ထိုင်းနိုင်ငံ ချင်းမိုင်မြို့ Payap Technology and Business College ( ဖာယပ်တက်နိုလိုဂျီကောလိပ်)တွင် ကျောင်းတက်နေသော မြန်မာကျောင်းသားတစ်ဦးသည် ချစ်သူများနေ့ (ဖေဖော်ဝါရီလ ၁၄ ရက်)၌ ဓားထိုးခံရပြီး သေဆုံးသွားခဲ့ကြောင်း စုံစမ်းသိရသည်။

ဖြစ်စဉ်မှာ (ဖေဖော်ဝါရီလ ၁၄ ရက်) ညသန်းခေါင်ယံချိန်တွင် အသက် ၂၀ အရွယ်ရှိ စိုင်းလောဝ်း (ခ) နာ့သ်တဆစ်ဆိုသူ သျှမ်းလူငယ်တစ်ဦးသည် ၎င်းသူငယ်ချင်းနှင့်အတူ မယ်ကျို့ရဲစခန်းအနောက်ဘက်ရှိ စားသောက်ဆိုင်၌ သောက်စားပျော်ပါးနေစဉ် လူငယ်ချင်းခိုက်ရန်ဖြစ်ပွားပြီး ဓားထိုးခံလိုက်ရကြောင်း ချင်းမိုင်နာရေးကူညီမှုအဖွဲ့မှ စိုင်းတိုင်းထိန်က သျှမ်းသံတော်ဆင့်ကို ပြောသည်။

“အဲ့ညက သူတို့သူငယ်ချင်းတွေနဲ့ သောက်စားပျော်ပါးနေတဲ့အချိန်မှာ ကောင်မလေးတစ်ယောက်က သူ့ကို ခွက်လာတိုက်တာ။ ခွက်လာတိုက်တဲ့ ကောင်းမလေးတစ်ယောက်က ရည်းစားရှိတယ်။ သူ့ရည်းစားမကျေနပ်လို့ အပြင်မှာသွားရှင်းမယ်ဆိုပြီး ခေါ်ထုတ်သွားတာ။ အပြင်ရောက်တော့ ဓားနဲ့ထိုးခံလိုက်ရတာ” ဟု စိုင်းတိုင်းထိန်က ရှင်းပြသည်။

ဓားထိုးခံရသော စိုင်းလောဝ်းကို သူငယ်ချင်းများက ဆန်ဆိုင်းဆေးရုံသို့ ပို့ဆောင်ခဲ့သော်လည်း သွေးထွက်လွန်ပြီး သေဆုံးသွားခဲ့ကြောင်း၊ အဆိုပါအလောင်းကို (ဖေဖော်ဝါရီလ ၁၇ ရက်)က မီးသင်္ဂြိုလ်ပေးခဲ့ကြောင်း ဆိုသည်။

ထို့ပြင် ဓားဖြင့်ထိုးခဲ့သူ အသက် ၂၁ နှစ်အရွယ်ရှိ နိုင်းဆကလင်းကျိုင်နူသည်လည်း (ဖေဖော်ဝါရိလ ၂၅ ရက်)တွင် ရဲစခန်း၌ လာရောက်အဖမ်းခံကာ အာမခံငွေ ဘတ် ၁ သိန်းခွဲဖြင့် ပြန်လွှတ်လာခဲ့ကြောင်း စိုင်းတိုင်းထိန်က ပြောသည်။

လက်ရှိတွင် နိုင်းဆကလင်းကျိုင်နူသည် အိမ်သို့ပြန်ရောက်လာပြီး အပြင်မှအမှုရင်ဆိုင်ရန် စောင့်ဆိုင်းနေကြောင်း ဆိုသည်။

“လူငယ်လူရွယ်တွေအနေနဲ့ ညဘက်မှာအပြင်သိပ်မသွားလည်ကြဖို့ သတိပေးချင်တယ်။ အန္တရာယ် အရမ်းများပါတယ်။ မြန်မာအချင်းချင်း မထိုးကြရင်လည်း သူများကကိုယ့်ကိုယ်လာထိုးနိုင်တယ်။ ကိုယ်က သူများကိုသွားမထိုးမိရင်လည်း သူများကကိုယ့်ကိုယ်လာထိုးနိုင်တယ်။ ဒါကြောင့် မိဘတွေအနေနဲ့လည်း ကိုယ့်သား၊သမီးတွေကို အပြင်ပေးမထွက်ဖို့၊ အရက်သောက်ချင်ရင်လည်း အိမ်မှာဘဲသောက်ကြပါ။ မူးရင်လည်း အိမ်မှာဘဲ အိမ်ပါ” ဟု စိုင်းတိုင်းထိန်က ပြောသည်။

သေဆုံးသွားသော စိုင်းလောဝ်းသည် ထိုင်းနိုင်ငံ ချင်းမိုင်မြို့Payap Technology and Business College ကျောင်းတက်နေပြီး လျှပ်စစ်အင်ဂျင်နီယာ ဘာသာရပ်မှ ပထမနှစ်ကျောင်းသားတစ်ဦးလည်း ဖြစ်ကြောင်း သိရသည်။

စိုင်းလောဝ်း၏ မိဘများသည် သျှမ်းပြည်မြောက်ပိုင်း ကျောက်မဲခရိုင် မိုင်းငေါ့မြို့က ဇာတိဖြစ်ပြီး ချင်းမိုင်တွင် ရွှေ့ပြောင်းအလုပ်သမားများအနေဖြင့် အလုပ်လုပ်ကိုင်နေကြသည်။

ယခုကဲ့သို့ ဓားထိုးခံရမှုနှင့် ပတ်သက်၍ တရားခံနှင့် ၎င်းမိခင်ဖြစ်သူက လာရောက်တောင်းပန်ခြင်း၊ လျော်ကြေးငွေ ဘတ် ၁ သိန်းခွဲဖြင့် အမှုကြေအေးပေးရန် ညှိနှိုင်းခြင်း ပြုလုပ်ခဲ့သော်လည်း စိုင်းလောဝ်း၏ဆွေမျိုးမိဘများ ကတော့ တရားဥပဒေကပေးသည့် အပြစ်ကိုသာ ခံယူစေချင်သည်ဟုပြောသည်။

အလားတူ သျှမ်းပြည် မိုးနဲမြို့ အမျိုးသမီးငယ်တစ်ဦးလည်း ပြီးခဲ့ရက်ပိုင်း ချစ်သူများနေ့ (ဖေဖော်ဝါရီလ ၁၄ ရက်)၌ သွားလည်နေစဉ် အသတ်ခံရသည်။