သျှမ်းပြည် မူဆယ်မြို့နယ် (၁၀၅) မိုင်ကုန်သွယ်ရေးဇုန်တွင် တရုတ်နှစ်သစ်ကူးကာလ နားလည်မှုဖြင့် ပြည်ထောင်စုလမ်းမကြီးအတိုင်း ယာဉ်ဖြတ်သန်းသွားလာနေကြောင်း စုံစမ်းသိရသည်။

ယနေ့ (ဇန်နဝါရီ ၂၉ ရက်) တွင် ကျရောက်သည့် တရုတ်နှစ်သစ်ကူးနေ့ နားလည်မှုဖြင့် ညီနောင်မဟာမိတ်တပ်များ ပူးပေါင်းထိန်းချုပ်ထားသည့် မူဆယ်မြို့နယ် (၁၀၅) မိုင် ကုန်သွယ်ရေးဇုန်ကို စစ်ကောင်စီတပ်က ပြည်ထောင်စုလမ်းမကြီးအတိုင်း ယာဉ်များ ဖြတ်သန်းသွားလာခွင့်ပြုထားကြောင်း ဒေသခံများထံမှ သိရသည်။

“တရားဝင် ပြန်ဖွင့်ပေးတာတော့ မဟုတ်ဘူး၊ နားလည်မှုနဲ့ တရုတ်နှစ်သစ်ကူး အသွားအလာများတဲ့ သဘောပါ။ အရင်တုန်းကတော့ ညှိညှိနှိုင်းနှိုင်းနဲ့ ၂ သိန်းပေးရင် ဖြတ်လို့ရတယ်။ အသွား ၂ သိန်း၊ အပြန် ၂ သိန်း အဲ့လိုပေးရတာ။ တချို့လည်း ကျန်းမာရေးဆို ဖြတ်လို့ရတယ်။ မဟာမိတ်ကိုတော့ မပေးရဘူး၊ စစ်ကောင်စီကို ပေးရတယ်”ဟု မူဆယ်-လားရှိုး ယာဉ်မောင်းတစ်ဦးက သျှမ်းသံတော်ဆင့်ကို ပြောသည်။

မြန်မာ-တရုတ် နယ်စပ်ကုန်သွယ်ရေးတွင် ၉၀ ရာခိုင်နှုန်းကျော် အဓိကအရေးပါသည့် (၁၀၅) မိုင် ကုန်သွယ်ရေးဇုန်ကို “၁၀၂၇ စစ်ဆင်ရေး” စတင်စဉ် ၂၀၂၃ ခုနှစ် နိုဝင်ဘာလအတွင်းက ညီနောင်မဟာမိတ်တပ်များ ပူးပေါင်းထိန်းချုပ်ထားနိုင်ပြီး အာရက္ခတပ်တော် AA ဖွဲ့စည်းပေးထားသည့် FDMR မီးနဂါးတပ်တော်ကို အဓိက တွေ့ရကြောင်း ဒေသခံများထံမှ သိရသည်။

တစ်နှစ်ခွဲနီးပါး ပိတ်ထားသည့် (၁၀၅) မိုင် နယ်စပ်ကုန်သွယ်ရေးစခန်းကို ပြည်ထောင်စုလမ်းမကြီးမှ ဖြတ်သန်းနိုင်ရန် ခက်ခဲပြီး KIA ထိန်းချုပ်ထားသည့် နမ့်ဖတ်ကာ ကျော်လာပါက စစ်ကောင်စီထိန်းချုပ် မူဆယ်မြို့၊ MNDAA ထိန်းချုပ် ကျင်းစန်းကျော့ နယ်စပ်ဂိတ်နှင့် ပန်ဆိုင်းမြို့ဘက်သို့ ကွင်းလမ်းဖြင့်သာ သွားနိုင်သည်။

ထို့အပြင် စစ်ကောင်စီဘက်မှ အနည်းဆုံး ဂိတ်(၄) ခုဖွင့်လှစ်၍ တစ်ဂိတ်လျှင် ကျပ် ၃ သောင်းမှ ၅ သောင်းအထိ ကောက်ခံခဲ့ရာ ယခု တရုတ်နှစ်သစ်ကူးကာလတွင် ဖြတ်သန်းသွားလာခွင့် လွယ်ကူနေကြောင်း ယာဉ်မောင်းများက ပြောသည်။

“စုစုပေါင်း ၄ ဂိတ်ရှိတယ်၊ တစ်ဂိတ်ကို ၃ သောင်း/ ၅ သောင်း အဲ့လိုပေးရတယ်။ ဒီနေ့တော့ ထူးခြားတယ် စေတနာကြေး ဆိုပြီးတော့ ဆိုင်ကယ်ဆိုရင် တစ်စီး ၅ ထောင်၊ ကားဆို ၁ သောင်း အဲ့လိုပေးရတယ်။ ဘယ်ဘက်က ဖွင့်ပေးတယ်လို့တော့ မသိရဘူး၊ လမ်းမကြီးပေါ် နားလည်မှုနဲ့ သွားလာလို့ရတဲ့ သဘော”ဟု ၎င်းယာဉ်မောင်းက သျှမ်းသံတော်ဆင့်ကို ဆက်ပြောသည်။

တရုတ်နိုင်ငံဘက်မှ ဇန်နဝါရီ (၂၀)ရက် သတင်းစာရှင်းလင်းပွဲတွင် ထုတ်ဖော်ပြောကြားခဲ့သည့် စစ်ကောင်စီနှင့် ကိုးကန့်တပ်ဖွဲ့ MNDAA အကြား အပစ်ရပ်သဘောတူညီမှု အသက်ဝင်ပြီးနောက် တရုတ်နှစ်သစ်ကူးကာလ ညီနောင်မဟာမိတ် ထိန်းချုပ်နယ်မြေရှိ ပြည်ထောင်စုလမ်းမကြီးပေါ် ဖြတ်သန်းသွားလာနိုင်ခြင်းဖြစ်သည်။

အလားတူ ကိုးကန့်တပ်ဖွဲ့ MNDAA ထိန်းချုပ်ထားသည့် လားရှိုးမြို့ပေါ်တွင်လည်း တရုတ်နှစ်သစ်ကူးပွဲတော်ကို ၁ လတိတိ ကျင်းပသွားမည့်အပြင် အခြားသော MNDAA ထိန်းချုပ်မြို့များတွင်လည်း ပျော်ပွဲရွှင်ပွဲများ ကျင်းပနေကြောင်း ဒေသခံများက ပြောသည်။

အခြားတစ်ဘက်တွင် ညီနောင်မဟာမိတ်ဖြစ်သည့် TNLA ထိန်းချုပ် နောင်ချိုနှင့် ကျောက်မဲမြို့ဘက်သို့ တရုတ်နှစ်သစ်ကူးမတိုင်မီ စစ်ကောင်စီဘက်မှ လေကြောင်းဖြင့် အပြင်းအထန် ထိုးစစ်ဆင် တိုက်ခိုက်ခဲ့ရာ အရပ်သား အစုလိုက်အပြုံလိုက် သေဆုံးမှုဖြစ်သည်အထိ ဆိုးရွားခဲ့သည်။

စစ်ကောင်စီနှင့် TNLA အကြား အပစ်အခတ် ရပ်စဲနိုင်ရန် တရုတ်နိုင်ငံ၏ ကြားဝင်စေ့စပ်မှုဖြင့် မကြာမီ ထပ်မံတွေ့ဆုံ ဆွေးနွေးနိုင်ကြောင်း နိုင်ငံရေးလေ့လာသုံးသပ် သူများက ပြောဆိုသည်။