ရုပ်မြင်သံကြား ထုတ်လွှင့်ရာတွင် အသံနှင့် အရုပ်နှစ်မျိုးရှိရာ အသံနှင့်ပတ်သက်၍ အသံမှန်ရန်လိုသကဲ့သို့ တည်ကြည်သည့် အနေအထားရှိရန်နှင့် ပျော့ပြောင်းသည့် အနေအထားရှိစေရေး သတိထားရန်လိုကြောင်း စစ်ခေါင်းဆောင် မင်းအောင်လှိုင် က စစ်တပ်ပိုင် မြဝတီရုပ်မြင်သံကြား ဝန်ထမ်းများအား ရှင်းလင်း ပြောဆိုလိုက်သည်။

ယမန်နေ့ (ဇန်နဝါရီလ ၂၂ ရက်) က နေပြည်တော်တိုင်း စစ်ဌာနချုပ်၊ တောင်ညိုတပ်နယ်၊ လေ့ကျင့်ရေးသင်တန်း ကျောင်းနှင့် စစ်တပ် ရုပ်မြင်သံကြား ထုတ်လွှင့်ရေးတပ် (မြဝတီရုပ်သံ) သို့ သွားရောက်ရာတွင် မြဝတီ ရုပ်သံ ဝန်ထမ်း စစ်သားများကို အထက်ပါ အတိုင်း ရှင်းပြခဲ့ခြင်း ဖြစ်သည်။

ထို့အပြင် ပြည်တွင်း၊ ပြည်ပ သတင်းဌာနများမှ ထုတ်လွှင့်မှုများကို လေ့လာ၍ အားနည်းချက်၊ အားသာချက်များကို ဖော်ထုတ်ရန် လူကြီး၊ လူငယ် အသက်အရွယ်အလိုက် ကြိုက်နှစ်သက်သည့် အစီအစဉ်များ၊ တေးသီချင်းများ ထုတ် လွှင့်နိုင်ရန် စစ်ခေါင်းဆောင်က ညွှန်ကြားသည်။

ကမ္ဘာကြီးတွင် တွယ်ကျယ်လာသည့် AI စနစ်ကို လေ့လာရန် လိုအပ်ကြောင်း ဆိုသည်။

ထို့အပြင် တောင်ညိုတပ်နယ်၊ လေ့ကျင့်ရေး သင်တန်းကျောင်း ရောက်ရှိစဥ် စစ်ခေါင်းဆောင် မင်းအောင်လှိုင်က စစ်သား တစ်ဦးချင်း ရသင့်ရထိုက်သည့် အခွင့်အရေးများ မှန်မှန်ကန်ကန် ဖြည့်ဆည်းပေးရမည်ဟုလည်း လမ်းညွှန်သည်။

သို့သော် တိုက်ပွဲတွင် ကျဆုံးသည့် စစ်သားများ အတွက် အသက်အာမခံကြေး ပေးလျှော်ရမည့် ၄င်း၏ သား ပိုင်ဆိုင်သည့် အောင်မြင့်မိုရ် အာမခံ လုပ်ငန်းသည် အကြောင်းအမျိုးမျိုးပြ၍ ပေးလျှော်ခြင်းမရှိဟု စစ်တပ် အသိုင်းအဝိုင်းတွင် သတင်းကြီးနေသည်။

ထို့အပြင် စစ်သားများသည် မည်သူ တစ်ဦးတစ်ယောက်၏ တိုက်တွန်းချက်မျှ မပါရှိဘဲ နိုင်ငံတော် ကာကွယ်ရေးနှင့် လုံခြုံရေး တာဝန်များ ထမ်းဆောင်ရန် တပ်တွင်း ဝင်ရောက်ခဲ့ခြင်းဖြစ်ကြောင်း၊ စစ်သား မိသားစုများကလည်း တပ်များတွင် လိုက်လံနေထိုင်၍ ပါရမီဖြည့်လျက်ရှိကြောင်း၊ ထိုကဲ့သို့ လက်ရှိလူဦးရေ ၅၂ သန်းခန့်တွင် လူအနည်းငယ်သာ စစ်သားဘဝ ခံယူ၍ မြင့်မြတ်လှသည့် တာဝန်များ ထမ်းဆောင်နေရသဖြင့် စစ်များ၏ ဘဝကို ဂုဏ်ယူတတ်ရန်နှင့် တာဝန် ကျေပွန်ရန်လိုကြောင်း ၎င်းက စည်းရုံးသည်။

နိုင်ငံတဝှမ်း စစ်သားစုဆေင်းရန် နေ့စဥ်နှင့်အမျှ အဓမ္မ ဖမ်းဆီးမှုများ၊ ဖမ်းဆီးငွေညှစ်မှုများ ရှိနေပြီး တိုက်ပွဲများတွင် ရာပေါင်းများစွာသော စစ်မှုထမ်း လူငယ်များ သေဆုံးနေရသည့် ကိစ္စများကိုမူ ပြောဆိုခြင်း မရှိခဲ့ပေ။

လက်ရှိ နိုင်ငံအနှံအပြား တော်လှန်စစ်ပွဲများ ဖြစ်ပွားနေရာ စစ်ခေါင်းဆောင် မင်းအောင်လှိုင် အနေဖြင့် ခရီးလှည့်လည်ရန် မြို့များစွာ မကျန်ရှိတော့ဘဲ ပြင်ဦးလွင်၊ ရန်ကုန်၊ မန္တလေး၊ တောင်ကြီး စသည့်မြို့များကို လှည့်လည်သွားလာနေရာက ယခုအခါ နေပြည်တော် အတွင်းရှိ တောင်ညိုတပ်နယ်သို့ သွားရောက်ခဲ့ခြင်း ဖြစ်သည်။