ လျိုအာပေါင်နှင့် ရှုလောက်ဖာ အပါအဝင် အခြားသော အဓိကတရားခံ(၁၀)ဦးတို့ ပါဝင်သည်။