သျှမ်းပြည်အရှေ့ပိုင်း ကျိုင်းတုံမြို့အခြေစိုက် စစ်ကောင်စီလက်အောက်ခံ ပြည်နယ်ဒုတိယရဲတပ်ဖွဲ့က လိုင်စင်မဲ့ကားများကို လိုက်လံဖမ်းဆီးမှုများ ပြုလုပ်နေကြောင်း သတင်းရရှိသည်။

သျှမ်းပြည်အ‌ရှေ့ပိုင်း တာချီလိတ်မြို့ရှိ ကားအရောင်းပြခန်း Car Showroom များကို ပြီးခဲ့သည့် ဖေဖော်ဝါရီလ ၃ ရက်နေ့မှ စတင်၍ ကျိုင်းတုံမြို့မှ ဌာနဆိုင်ရာအဖွဲ့အစည်းများနှင့် ပြည်နယ်ဒုတိယရဲတပ်ဖွဲ့က ကားလိုင်စင်များကို နေ့စဉ် ဝင်ရောက်စစ်ဆေးပြီး ဖမ်းဆီးမှုများ ပြုလုပ်နေကြောင်း ကားပွဲစားတစ်ဦးက သျှမ်းသံတော်ဆင့်ကို ပြောသည်။

“ကားတွေကို ဒီလ သူတို့ စီမံချက်ထုတ်ပြီးတော့ စဖမ်းနေတော့။ ဆိုင်တွေထဲထိ လိုက်စစ်ပြီးတော့ကို ဖမ်းနေတာ။ ကျိုင်းတုံက ဌာနဆိုင်ရာတွေက သွားဖမ်းတာလေ။ ကျနော်တို့က အရောင်းအဝယ်တွေ ပိတ်ထားရတယ်။ အကုန်လုံးနီးပါးပဲ၊ ဘယ်သူမှတောင် မဖွင့်ရဲဘူး ပိတ်ထားကြတာ”ဟု ၎င်းကားပွဲစားက ပြောသည်။

တာချီလိတ်မြို့အတွင်းရှိ ကားအရောင်းအဝယ် ပြုလုပ်နေသည့် အရောင်းပြခန်း ဆိုင်ကြီးများ၊ ကားပွဲစားတန်းများ၊ အထောက်အထားနှင့် လုပ်ငန်းလိုင်စင် မရှိသည့် နေရာများကို အဓိကထား၍ ဝင်ရောက်ဖမ်းဆီးမှုများ ပြုလုပ်နေသည့်အပြင် လမ်းပေါ်တွင် သွားလာနေသည့် ကားများ၊ နေအိမ်အတွင်းရှိ ကားများလည်း လိုက်လံဖမ်းဆီးမှုများ ပြုလုပ်နေကြောင်း တာချီလိတ်မြို့ ဒေသခံအမျိုးသားတစ်ဦးက ထပ်လောင်းပြောသည်။

“မနေ့က ၄/၅ ဆိုင်လောက် ဝင်ဖမ်းပြီး သိမ်းသွားတယ်။ တချို့က ကားကို အိမ်မှာတောင် မထားရဲကြဘူး၊ အိမ်ထဲထိ လာစစ်ပြီး သိမ်းနေတာခုက။ ဆိုင်ကြီးတွေ၊ ကားပွဲစားတန်းတွေ၊ အထောက်အထားမဲ့ ကားတွေကို လိုက်ဖမ်းတာပေါ့။ လုပ်ငန်းလိုင်စင် မရှိတဲ့ ဆိုင်တွေမှာလည်း လိုက်ဖမ်းတယ်၊ သူတို့ ဖြေးဖြေးချင်း သိမ်းနေတာပေါ့။ လမ်းပေါ်တွေမှာလည်း စဖမ်းတာမျိုးတော့ ရှိလာပြီ”ဟု ၎င်းတာချီလိတ်မြို့ ဒေသခံ အမျိုးသားက ပြောသည်။

လက်ရှိတွင်ဖမ်းဆီးထိန်းသိမ်းထားသည့် ကားများကို ပြန်ရွေးယူရန် မပြောဆိုသေးသော်လည်း၊ မြို့အတွင်း၌ သွားလာနေသည့် ကား ၈၀ ရာခိုင်နှုန်းသည် လိုင်စင်မဲ့ကားများဖြစ်ကြောင်း ၎င်းက ဆက်ဆိုသည်။

တာချီလိတ်မြို့တွင် ဒုစရိုက်သမား ပေါများမှု အခြေအနေကြောင့် ကားစီး၍ သွားလာခြင်းသည် ပို၍ လုံခြုံပြီး လုယက်မှု၊ ဓားပြတိုက်ခံရမှုများလည်း ကာကွယ်နိုင်ကြောင်း တာချီလိတ်မြို့နယ် ဒေသခံ အမျိုးသားတစ်ဦးက ဆက်ဆိုသည်။

“ကားစီးတာနဲ့ ဆိုင်ကယ်စီးတာနဲ့ ကွာတယ်။ ကျနော်လည်း ဆိုင်ကယ် ၄ စီးလောက်ရှိပြီ ပျောက်တာ လုခံရတာ။ တာချီလိတ်မှာ ဆိုင်ကယ်စီးရတာလည်း ည ၉ နာရီ လူပြတ်တဲ့ နေရာတွေ ရောက်နေရင် ကြောက်နေရတယ်။ ဆိုင်ကယ်နဲ့ကလည်း စိုးရိမ်ရတာ မိန်းကလေးတွေအတွက်ဆို ပိုဆိုး။ ကားစီးတာက ပိုပြီးတော့ လုံခြုံမှုရှိတာပေါ့”ဟု ၎င်းအမျိုးသားက ပြောသည်။

လိုင်စင်မဲ့ကားများ လိုက်လံဖမ်းစီးနေသည့် ရဲတပ်ဖွဲ့သည့် တာချီလိတ်ရဲတပ်ဖွဲ့မှ ဦးဆောင်ခြင်း မဟုတ်ဘဲ ပြည်နယ်ဒုတိယရဲတပ်ဖွဲ့မှူး (ကျိုင်းတုံ) ရဲမှူးကြီး သန့်ဇင်၏ ညွှန်ကြားမှုဖြင့် ကျိုင်းတုံအခြေစိုက် ရဲတပ်ဖွဲ့က အဓိက ဦးဆောင်ကာ တာချီလိတ်မြို့ပေါ် ရပ်ကွက်အလိုက် လိုက်လံစစ်ဆေး ဖမ်းဆီးနေခြင်းဖြစ်ကြောင်း သိရသည်။

တာချီလိတ်မြို့တွင် ယခုတစ်ကြိမ် လိုင်စင်မဲ့ကားများကို ဖမ်းဆီးခြင်းသည် ကြိုတင် သတိပေး လုပ်ဆောင်ခြင်းမရှိဘဲ ရုတ်တရက် ဖမ်းဆီးခြင်းဖြစ်သည်။

လိုင်စင်မဲ့ကားများကို ဂျပန်နိုင်ငံမှ တစ်ဆင့် လေလံ မှာယူကြသကဲ့သို့ ထိုင်းနိုင်ငံ မယ်ဆိုင်မှ တစ်ဆင့် ချင်းဆယ်ဆိပ်ကမ်းမှ မဲခေါင်မြစ်ကို ဖြတ်ကူးပြီး မြန်မာဘက်ကမ်းရှိ ဦးဇွဲဆိပ်ကမ်း၊ ဟုန်ပန်းဆိပ်ကမ်းနှင့် အခြားဆိပ်ကမ်းတို့တွင် တင်သွင်းကြကြောင်း သိရသည်။