လူပုဂ္ဂိုလ်နှင့် ပစ္စည်းလုံခြုံရေးအတွက် တစ်ဦးချင်း လုံခြုံရေးကုမ္ပဏီ တည်ထောင်ပြီး လက်နက်ကိုင်ဆောင်ခွင့်ရမည့် ပုဂ္ဂလိကလုံခြုံရေး ဝန်ဆောင်မှုဆိုင်ရာ ဥပဒေကို စစ်ကောင်စီက ယမန်နေ့ (ဖေဖော်ဝါရီလ ၁၈ ရက်) တွင် ပြဋ္ဌာန်းလိုက်သည်။

ပုဂ္ဂလိကလုံခြုံရေး ဝန်ဆောင်မှုကို စစ်ကောင်စီ၏ လုံခြုံရေး၊ တရားဥပဒေစိုးမိုးရေးတို့ကို အထောက်အကူပြုရန်၊ စစ်ကောင်စီ၏ လုံခြုံရေးဆိုင်ရာ အဖွဲ့အစည်းများနှင့် စနစ်တကျ ပူးပေါင်းဆောင်ရွက်နိုင်ရန်နှင့် အပြည်ပြည်ဆိုင်ရာ၊ ဒေသဆိုင်ရာ အဖွဲ့အစည်းများပါ ပူးပေါင်းဆောင်ရွက်နိုင်ရန် ရည်ရွယ်ပြီး အာဏာသိမ်းစစ်ခေါင်းဆောင် မင်းအောင်လှိုင် က လက်မှတ်ရေးထိုးထားသည်။

“လုံခြုံရေးအဖွဲ့လို့ ပြောရင်တော့ သူ့ရဲ့ပုံစံက ပြည်သူ့စစ်နဲ့ ခပ်ဆင်ဆင်ပါ၊ နောက်တစ်ခုက သူဌေးတို့ လောပန်းတို့ဆိုရင် Security လုံခြုံရေး ဖွဲ့လို့ ရတယ် အဲ့လို။ သူတို့ပြောချင်တာ ငွေသုံးနိုင်တဲ့ လုပ်ငန်းရှင်တိုင်း သေနတ်ကိုင်လို့ ရတဲ့သဘောပါ”ဟု နိုင်ငံရေးတက်ကြွလှုပ်ရှားသူ တစ်ဦးက သျှမ်းသံတော်ဆင့်ကို ပြောသည်။

ပုဂ္ဂလိကလုံခြုံရေး ဝန်ဆောင်မှုလုပ်ငန်းကို လုပ်ကိုင်လိုသူများ အနေဖြင့် ကြီးကြပ်ကွပ်ကဲရေး ဗဟိုကော်မတီထံ လိုင်စင်လျှောက်ထားရမည်ဖြစ်ပြီး ဥပဒေနှင့်အညီ မှတ်ပုံတင်ထားသည့် မြန်မာကုမ္ပဏီ သို့မဟုတ် နိုင်ငံခြားကုမ္ပဏီ ဖြစ်ရမည်ဟု ပါရှိသည်။

ထို့အပြင် လိုင်စင်ရရှိသည့် နိုင်ငံခြားကုမ္ပဏီ ဖြစ်ပါက ပုဂ္ဂလိကလုံခြုံရေး ဝန်ထမ်းခန့်ထားရာတွင် မြန်မာနိုင်ငံသား (၇၅) ရာခိုင်နှုန်း ခန့်ထားရမည်ဖြစ်ကြောင်း ပုဒ်မ (၁၇) တွင် ပြဋ္ဌာန်းထားသည်။

ကိုယ်ပိုင်လုပ်ငန်းအတွက် လုံခြုံရေးဝန်ထမ်း ခန့်ထားလိုသူများသည် စုစုပေါင်း (၁၀) ဦးထက် မပိုဘဲ သက်ဆိုင်ရာသို့ ခွင့်ပြုမိန့် ထပ်မံလျှောက်ထားရမည်ဖြစ်ပြီး အသက်(၁၈) နှစ် ပြည်ပြီးသူ၊ အလုပ်သမား မှတ်ပုံတင်ကတ်ပြား ကိုင်ဆောင်သူ စသည့် ဝန်ထမ်း၏ ကိုယ်ရေးအချက်အလက် အပြည်အစုံကို စိစစ်မည်ဟု ဆိုသည်။

“အဓိက မြို့ကြီးမှာနေတဲ့ သူဌေးတွေပေါ့။ ရန်ကုန်၊ မန္တလေး၊ တောင်ကြီး စသဖြင့် ဒီဥပဒေကြောင့် လုံခြုံရေးလုပ်ဖို့ လူငှားတာတွေ အများကြီးဖြစ်လာမယ်။ ခရိုနီလို ငွေလျှံတဲ့ သူဌေးကြီးတွေ များတော့ သူတို့လုံခြုံရေးအတွက် ခေါ်သုံးကြလိမ့်မယ်”ဟု ၎င်းတက်ကြွလှုပ်ရှားသူ လူငယ်က ဆက်ပြောသည်။

လုံခြုံရေးဝန်ထမ်းအဖြစ် ခန့်အပ်ရန် ရွေးချယ်ခံရသူများသည် လိုင်စင်ရကုမ္ပဏီများမှ ဖွင့်လှစ်သည့် ပုဂ္ဂလိကလုံခြုံရေးဝန်ဆောင်မှုဆိုင်ရာ သင်တန်းသို့ တက်ရောက်ပြီး နိုင်ငံခြားသား ဖြစ်ပါက ပြည်ပနိုင်ငံတစ်ခုခု၏ လက်နက်ကိုင်တပ်ဖွဲ့ဝင် မဟုတ်သူ ဖြစ်ရမည်ဟု ပြောဆိုထားသည်။

ကုမ္ပဏီတွင် လုပ်ကိုင်မည့် လုံခြုံရေးဝန်ထမ်းများ အနေဖြင့် လုပ်ငန်းဆောင်ရွက်နေစဉ် စစ်ကောင်စီလက်အောက် အနီးဆုံး ရဲစခန်းသို့ မပျက်မကွက် သတင်းပို့ရမည်ဖြစ်ပြီး သတင်းမပို့ပါက ထောင်ဒဏ်ပါ ချမှတ်နိုင်ကြောင်း စစ်ကောင်စီက ပြဋ္ဌာန်းထားသည်။

၎င်းပုဂ္ဂလိက လုံခြုံရေးဝန်ဆောင်မှုဆိုင်ရာ ဥပဒေထဲတွင် စစ်ကောင်စီ၏ လုံခြုံရေးဆိုင်ရာ အဖွဲ့အစည်း တစ်ခုခုက ၎င်းတို့နှင့် ပူးပေါင်းဆောင်ရွက်ရန် ကုမ္ပဏီကို အကြောင်းကြားပါက ငြင်းပယ်ခြင်း မပြုနိုင်ကြောင်း ပါရှိသည်။

အလားတူ လိုင်စင်ရရှိထားသည့် လုံခြုံရေးဝန်ဆောင်မှု ကုမ္ပဏီအနေဖြင့် လိုအပ်ချက်အရ လက်နက်ခဲယမ်း ကိုင်ဆောင်ခွင့်ကို အမျိုးသားကာကွယ်ရေးနှင့် လုံခြုံရေးကောင်စီသို့ တင်ပြရမည်ဖြစ်ပြီး တည်ဆဲဥပဒေများနှင့်အညီ ဆောင်ရွက်ရမည်ဟု ဆိုသည်။

အဘက်ဘက်မှ စစ်ရှုံးနေသည့် စစ်ကောင်စီသည် နိုင်ငံတဝှမ်းရှိ တရုတ်ရင်းနှီးမြှုပ်နှံမှုများကို အကာအကွယ် မပေးနိုင်တော့ခြင်းကြောင့် တရုတ်-မြန်မာ နှစ်နိုင်ငံ ပူးပေါင်းလုံခြုံရေးကုမ္ပဏီ (Joint Venture Security Company) ထူထောင်ရန်အတွက် တရုတ်နိုင်ငံက စစ်ကောင်စီကို အဆိုပြုထားပြီး စစ်ကောင်စီက ၂၀၂၄ ခုနှစ်၊ နိုဝင်ဘာ ၈ ရက်တွင် လုပ်ငန်းကော်မတီ ပြင်ဆင်ဖွဲ့စည်းခဲ့သည်။

စစ်ကောင်စီနှင့် တရုတ်အာဏာပိုင်များ ပူးပေါင်းတည်ထောင်ရန် ပြင်ဆင်နေသည့် ပုဂ္ဂလိက လုံခြုံရေးကုမ္ပဏီများကို ပိုးလမ်းမ စီမံကိန်းတစ်လျှောက်ရှိ တရုတ်စီမံကိန်းများအတွက် ကာကွယ်စောင့်ရှောက်ရန် အဓိကရည်ရွယ်သော်လည်း မြန်မာနိုင်ငံရှိ ၎င်းတရုတ်ပုဂ္ဂလိက လုံခြုံရေးကုမ္ပဏီများမှ စစ်ကောင်စီတပ်နှင့်အတူ တော်လှန်ရေး အင်အားစုများကို တိုက်ခိုက်ချေမှုန်းရာတွင် ပါဝင်လာနိုင်ကြောင်း မှန်းဆမှုများလည်း ရှိနေသည်။