ကရင်နီပြည်(ကယားပြည်) လွိုင်ကော်မြို့ စစ်ရှောင်ဒေသခံများ စိုးရိမ်စိတ်ဖြင့် နေအိမ်ကို ပြည်လည် နေထိုင်နေရကြောင်း စုံစမ်းသိရသည်။

လွိုင်ကော်မြို့တွင် “၁၁.၁၁ စစ်ဆင်ရေး”ကြောင့် ပြည်သူများသည် ဘေးလွတ်ကင်းရာ အခြားမြို့များသို့ ပြောင်းရွှေ့နေထိုင်သူ ရှိသကဲ့သို့ တိမ်းရှောင်ရန် ခက်ခဲနေသည့် ပြည်သူများသာ ၎င်းမြို့အနီးတဝိုက်ရှိ တောထဲတွင် တဲထိုးပြီး နေထိုင်နေရကြောင်း စစ်ဘေးရှောင်အမျိုးသမီးက ပြောသည်။

လက်ရှိ လွိုင်ကော်မြို့အနီးတဝိုက်တွင် လက်နက်ကြီး ပစ်ခတ်မှုများလည်း ရှိနေကြောင်း၊ ထို့လက်နက်ကြီးသံကြောင့် ဒေသခံများသည် ညအချိန်တွင် မအိပ်ရဲကြပေ။ ၎င်းနေအိမ်သို့ လက်နက်ကြီး ကျမည်ကို စိုးရိမ်းနေကြောင်း ဒေသခံ အမျိုးသမီးတစ်ဦးက ပြောသည်။

“လွိုင်ကော် တဝိုက်မှာလည်း နေ့တိုင်းညတိုင်း လက်နက်ကြီးတွေ ကြားရတယ်။ ညဆို အိပ်မပျော်ဘူး အိပ်လည်း မအိပ်ရဲဘူး။ ဘယ်ချိန် ကိုယ့်အိမ်ပေါ်ကျမလည်း ဆိုတဲ့စိုးရိမ်စိတ်နဲ့ ကြောက်နေရတယ်။ မဖြစ်မနေလိုသာ ပြန်လာနေရတယ်”ဟု ၎င်းက ပြောသည်။

ထို့အပြင် လွိုင်ကော်မြို့တွင် လူမနေသည့် အိမ်များကို စစ်ကောင်စီမှ ပြည်သူပိုင်အဖြစ် သိမ်းယူမည်ဟု ခြိမ်းခြောက်နေကြောင်း လွိုင်ကော်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ အရင်ကလည်း နေအိမ်ပြန်မလာရင် အိမ်သိမ်းမယ်ပြောလို့ ခုက ပြန်လာနေရတယ်။ ခြိမ်းခြောက်တယ် တမျိုးပြီးတမျိုး။ ကိုယ့်အိမ်ကို ချွေးနဲ့စာနဲ့ ရှာထားရတာ အသိမ်းမခံနိုင်လို့ ပြန်လာနေရတယ်။ လုပ်စားဖို့လည်း အလုပ်အကိုင်က ဘာတစ်ခုမှ အဆင်ပြေဘူး”ဟု ၎င်းက ပြောသည်။

လွိုင်ကော်မြို့မှ စစ်ရှောင်နေသည့် ပြည်သူများကို ပြီးခဲ့သည့် (နိုဝင်ဘာလ တတိယ)အပတ်တွင် လာမည့် ၂၀၂၅ ခုနှစ် မေလတွင် နေရပ်သို့ ပြန်လာရန် အသိပေးပြောဆိုခဲ့သည်ဟု ညောင်ရွှေရောက် စစ်ရှောင်တစ်ဦးက ပြောသည်။

ပြီးခဲ့သည့် (ဇန်နဝါရီလ ပထမ) အပတ်တွင်လည်း လွိုင်ကော်မြို့ အဝင်၊အထွက် သွားလာမည့်သူတိုင်း စစ်ကောင်စီထံ ထောက်ခံစာယူနေရကြောင်း သတင်းရင်းမြစ်များထံ သိရသည်။

အာဏာမသိမ်းမီက အလွန်စည်ကားသော လွိုင်ကော်မြို့သည် အာဏာသိမ်းပြီး “ ၁၁၁၁”စစ်ဆင်ရေး ဆင်နွှဲပြီးနောက်နေအိမ်အများပြားပျက်စီးကာ လူသူကင်းမဲ့သည့် မြို့ပျက်ကြီးသဖွယ် ပြောင်းလဲ သွား ခဲ့သည်။

ယခုလက်ရှိတွင် စစ်ကောင်စီတပ်က လွိုင်ကော်မြို့ကို ထိန်းချုပ်ထားပြီး မြို့အတွင်း စစ်ရှောင်ဦးရေ သုံးပုံ တစ်ပုံမျှသာ ပြန်လည်နေထိုင်နေကြသည်ဟု သိရှိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။