တရားမဝင် အွန်လိုင်းလောင်းကစားနှင့် ငွေကြေးလိမ်လည်မှု (ကျားဖြန့်) လုပ်ငန်းတွင် နယ်မြေအလိုက် တာဝန်ရှိသည့် စစ်တပ် ဘက်တော်သားများ ပတ်သက်နေမှုရှိပါက ထိရောက်စွာ အရေးယူမည်ဟု စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က သတိပေး ပြောဆိုလိုက်သည်။

ယမန်နေ့ (ဖေဖော်ဝါရီ ၃ ရက်) နေပြည်တော်တွင် ပြုလုပ်သည့် စစ်ကောင်စီ လုပ်ငန်းညှိနှိုင်း အစည်းအဝေး၌ ထိုကဲ့သို့ ပြောဆိုခြင်း ဖြစ်သည်။

တရားမဝင် အွန်လိုင်းလောင်းကစားနှင့် ငွေကြေးလိမ်လည်မှု (ကျားဖြန့်)လုပ်ငန်းများကို ထိထိရောက်ရောက် အရေးယူခဲ့ကြောင်း၊ နိုင်ငံတကာ၌လည်း ၎င်းကိစ္စနှင့် ပတ်သက်၍ အာရုံစိုက်မှုရှိလာကြောင်း၊ စစ်ကောင်စီအနေဖြင့် နိုင်ငံတကာနှင့် ပူးပေါင်း၍ ၎င်းဒုစရိုက်မှု နှိမ်နင်းရေးတက်ကြွကျယ်ပြန့်စွာ ဆောင်ရွက်နေကြောင်း ဆိုသည်။

ထို့ပြင် တရားမဝင် အွန်လိုင်းလောင်းကစားနှင့် ငွေကြေးလိမ်လည်မှု (ကျားဖြန့်) လုပ်ငန်းများ မရှိစေရေးနှင့် မဖြစ်ပေါ်စေရေး ဖော်ထုတ်အရေးယူခြင်းများဖြင့် တင်းတင်းကျပ်ကျပ် ပြတ်ပြတ်သားသား ကိုင်တွယ်ကြရန် မဖြစ်မနေ လိုအပ်ကြောင်း ဗိုလ်ချုပ်မှူးကြီးက ပြောဆိုသည်။

ပြီးခဲ့သည့် ဇန်နဝါရီလ ၂၁ ရက်က တရုတ်နိုင်ငံ ကူမင်းမြို့တွင် ကျင်းပခဲ့သည့် အစည်းအဝေး၌ တရုတ်၊ မြန်မာနှင့် ထိုင်းနိုင်ငံတို့ ကျားဖြန့်နှိမ်နှင်းရေး သဘောတူညီချက် ရရှိထားသည်။

ကျားဖြန့်နှင့် မူးယစ်ဆေးသည် ယခင် စစ်ကောင်စီ ထိန်းချုပ်ခဲ့သည့် တရုတ်နှင့် ထိုင်းနယ်စပ် တလျှောက် အကြီးအကျယ် တိုးပွားခဲ့ခြင်း ဖြစ်သည်။

ကျားဖြန့် လုပ်ငန်း အကြီးအကျယ် လုပ်ကိုင်မှုဖြင့် စစ်ကောင်စီ၏ စီးပွားဖက် ယခင် ကိုးကန့် ခေါင်းဆောင်များကို တရုတ်က ဖမ်းဆီးထားသည့် နည်းတူ စစ်ဗိုလ်ချုပ် တချို့ကိုလည်း စစ်တပ်က ဖမ်းဆီး ထောင်ချထားသည်။

လောက်ကိုင်၊ မူဆယ်၊ တာချီလိတ်၊ ၀ ဒေသ၊ မြဝတီ စသည့်ဒေသများမှ ကျားဖြန့် ပတ်သက် သူများအား သက်ဆိုင်ရာနိုင်ငံများသို့ ပြန်လည် လွှဲပြောင်းပေးနေရာ ယခုနှစ်ဇန်နဝါရီ ၁၃ ရက်ထိ ၅၅,၇၁၁ ဦး ရှိကြောင်း စစ်ကောင်စီက ထုတ်ပြန်ပြန်ထားသည်။

လက်ရှိ မြန်မာ၊ တရုတ်၊ ကမ္ဘောဒီးယား၊ လာအို၊ ထိုင်း၊ ဗီယက်နမ် ၆ နိုင်ငံ ပါဝင်သည့် ကျားဖြန့် နှိမ်နှင်းရေး “ဇင်ယော်” စစ်ဆင်ရေး ဒုတိယပိုင်း စတင်မည်ဟု ရန်ကုန် အခြေစိုက် တရုတ်သံရုံးက ထုတ်ပြန်ထားသည်။