သျှမ်းပြည်တောင်ပိုင်း၊ တောင်ကြီးမြို့တွင် စစ်ကောင်စီမှ အမျိုးသမီးများကို စစ်မှုထမ်းစာရင်း စတင်ကောက်ခံနေကြောင်း မြို့ခံများထံမှ သိရသည်။

မြန်မာနိုင်ငံရှိ အမျိုးသမီးများသည် အမျိုးသား နည်းတန်းတူ စစ်မှုထမ်းဆောင်ရန် ဇန်နဝါရီလ မှ စပြီး အမှတ်စဉ် (၁)အတွက် စစ်ကောင်စီ မှ အမျိုးသမီးစစ်မှုထမ်းစာရင်းများ ကောက်ခံနေသည်။

ယခုရက်ပိုင်းအတွင်း တောင်ကြီးမြို့၊ ဖာမွန်ရွာတွင် အသက်(၁၈-၃၅) နှစ်အတွင်း အမျိုးသမီးများ စစ်မှုထမ်းစာရင်း ထွက်ရှိလာသောကြောင့် မိဘများနှင့် စာရင်းတွင် ပါသည့် အမျိုးသမီးများက စိုးရိမ်လျှက်ရှိနေသည်ဟု စစ်မှုထမ်း စာရင်းပါသည့် အမျိုးသမီးတစ်ဉီး၏ မိခင် က သျှမ်းသံတော်ဆင့်ကို ပြောသည်။

“စိုးရိမ်တာပေါ့။ ကိုယ့်သမီးပါသွားရင် ဘယ်မိဘမဆို ဘယ်စိတ်ကောင်းပါ့မလဲ။ အခုလို စာရင်းတွေ ကောက်လာတော့ တွေးပူနေရတယ်။ စစ်မှုထမ်း စာရင်းမပါခင် ရှောင်တိမ်းသင့်ရင် ရှောင်တိမ်းထားတာအကောင်းဆုံးပဲ။” ဟု ၎င်းက ဆိုသည်။

ထို စစ်မှုထမ်းသွားသည့် သူတိုင်း ရှေ့တန်းတွင် အကျဆုံးများသည်ဟု သိရသောကြောင့် ပို၍ စိုးရိမ်နေရကြောင်းနှင့် စာရင်းထဲတွင် သမီးနာမည် မပါရန် အတွက် ဆုတောင်းနေရသည်ဟု ၎င်းက ထပ်လောင်းပြောသည်။

ထို့အပြင် အသက်(၂၀) ဝန်းကျင် တောင်ကြီးမြို့ခံ အမျိုးသမီးတစ်ဦးက ယခုကဲ့သို့ စစ်မှုထမ်းရမည် ဆိုသောကြောင့် စိတ်ဓာတ်ကျမိကြောင်းနှင့် အနာဂတ်တွေပါ ပျောက်ဆုံးနေကြောင်း ပြောသည်။

“ကြားကြားချင်းဘာဖြစ်လဲဆိုတော့ သေချင်စိတ်ပေါက်သွားတယ်။ စိတ်ဓာတ်လည်း ကျတယ်။ စစ်တပ်ရဲ့ ကြိုးဆွဲရာ ကရမှာ ဆိုတော့ မလွယ်ဘူးပေါ့။ စစ်မှုက (၅)နှစ်ထမ်းရမယ်တဲ့။ အသက်အရွယ် တစ်ဝက်က ပညာမသင်ရဘဲ တပ်ထဲမှာ ကုန်သွားလိမ့်မယ်။ စိတ်ညစ်တယ်။” ဟုစစ်မှုထမ်းစာရင်းပါသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ယခုကဲ့သို့ စစ်ကောင်စီမှ အမျိုးသမီးများကို စစ်မှုထမ်းခိုင်းသည်မှာ လူငယ်အမျိုးသားများ နည်းပါးလာသောကြောင့် လူစုရန် အင်အားမရှိသည့်အတွက် အမျိုးသမီးများကို ခေါ်ရကြောင်း တောင်ကြီးဒေသခံ မိဘများက မှတ်ချက်ပြုသည်။

ပြီးခဲ့သည့် ဇန်နဝါရီ ၂၇ရက်တွင် လည်း တောင်ကြီးမြို့ အနောက်မြို့ပတ်လမ်း၊ မီးသွေးတန်းလမ်းဆုံတွင် စစ်ကောင်စီတပ်သားများသည် အရပ်ဝတ်ဖြင့် အသက်(၂၇) နှစ်အရွယ် အမျိုးသားတစ်ဦးကို လာရောက်ဖမ်းဆီး သွားကြောင်း ဖမ်းဆီးခံရသည့် အမျိုးသားနှင့် နီးစပ်သူအမျိုးသား တစ်ဦးက ပြောသည်။

“ မနက်ခင်းကြီး စစ်သားတွေက အရပ်ဝတ်တွေနဲ့ လာဖမ်းသွားတာ။ သူတို့က ငွေညစ်ချင်တာ ။ အဲဒီအမျိုးသားကို သူ့မိဘတွေက သိန်း (၂၀)နဲ့ သွားရွေးထားရတာတဲ့။ခုက နေ့ရော ညရော တောင်ကြီးမှာ မလုံခြုံတော့ဘူး။” ဟု ၎င်း နီးစပ်သူအမျိုးသား တစ်ဦးက ဆိုသည်။

ထို့သို့ တောင်ကြီးမြို့မှာ အမျိုးသားတွေသာမက အမျိုးသမီးများပါ မလုံခြုံတော့သည့် အခြေအနေကြောင့် အသွားအလာ ဂရုစိုက်သင့်ကြောင်း နှင့် တစ်ယောက်တည်း ညရေး၊ ညတာနှင့် ခရီးဝေးမသွားလာသင့်ကြောင်း တောင်ကြီးဒေသခံ မိဘများက ပြောသည်။

ယခုလက်ရှိ တောင်ကြီးမြို့တွင် စစ်ကောင်စီမှ အရပ်ဝတ်ဖြင့် လှည့်လည်စောင့်ကြည့်နေပြီး တောင်ကြီးရပ်ကွက်အလိုက် ပေါ်တာဆွဲမှုများကို လုပ်ဆောင်နေကြောင်း ဒေသခံများ သတင်းပေးပို့ချက် အရသိရသည်။

အလုပ်သင် သတင်းထောက် နန်းလရောင် ရေးသားသည်။