သျှမ်းပြည် မိုင်းရယ်မြို့နယ်အတွင်း တန့်ယန်း-မိုင်းရယ်လမ်းခွဲရှိ စစ်ကောင်စီလက်အောက်ခံ ခြေလျင်တပ်ရင် ( ခလရ- ၆၇) မှ ကုန်စည်သယ်ယူခွင့် ပိတ်ပင်ထားခြင်းကြောင့် ဒေသခံများ အခက်အခဲ ကြုံတွေ့နေရကြောင်း စုံစမ်းသိရသည်။
တန့်ယန်း-မိုင်းရယ်လမ်းခွဲရှိ ဟိုယကျေးရွာအုပ်စုတွင် စစ်ကောင်စီလက်အောက်ခံ ခလရ-(၆၇) မှ ကုန်စည်သယ်ယူခွင့်ကို (၈) လနီးပါးကြာ ပိတ်ပင်ထားခြင်းကြောင့် စားသောက်ကုန်များ ရှားပါးကာ ဈေးကြီးပေး ဝယ်ယူနေရကြောင်း ဒေသခံများက ပြောသည်။
“ကုန်ပေးမသယ်တာ ခလရ-၆၇ တပ်က၊ ပြည်သူက ကိုးကန့်တပ်ကို သွားကျွေးမယ်ထင်လို့နေမှာ။ အခု ဟိုယအုပ်စုမှာ ကုန်ဈေး အရမ်းတက်တယ်၊ အရင်က ရာဂဏန်းပေးဝယ်ရတာ အခု တစ်ထောင်ကျော် ဖြစ်ကုန်ပြီ။ စားသောက်ကုန်လည်း အများကြီး မရှိဘူး၊ ဘာလိုလို မြို့ထဲသွားရတော့ ပြည်သူဒုက္ခရောက်တယ်”ဟု မိုင်းရယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
မိုင်းရယ်မြို့နှင့် ၅ မိုင်ခန့်သာ ကွာဝေးသည့် ဟိုယကျေးရွာအုပ်စုတွင် ကျေးရွာပေါင်း (၂၀) ရွာ ရှိပြီး ကိုးကန့်တပ်ဖွဲ့ MNDAA က (၁၅) ရွာကို ထိန်းချုပ်ထားပြီး ဖေဖော်ဝါရီလ ၇ ရက်မှ စတင်ကာ ဝမ်လုံရွာနှင့် ပန်ညောင်ရွာတို့တွင် MNDAA မှ ဦးဆောင်၍ လောင်းကစားဝိုင်းများ ဖွင့်လှစ်နေကြောင်း ဒေသခံများက ထပ်လောင်းပြောကြားသည်။
ဟိုယကျေးရွာအုပ်စုအတွင်းရှိ နားမွန်းကျေးရွာကိုလည်း ‘ဝ’တပ်ဖွဲ့ UWSA က ထိန်းချုပ်ထားပြီး နောင်လုံ၊ ကုန်းကော်၊ ဖဖါ(ဝၢၼ်ႈၾႃႉၽႃႇ)နှင့် နားလိုင်ရွာတို့မှာ စစ်ကောင်စီတပ် လက်အောက်တွင် ရှိကြောင်း ဒေသခံများထံမှ သိရသည်။
“လမ်းခွဲမှာ ရှိတဲ့ စစ်တပ်ဂိတ်က လူတော့ ပေးဖြတ်တယ်၊ စားသောက်ကုန်ပါရင်တော့ မပေးဖြတ်တော့ဘူး။ ပစ္စည်းတင်ချင်ရင် တခြားလမ်းကနေ လာရတယ်၊ ကုန်တွေကို ကားနဲ့ တင်လို့ မရဘူး။ ဆိုင်ကယ်နဲ့ တင်ပြီး ၃/၄ နာရီ သယ်ရတယ်။ ဟိုယ-မိုင်းရယ် လမ်းပေါက်ရင်တော့ တည့်တည့်ဆိုရင် နာရီဝက်ပဲ ကြာတယ်”ဟု ၎င်းဒေသခံ အမျိုးသားက ဆက်ပြောသည်။
ယခင်က ဆန်တစ်အိတ်ကို မြန်မာကျပ်ငွေ ၈ သောင်းနီးပါးသာ ပေးဝယ်ခဲ့ရသော်လည်း စားသောက်ကုန် သယ်ယူခွင့် ပိတ်ခံရပြီးနောက် တစ်သိန်းခွဲခန့် ဈေးမြင့်တက်သွားပြီး ဓာတ်ဆီ တစ်လီတာကို ၈ ထောင်ကျပ်ခန့်ဖြင့် ဝယ်ယူနေရကြောင်း သိရသည်။
စစ်ကောင်စီနှင့် MNDAA တရားဝင် အပစ်ရပ် ကြေညာထားခြင်းကြောင့် စားသောက်ကုန် ပစ္စည်းများကို လွတ်လွတ်လပ်လပ် ဖြတ်သန်းခွင့်ပြုရန် စစ်ကောင်စီတပ်ထံ တောင်းဆိုထားသော်လည်း ထူးခြားမှု မရှိကြောင်း ဒေသခံများက ပြောဆိုသည်။
ယမန်နှစ် ၂၀၂၄ နိုဝင်ဘာလမှ စတင်ပြီး မိုင်းရယ်မြို့ရှိ အခြားသော စစ်ကောင်စီ စစ်ဆေးရေးဂိတ်များတွင် ဖြတ်သန်းသွားလာသည့် ကားများမှ ကုန်ပစ္စည်း တင်ဆောင်လာလျှင် ဗျူဟာမှူး ထောက်ခံစာ ပြနိုင်မှ သယ်ယူခွင့်ရကြောင်း ဒေသခံများထံမှ သိရသည်။
Leave a Comments