သျှမ်းပြည်တောင်ပိုင်း၊ ကလော-သာစည် လမ်းပိုင်း စစ်ကောင်စီ ကျွဲတပ်ဆုံဂိတ် တွင် စစ်ဆေးမှု တင်းကြပ်နေသောကြောင့် ကားထောင်ချီပိတ်မိနေသည်ဟု ခရီးသွားများထံမှ သိရသည်။
စစ်ကောင်စီတပ်သားများသည် လုံခြုံရေး အကြောင်းပြပြီဂ အိမ်စီးကားနှင့် ကုန်တင်ကားများကို X-Ray စက်ဖြင့် စစ်ဆေးနေပြီး ခရီးသွားများကို လမ်းလျှောက်ဆင်းခိုင်းပြီး အစစ်ဆေးခံရသည်ဟု ကိုယ်တိုင်ကြုံတွေသူ တစ်ဦးက သျှမ်းသံတော်ဆင့်ကို ပြောသည်။
ထိုကဲ့သို့ စစ်ဆေးနေမှုကြောင့် အိမ်စီးကား တစ်စီးကို အနည်းဆုံး (၃)နာရီအထိ ကြာမြင့်ပြီး ကုန်တင်ကားဆိုလျှင် ၂ ရက်မှ ၃ ရက်အထိ အချိန်ကြာြမင့်စွာ စောင့်ဆိုင်း အစစ်ဆေးခံနေရသည်ဟု ကုန်တင်ကား မောင်းနှင်သူ တစ်ဦးက ပြောသည်။
“လက်နက်တွေ ပါလာလား လို့ စစ်ဆေးတာနေမှာပေါ့။ အကြာကြီးစောင့်ခဲ့ရတာ။ ပါလာတဲ့ ကုန်စိမ်းတွေလည်းတချို့ဆို ပုတ်ကုန်တယ်။ ထမင်းတောင်ငတ်တယ်။သျှမ်းပြည်ဘက်က နေ ဆင်းတဲ့ကားဆို ပိုစစ်တယ်။” ဟု ကုန်စည်ပို့ဆောင်သူ အမျိုးသားတစ်ဦးက သျှမ်းသံတော်ဆင့်ကို ပြောသည်။
ယခင်က ကုန်တင်ကားများ ထိုဂိတ်ဖြတ်ရာတွင် အချိန်အနည်းငယ်မျှသာ ပေးရသော်လည်း ယခုကာလတွင် ရက်ပိုင်းမျှ အချိန်ပေး အစစ်ဆေးခံနေရသောကြောင့် ခရီးသွားများအတွက် ပို၍အဆင်မပြေဖြစ်ရကြောင်း ၎င်းအမျိုးသားက ထပ်လောင်း ပြောသည်။
ထို့အပြင် အကြောင်းအမျိုးအမျိုးဖြင့်ကျွဲတပ်ဆုံဂိတ် ကို ဖြတ်ရမည့် ပြည်သူများအနေဖြင့် အထားမခံသည့် ကုန်ပစ္စည်းများ ကို သယ်ဆောင်ရန် မသင့်ကြောင်း ခရီးသွားအမျိုးသားတစ်ဦးက သျှမ်းသံတော်ဆင့်ကို ပြောသည်။
“မဖြစ်မနေ အဲဘက်ကို ခရီးသွားရမယ်ဆိုရင်တော့ အထားမခံတဲ့ ပစ္စည်းတွေကို မယူသွားတာကောင်းတယ်။ ဖုန်းထဲမှာလည်း နိုင်ငံရေးနဲ့ ပတ်သက်တာတွေ ရှင်းထားသင့်တယ်။ တခါတလေ ဖုန်းယူစစ်တတ်တယ်။ သူတို့ကို ကြောက်တဲ့ပုံဆို ပိုခြောက်တယ်။” ဟု အဆိုပါ အမျိုးသားက ဆိုသည်။
ကျွဲတပ်ဆုံဂိတ်သည် သျှမ်းပြည်တောင်ပိုင်း နှင့် မန္တလေးတိုင်းကို ဆက်သွယ်ထားပြီး ကလော-သာစည် လမ်းပိုင်းတွင် တည်ရှိသည်။
ယခုလက်ရှိတွင် ခရီးသွားများအနေဖြင့် စမတ်ကဒ်၊ ရပ်ကွက်ထောက်ခံစာနှင့် မှတ်ပုံတင်များကို စစ်တပ်စစ်ဆေးရေးဂိတ်တိုင်းတွင် ပြပြီးမှ ဖြတ်သန်းနေရသည်ဟု ခရီးသွားများက ပြောသည်။
ဆက်လက်ပြီး တိုက်ပွဲ ဖြစ်ပွားရာနေရာဒေသမှ ပြည်သူများကို ပို၍ စစ်ဆေးနေပြီး ထိုဒေသမှ ပြည်သူများအနေဖြင့် စစ်ကောင်စီကို ငွေအမြောက်အများ လာဘ်ထိုးနိုင်မှသာ ဖြတ်သန်းခွင့် ရသည်ဟု သိရသည်။
အလုပ်သင် သတင်းထောက် နန်းလရောင်ရေးသားသည်။
Leave a Comments