သျှမ်းပြည် နောင်ချိုမြို့ပေါ် ရဲစခန်းအနီး စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် လူစည်ကားရာ ပါရမီ လက်ဖက်ရည်ဆိုင်ပေါ် ကျရောက်ပေါက်ကွဲခဲ့ပြီး အရပ်သား (၈) ဦး သေဆုံးခဲ့ကြောင်း စုံစမ်းသိရသည်။
ယနေ့ (ဇန်နဝါရီ ၂၂ ရက်) နံနက် ၁၁ နာရီကျော်အချိန်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နောင်ချိုမြို့ ဈေးရပ်ကွက် ရဲစခန်းအနီးသို့ စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် ပါရမီ(၂) လက်ဖက်ရည်ဆိုင်သို့ ကျရောက်ပေါက်ကွဲကာ အရပ်သား (၈) ဦး သေဆုံးပြီး အများအပြား ထိခိုက်ဒဏ်ရာရကြောင်း ဒေသခံများက ပြောသည်။
“မနေ့က ထွေအုပ်ရုံးနဲ့ ရဲစခန်းနားပဲ ဗုံးထပ်ကြဲခံရတာ။ ဈေးဒေါင့်က ပါရမီ လက်ဖက်ရည်ဆိုင်ပေါ် ကျတယ်၊ (၇) ယောက်တော့ အလောင်းတွေ့ထားတယ်လို့ သိရတယ်။ မနေ့က ဂျက်ဖိုက်တာနဲ့ ၂ ခါလာကြဲတာ ဗုံးလေးလုံး၊ ဒီနေ့က တစ်ခါတည်း ဗုံးနှစ်လုံး ကြဲသွားတယ်”ဟု နောင်ချိုဒေသခံ အသက်(၅၀) ကျော်အရွယ် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ယခုဗုံးကြဲတိုက်ခိုက်ခံရမှုကြောင့် နောင်ချိုဒေသခံ အမျိုးသမီး (၃) ဦးနှင့် အမျိုးသား (၅) ဦး သေဆုံးပြီး (၁) ဦး ထိခိုက်ဒဏ်ရာရရှိကာ နေအိမ်(၂) လုံး ထိခိုက်ပျက်စီးခဲ့ကြောင်း TNLA သတင်းနှင့် ပြန်ကြားရေးဌာနမှ ထုတ်ပြန်ထားသည်။
ကိုးကန့်တပ်ဖွဲ့ MNDAA နှင့် စစ်ကောင်စီတို့ ဇန်နဝါရီ (၁၈) ရက်မှ စတင်ပြီး တရားဝင် အပစ်အခတ် ရပ်စဲကြောင်း တရုတ်နိုင်ငံဘက်မှ ထုတ်ဖော်ပြောကြားခဲ့ပြီးနောက် ညီနောင်မဟာမိတ်ဖြစ်သည့် TNLA ထိန်းချုပ်နယ်မြေထဲ စစ်ကောင်စီက လေကြောင်းဖြင့် ပြန်လည်ထိုးစစ်ဆင်ကာ TNLA ကို ဖိအားပေးနေကြောင်း နိုင်ငံရေးလေ့လာသုံးသပ်သူများက ပြောဆိုသည်။
“MNDAA လည်း မလွဲမသွေ ဆုတ်ရမယ်ဆိုရင် ကျနော်တို့ လေ့လာသုံးသပ်ချက်အရကတော့ TNLA လည်း BRI လမ်းကြောင်းတကြောမှာ ရှိတဲ့ နောင်ချို၊ ကျောက်မဲ၊ သီပေါတို့ဘက် အဲ့ဒီဟာလည်း မလွဲမသွေ ဆုတ်ရမှာပဲ။ စစ်ရေးနည်းအရ တမျိုးတဖုံ ပြန်လာမလားဆိုတာ စောင့်ကြည့်ရမယ့် အခြေအနေပါ”ဟု သျှမ်းပြည် စစ်ရေး၊ နိုင်ငံရေး ကျွမ်းကျင်သူတစ်ဦးက သုံးသပ်ပြောဆိုသည်။
အလားတူ ယမန်နေ့ (ဇန်နဝါရီ ၂၁ ရက်) မွန်းလွဲပိုင်းတွင် နောင်ချိုမြို့နယ်အတွင်း တိုက်ပွဲဖြစ်ပွားခြင်း မရှိဘဲ တောင်ရပ်ကွက်ရှိ ရဲစခန်းနှင့် ထွေအုပ်ရုံးအပြင် ကုန်းကြီးရွာမဘက် (၂) နေရာ လေကြောင်းဗုံးကြဲတိုက်ခိုက်ခဲ့ခြင်းကြောင့် အမျိုးသမီးတစ်ဦး သေဆုံးပြီး တစ်ဦးထိခိုက်ဒဏ်ရာရရှိခဲ့သည်။
နောင်ချိုမြို့ပေါ် လေကြောင်းဗုံးကြဲခံရမှုကြောင့် လက်ဖက်ရည်ဆိုင်ရှိ လူအစုလိုက်အပြုံလိုက် သေဆုံးမှုမှာ ဒုတိယအကြိမ်ဖြစ်ပြီး ယမန်နှစ် နိုဝင်ဘာလ(၁၂) ရက်ကလည်း ဈေးအနီးရှိ လူစည်ကားရာ လက်ဖက်ရည်ဆိုင်ကို စစ်ကောင်စီတပ်မှ လေကြောင်းဗုံးကြဲ တိုက်ခိုက်ခဲ့ခြင်းကြောင့် ကားဆရာနှင့် ခရီးသည်များ အပါအဝင် ပြည်သူ (၁၁) ဦး သေဆုံးခဲ့ပြီး အများအပြား ထိခိုက်ဒဏ်ရာ ရရှိခဲ့သည်။
Leave a Comments