ညီနောင်မဟာမိတ်တပ်များထံ တိုင်းစစ်ဌာနချုပ် နှစ်ခုအထိ လက်လွှတ်ဆုံးရှုံးထားရသည့် အာဏာသိမ်းစစ်ကောင်စီက အရေးပေါ်ကာလကို (၇) ကြိမ်မြောက် ထပ်မံသက်တမ်းတိုးကြောင်း ကြေညာလိုက်သည်။

ယနေ့ (ဇန်နဝါရီလ ၃၁ ရက်) နံနက်ပိုင်းတွင် နေပြည်တော်၌ ကျင်းပပြုလုပ်ခဲ့သည့် အမျိုးသားကာကွယ်ရေးနှင့် လုံခြုံရေးကောင်စီ အစည်းအဝေးတွင် ယာယီသမ္မတ ရာထူးရယူထားသည့် အာဏာသိမ်းစစ်ခေါင်းဆောင် မင်းအောင်လှိုင်က အထွေထွေရွေးကောက်ပွဲ ကျင်းပရန် တည်ငြိမ်အေးချမ်းမှု လိုအပ်ဟု အကြောင်းပြကာ နိုင်ငံတော်အရေးပေါ်အခြေအနေကို (၇) ကြိမ်မြောက် သက်တမ်းတိုးခဲ့ခြင်း ဖြစ်သည်။

စစ်ခေါင်းဆောင် မင်းအောင်လှိုင်သည် ၎င်းတို့ တင်မြှောက်ခဲ့သည့် ယာယီသမ္မတ ဦးမြင့်ဆွေကို ယမန်နှစ် ဇူလိုင်လအတွင်း ကျန်းမာရေး အကြောင်းပြကာ အနားပေးခဲ့ပြီး NLD အစိုးရလက်ထက် ဒုသမ္မတဖြစ်သူ ဦးဟင်နရီဗန်ထီးယူကိုလည်း အလားတူ အနားပေးခဲ့သည်။

၎င်းနောက် ယာယီသမ္မတ ရာထူး သူ့ကိုယ်သူ ပြန်လည်ပေးအပ်ထားသည့် စစ်ခေါင်းဆောင် မင်းအောင်လှိုင်သည် ၂၀၂၄ ဩဂုတ်လအတွင်း တရုတ်နိုင်ငံခြားရေးဝန်ကြီး ဝမ်ယိကို နေပြည်တော်၌ လက်ခံတွေ့ဆုံခဲ့သည်။

ထို့အပြင် ယမန်နှစ် နိုဝင်ဘာလအတွင်းကလည်း မဟာမဲခေါင်ဒေသ အစည်းအဝေးများ တက်ရောက်ရန် တရုတ်နိုင်ငံသို့ ပထမဆုံး သွားရောက်ခဲ့သည့် စစ်ခေါင်းဆောင် မင်းအောင်လှိုင် ခရီးစဉ်အတွင်း တရုတ်နိုင်ငံဝန်ကြီးချုပ်နှင့်လည်း တွေ့ဆုံခဲ့ပြီး နယ်စပ်ကုန်သွယ်ရေးနှင့် မြန်မာနိုင်ငံထဲရှိ တရုတ်စီမံကိန်းများ ထပ်မံတိုးမြှင့်ရန် ဆွေးနွေးခဲ့ကြသည်။

အခြားတစ်ဘက်တွင် ၂၀၂၄ ခုနှစ် ဩဂုတ်လတွင် သျှမ်းပြည်မြောက်ပိုင်း လားရှိုးအခြေစိုက် အရှေ့မြောက်တိုင်း စစ်ဌာနချုပ် (ရမခ)ကို ကိုးကန့်တပ်ဖွဲ့ MNDAA ထံသို့လည်းကောင်း၊ ရခိုင်ပြည်နယ်အခြေစိုက် အမ်းမြို့နယ်အခြေစိုက် အနောက်ပိုင်းတိုင်း စစ်ဌာနချုပ် (နပခ) ကို ယမန်နှစ် ဒီဇင်ဘာလအတွင်း အာရက္ခတပ်တော် AA ထံသို့လည်းကောင်း စစ်ကောင်စီတပ်က လက်လွှတ်ဆုံးရှုံးထားသည်။

အလားတူ စစ်အာဏာသိမ်းကာလ (၄) နှစ်အတွင်း နိုင်ငံတဝှမ်း အဘက်ဘက်မှ စစ်ရေးရှုံးနိမ့်နေသည့် စစ်ကောင်စီတပ်သည် မြို့အများအပြားကိုလည်း တိုင်းရင်းသားတော်လှန်ရေးတပ်များနှင့် ပြည်သူ့ကာကွယ်ရေး PDF တပ်များထံ နယ်မြေဆုံးရှုံးလိုက်ရသည်။

စစ်ကောင်စီတပ်သည် ဆုံးရှုံးထားရသည့် တိုင်းစစ်ဌာနချုပ်များကို ပြန်လည်ရရှိရန် တရုတ်နိုင်ငံ၏ ကြားဝင်စေ့စပ်မှုဖြင့် ပြုလုပ်သည့် ဆွေးနွေးပွဲများတွင် ညီနောင်မဟာမိတ်တပ်များကို အမြဲတမ်း တောင်းဆိုပြီး ၎င်းတို့ထိန်းချုပ်နယ်မြေထဲသို့ လေကြောင်းဖြင့်လည်း အပြင်းအထန် ထိုးစစ်ဆင် တိုက်ခိုက်နေသည်။

ထို့အပြင် စစ်ကောင်စီသည် ယမန်နှစ် ဖေဖော်ဝါရီလက အတည်ပြုခဲ့သည့် ပြည်သူ့စစ်မှုထမ်းဥပဒေ နောက်ဆက်တွဲအဖြစ် စစ်မှုထမ်းနည်းဥပဒေကို ဇန်နဝါရီလအတွင်း ထပ်မံထုတ်ပြန်ခဲ့ပြီး အမျိုးသမီးများပါ စစ်မှုထမ်းရမည်ဖြစ်ကာ လူငယ်မှန်သမျှကို ပြည်ပ ထွက်ခွင့် ပိတ်ပင်သည့် ပုဒ်မများလည်း ပါဝင်လာသည်။