သျှမ်းပြည် ‘ဝ’ဒေသအတွင်း UWSA ထိန်းချုပ် မိုင်းလင်းခရိုင်ရှိ မန်မန်ဆိုင် သတ္တုတွင်းကို ၂ နှစ်နီးပါး ပိတ်ထားရာမှ သံဖြူသတ္တု ပြန်လည်တူးဖော်နိုင်ရန် စိစစ်မှုများ ပြုလုပ်နေကြောင်း စုံစမ်းသိရသည်။

ဖေဖော်ဝါရီ (၁၀) ရက်မှ (၁၅) ရက်အထိ ကျင်းပပြုလုပ်ခဲ့သည့် ‘ဝ’ပြည် သွေးစည်းညီညွတ်ရေးတပ်မတော် UWSA ၏ လုပ်ငန်းနှစ်ချုပ် အစည်းအဝေးတွင် ၂၀၂၅ ခုနှစ်အတွက် လုပ်ငန်းဆောင်ရွက်မှု စီမံကိန်း (၉) ခုကို ချမှတ်ခဲ့ကြောင်း WSTV မှ ဖေဖော်ဝါရီ (၁၆) ရက်တွင် သတင်းထုတ်ပြန်သည်။

‘ဝ’တပ်ဖွဲ့ UWSA ၏ ၂၀၂၅ ခုနှစ်အတွင်း လုပ်ဆောင်မည့် စီမံကိန်း (၉) ခုထဲတွင် နိုင်ငံရေး ပြုပြင်ပြောင်းလဲရေး၊ အွန်လိုင်းကျားဖြန့် တိုက်ဖျက်ရေးအပါအဝင် ၂ နှစ်နီးပါး ပိတ်ထားခဲ့သည့် မန်မန်ဆိုင်သတ္တုတွင်းကို ဒေသဖွံ့ဖြိုးတိုးတက်ရေးအတွက် ပြန်လည်တူးဖော်မည် ဖြစ်ကြောင်း သိရသည်။

“နှစ်စဉ် ပုံမှန်လုပ်နေကြ နှစ်ချုပ်အစည်းအဝေးပါ။ မန်မန်ဆိုင် သတ္တုတွင်း ပြန်လည်ဖွင့်လှစ်နိုင်ဖို့ စိစစ်မှုတွေ ပြုလုပ်နေတုန်းပါ။ ရှေ့ဆက် ဒေသအဘက်ဘက်မှ ဖွံ့ဖြို့တိုးတက်ဖို့ အတွက်တွေပါပဲ။ ကျန်တာ ထွေထွေထူးထူးမရှိပါ”ဟု ‘ဝ’ပြင်ပဆက်ဆံရေးတာဝန်ခံ ဦးညီရမ်းက သျှမ်းသံတော်ဆင့်ကို ဖြေကြားသည်။

UWSA နှစ်ချုပ်အစည်းအဝေးတွင် ဒုအထွေထွေအတွင်းရေးမှူး ပေါက်အိုက်ခမ်း ဖတ်ကြားခဲ့သည့် ၎င်းစီမံကိန်းများထဲ ပြည်ပဆက်ဆံရေး တိုးမြှင့်ရန်၊ ကျန်းမာရေးစနစ် မြှင့်တင်ရန်၊ ပိုးလမ်းမစီမံကိန်း BRI နှင့် တရုတ်-မြန်မာ စီးပွားရေးစင်္ကြံလမ်းတို့ကို အခွင့်ကောင်းယူပြီး ‘ဝ’ဒေသတွင် စီးပွားရေးဇုန်တစ်ခု တည်ဆောက်ရန် ပါဝင်သည်။

‘ဝ’တပ်ဖွဲ့မှ ပြန်လည်ခွင့်ပြုမည့် မန်မန်ဆိုင်သတ္တုတွင်းကို ၂၀၂၃ နှစ်လယ်ပိုင်းက စတင်၍ သံဖြူတူးဖော်ခွင့် ပိတ်ထားခဲ့ရာမှ ၂ နှစ်နီးပါးအကြာ ယခုနှစ်ဆန်းပိုင်းမှ စတင်၍ လည်ပတ်နိုင်ရန် ပြင်ဆင်မှုများ လုပ်ဆောင်ခဲ့ကြောင်း သိရသည်။

UWSA ထိန်းချုပ် ‘ဝ’ဒေသသည် တရုတ်နိုင်ငံ၏ သံဖြူတင်သွင်းမှု အဓိကအရင်းအမြစ် ဖြစ်ပြီး ၂၀၂၃ ခုနှစ် ဩဂုတ်လ (၁) ရက်နေ့တွင် သတ္တုသန့်စင်သည့် စက်ရုံများအားလုံးကို ရပ်ဆိုင်းလိုက်ကြောင်း ကြေညာခဲ့စဉ် တရုတ်နိုင်ငံအပေါ် ရိုက်ခတ်မှု ကြီးမားခဲ့ကြောင်း နိုင်ငံတကာ သံဖြူအသင်း (ITA) က ဖော်ပြထားသည်။

အလားတူ ကမ္ဘာ့သံဖြူထုတ်လုပ်မှု (၁၀) ရာခိုင်နှုန်းခန့်မှာ ‘ဝ’ဒေသမှ ထွက်ရှိနေခြင်းကြောင့် ယခင်ပိတ်ပင်မှုသည် ကမ္ဘာ့သံဖြူ‌ဈေးလည်း မြင့်တက်ခဲ့သည်ဟု ဆိုသည်။

သို့သော် ၂၀၂၄ ဇွန်လအတွင်း ‘ဝ’ဒေသ စက်မှုနှင့် သတ္တုတွင်းဌာနမှ အလုပ်သမားလစာ ပေးဆောင်နိုင်ရန် ခက်ခဲနေမှု အကြောင်းပြကာ မန်မန်ဆိုင် သတ္တုတွင်းရှိ လက်ကျန် သံဖြူသတ္တုများကို တင်ပို့ရောင်းချခွင့်ပြုပြီး သံဖြူ (၁၁၈၅၂) တန် ကျန်ရှိကြောင်း ထုတ်ပြန်ချက်အရ သိရသည်။

ထို့အပြင် ၂၀၂၂ မေလဆန်းပိုင်းက UWSA ထိန်းချုပ် မိုင်းလင်းခရိုင်ရှိ မန်မန်ဆိုင်သတ္တုတွင်း၌ ပေါက်ကွဲမှု ဖြစ်ပွားခဲ့ခြင်းကြောင့် သတ္တုတွင်းအလုပ်သမားနှင့် ပတ်ဝန်းကျင်မှ လူ(၁၀) ဦးထက်မနည်း သေဆုံးပြီး (၂၀) ကျော် ဒဏ်ရာရရှိခဲ့သည်။