ပြည်သူများ ကျန်းမာရေးနှင့် မညီညွတ်သော အသောက်အစား၊ အစားအသောက်နှင့် အသုံးအစွဲများ လျှော့ချပါက တစ်ဦးချင်းစီ၊ မိသားစု တစ်စုချင်းစီအတွက် သာမက နိုင်ငံ့စီးပွားဖွံ့ဖြိုး တိုးတက်ရေးအတွက် အကျိုးရှိစေနိုင်မည်ဟု စစ်ခေါင်းဆောင် မင်းအောင်လှိုင် က တိုက်တွန်း ပြောဆိုလိုက်သည်။

နေပြည်တော်၌ ယမန်နေ့ (ဇန်နဝါရီလ ၁၇ ရက်) က ကျင်းပသည့် စစ်ကောင်စီ အစည်းအဝေးတွင် ရှည်လျှားလှသည့် မိန့်ခွန်း ပြောကြားရာ စစ်ခေါင်းဆောင်က အထက်ပါ အတိုင်း ထည့်သွင်း ပြောဆိုခဲ့ခြင်း ဖြစ်သည်။

ပြည်သူများ အသုံးအစွဲ လျှော့ချရေးနှင့် ပတ်သက်၍ “အုပ်ချုပ်ရေးပိုင်းဆိုင်ရာ တာဝန်ရှိသူများ အနေဖြင့် ဒေသနှင့် နိုင်ငံ၏ အကျိုးနှင့် ပတ်သက်ပါက ပြောသင့်ပြောထိုက်သည်များကို မဖြစ်မနေ ပြောဆိုရမည်ဖြစ်ကြောင်း” ၎င်းက ပြောဆိုသည်။

လက်ရှိ နိုင်ငံတဝှမ်း စစ်ဘေး၊ စီးပွားရေး ကျဆင်းမှု သာမက လျှပ်စစ်မီး ပြတ်တော်မှုကြောင့်ပါ အထွေထွေ အကျပ်အတည်း ဆိုက်ပြီး ပြည်သူများ ဒုက္ခရောက်နေစဥ် စိုက်ပျိုး မွေးမြူရေး၊ အသေးစားနှင့် အလတ်စား စီးပွားရေး ဖွံ့ဖြိုးတိုးတက်ရေး၊ ကုန်ထုတ်လုပ်မှု တိုးတက်ရေးနှင့် စားရေးရိက္ခာ ပေါများရေး စသည်ဖြင့် များပြားလှသည့် ကိစ္စများ ဆောင်ရွက်ရန် လမ်းညွှန်ခဲ့သည်ကိုလည်း တွေ့ရသည်။

ထို့အပြင် နိုင်ငံ့စီးပွားးရေးနှင့် ကုန်ထုတ်လုပ်မှု တိုးတက်ရေး အတွက် အောင်မြင်မှုမရှိသဖြင့် မည်သည့်နိုင်ငံကမျှ ကျင့်သုံးမှု မရှိတော့သည့် သမဝါယမ စနစ် ကျင့်သုံးရမည်ဟု စစ်ခေါင်းဆောင်က ဆိုသည်။

ရွေးကောက်ပွဲနှင့် ပတ်သက်၍ “ရွေးကောက်ပွဲ ကျင်းပ နိုင်ရေး ကြိုတင်ပြင်ဆင်မှုများ ဆောင်ရွက်ရာတွင် တည်ငြိမ်အေးချမ်းရေးနှင့် တရားဥပဒေစိုးမိုးရေး ဆောင်ရွက်လျက်ရှိကြောင်း၊ ရွေးကောက်ပွဲကျင်း ပနိုင်သည့် အခြေအနေမျိုးဖြစ်ရန် ဖိဖိစီးစီး ဆောင်ရွက်ရန်၊ ပြည်သူ့လွှတ်တော်၊ အမျိုးသားလွှတ်တော်၊ တိုင်းဒေသကြီးနှင့် ပြည်နယ် လွှတ်တော်များတွင် အဆင့်နှင့်အညီ လွှတ်တော်အစည်းအဝေး လုပ်ဆောင်နိုင်စွမ်း ရှိရမည်ဖြစ်ပြီး သိက္ခာရှိသည့်လွှတ်တော်ဖြစ်အောင် ဆောင်ရွက်ရမည်ဟု ပြောသည်။

ယင်းပြောဆိုမှုတွင် “လွှတ်တော် အစည်းအဝေး လုပ်ဆောင်နိုင်စွမ်း ရှိရမည်” ဆိုသည့် ပြောဆိုမှုသည် မည်သည်ကို ရည်ရွယ် ပြောဆိုသည်မူ ရှင်းရှင်းလင်းလင်း ဖော်ပြခြင်း မပြုပေ။

စစ်ခေါင်းဆောင် မင်းအောင်လှိုင် အနေဖြင့် စစ်ကောင်စီ အစည်းအဝေးတွင် စီးပွားရေး၊ ကျန်းမာရေး၊ ပညာရေး၊ စိုက်ပျိုးမွေးမြူရေး၊ လျှပ်စစ် ထုတ်လုပ်ရေး၊ စက်မှု ကုန်ထုတ်လုပ်မှု၊ ရွေးကောက်ပွဲ စသည်ဖြင့် များပြားလှသည့် ကိစ္စများကို ရှည်လျှားစွာ ပြောဆိုခဲ့သော်လည်း လက်ရှိ ဖြစ်ပွားနေသည့် စစ်ပွဲများတွင် စစ်ရှုံးနေသည့် ကိစ္စနှင့် ငြိမ်းချမ်းရေး ဆွေးနွေးမှု အခြေအနေ စသည်တို့ကို ထည့်သွင်းပြောဆိုခြင်း မရှိဘဲ လျစ်လျူရှူခဲ့သည်ကိုလည်း တွေ့ရသည်။

ပြီးခဲ့သည့် သီတင်းပတ် ပြင်ဦးလွင်မြို့၌ လုပ်ငန်းရှင်များနှင့် တွေ့ဆုံစဥ် တည်ဆောက်နေသည့် ဆိုလာ စီမံကိန်းများ ပြီးစီးပါက လျှပ်စစ် အပြည့်အဝရမည်ဟု စစ်ခေါင်းဆောင်က ပြောဆိုခဲ့သေးသည်။