ကရင်ပြည်နယ်၊ မြဝတီမြို့နယ် ရွှေကုက္ကိုလ်ကျားဖြန့်လုပ်ငန်းခွင်များအတွင်း ပိတ်မိနေသော ၁၃ မျဉ်းစောင်း နိုင်ငံသားစီစစ်ရေးကဒ်ကိုင်ဆောင်သည့် လူငယ်များ နေရပ်ပြန်ရန် စိုးရိမ်နေရကြောင်း သတင်းရရှိသည်။

၂၀၂၅ ခုနှစ်၊ ဖေဖော်ဝါရီလ ပထမပတ်မှ စတင်၍ ကျားဖြန့်လုပ်ငန်းများ အခြေစိုက်ထားသည့် ထိုင်း-မြန်မာနယ်စပ် မြဝတီမြို့အား လျှပ်စစ်မီးနှင့် လောင်စာဆီများ ဖြတ်တောက်ရန် ထိုင်းအစိုးရ စီစဉ်ခဲ့သည်။

ထို့ကြောင့် ရွှေကုက္ကိုလ်အတွင်းရောက်ရှိနေသည့် ၁၃ မျဉ်းစောင်းကိုင်ဆောင်သည့် သျှမ်းပြည်မှ လူငယ်အများအပြား နေရပ်သို့ပြန်ရန် အခက်အခဲများအကြားစိုးရိမ်မှုများမြင့်တက်လာနေကြောင်းသိရသည်။

“သတင်းတွေအမျိုးမျိုးထွက်နေတော့ အိမ်ကမိသားစုတွေကလည်း စိုးရိမ်နေတယ်၊ ထွေထွေထူးထူးတော့မဖြစ်သေးဘူး၊ ၁၀ လပိုင်းတုန်းကလည်း ဖမ်းမယ်ဆိုပြီး မဖမ်းဘူး၊ ဒီတစ်ခေါက်တော့ ဘယ်လိုလာမလဲမသိဘူး” ဟု အသက် ၂၅ နှစ်အရွယ်လူငယ် အမျိုးသမီးတစ်ဦးမှ သျှမ်းသံတော်ဆင့်သို့ပြောသည်။

လက်ရှိတွင်လည်း လမ်းတွင် ၁၃ မျဉ်းစောင်းကိုင်ဆောင်သည့်သူများအား ဖမ်းဆီးနေသည်ဆိုသည့် သတင်းများကြောင့် နေရပ်မပြန်ရဲကြကြောင်းလည်း ၎င်းအမျိုးသမီးမှဆက်ပြောသည်။

“အိမ်ပြန်လို့လည်းအဆင်မပြေဘူး ၁၃ မျဉ်းစောင်းဖြစ်နေလို့၊ ပျံ့နေတဲ့ သတင်းတွေကြောင့် အခြေအနေမကောင်းရင်တော့ ရတဲ့နည်းလမ်းရှာရမှာပေါ့ ရွှေကုက္ကိုလ်ထဲမှာက ရေ၊ မီး ဖြတ်ထားပြီ တချို့နေရာတွေတော့ အချိန်နဲ့ပေးနေတယ်” ၎င်းက ဆက်ပြောသည်။
ရွှေကုက္ကိုလ်မြို့သစ်သည် ၂၀၂၁ ခုနှစ် စစ်တပ်အာဏာသိမ်းပြီးနောက်ပိုင်းတွင် ကျားဖြန့်လုပ်ငန်းများကို တွင်တွင်ကျယ်ကျယ်လုပ်ကိုင်သည့်နေရာတစ်ခုဖြစ်လာခဲ့ပြီး လက်ရှိအချိန်အထိ လုပ်ငန်းများ လည်ပတ်နေဆဲဖြစ်သည်။

“၁၀၂၇” ကျားဖြန့်နှိမ်နှင်းသည့် စစ်ဆင်ရေးကြောင့်လည်း သျှမ်းမြောက် လောက်ကိုင်မြို့မှ လူငယ်အများအပြား ရွှေကုက္ကိုလ်အတွင်းသို့ ပြောင်းရွှေ့ဝင်ရောက်လာခဲ့သည်။

ယမန်နေ့ ဖေဖော်ဝါရီ ၁၂ ရက်နေ့ကလည်း မြဝတီမြို့နယ်အတွင်းရှိ ကျားဖြန့်အွန်လိုင်းငွေလိမ်လုပ်ငန်းများမှ လူကုန်ကူးခံရသည့် နိုင်ငံခြား ၂၆၁ ဦးအား ဒီမိုကရေစီအကျိုးပြုကရင်တပ်မတော် (DKBA) မှ ထိုင်းအာဏာပိုင်များထံ လွှဲပြောင်းပေးအပ်ခဲ့သည်။

ကရင်နယ်ခြားစောင့်တပ် (BGF)၏ ခေါင်းဆောင် ဗိုလ်မှူးကြီး စောချစ်သူအပါအဝင် ထိပ်တန်းခေါင်းဆောင်များကိုလည်း လူကုန်ကူးမှု သံသယဖြင့် ဖမ်းဝရမ်းထုတ်နိုင်ရန် ပြင်ဆင်နေကြောင်း ထိုင်းအထူးစုံစမ်းစစ်ဆေးရေးဌာန (DSI) ကထုတ်ပြန်ထားသည်။

ထိုထုတ်ပြန်ချက်များကြောင့် နယ်ခြားစောင့်တပ်ခေါင်းဆောင် ဗိုလ်မှူးကြီးစောချစ်သူမှ ကျားဖြန့်လူမှောင်ခိုးနှိမ်နင်းရေးအဖွဲ့အားဖွဲ့စည်းပြီး ကိုယ်တိုင်ကွပ်ကဲလုပ်ဆောင်မည့်အကြောင်း ဘီဘီစီ(BBC) သတင်းဌာနနှင့် အင်တာဗျုးတွင် တုံ့ပြန်ပြောဆိုထားသည်။