ရွှေနှင့် ဒေါ်လာ အပါအဝင် နိုင်ငံခြားငွေ ရောင်းဝယ်သည် ဆိုသည့် သံသယဖြင့် လူ ၂၆ ဦးကို ဖမ်းဆီး စစ်ဆေးနေရာ လူ ၉ ဦးကို အမှုဖွင့် အရေးယူထားပြီး ၆ ဦးကို တရားစွဲဆိုထားကာ Facebook အကောင့်နှင့် ဂရု ၂၇ ခုကို အရေးယူမည်ဟု စစ်ကောင်စီ လက်အောက်ခံ ဗဟိုဘဏ်က ယမန်နေ့ (ဇန်နဝါရီလ ၁၄ ရက်) တွင် ထုတ်ပြန်သည်။

လအတန်ကြာ ငြိမ်နေသည့် ပြည်တွင်း ရွှေနှင့် ဒေါ်လာစျေး ပြီးခဲ့သည့် သီတင်းပတ်မှ စတင်၍ တဖြေးဖြေး ပြန်လည်မြင့်တက်လာရာ ယမန်နေ့ တစ်ဒေါ်လာ ၄၄၀၀ ဝန်းကျင်မှ ၄၆၀၀ ဝန်းကျင်၊ အခေါက်ရွှေ ဈေးနှုန်း ကျပ်သိန်း ၆၀ ကျော်မှ ကျပ် ၆၅ သိန်း ၂ သောင်းအထိ အထိ မြင့်တက်လပြီးနောက် ယခုကဲ့သို့ ဖမ်းဆီးသည့် ထုတ်ပြန်ချက် ထွက်ပေါ်လာခြင်း ဖြစ်သည်။

“နိုင်ငံတကာ ရွှေဈေးကလည်း တက်နေတယ်။ တိုင်းပြည် စစ်ဖြစ်နေတာက ပိုဆိုးလာတယ်။ အဲတော့ ရွှေပြန်ကိုင်ကြတဲ့ သဘောပါပဲ။ ခုရက်ပိုင်း လက်ငင်းဝယ်တာ များလာတယ်။ အရင်လို ဈေးထိုးတက်တာမျိုးတော့ ဖြစ်မယ်မထင်ဘူး။ တဖြည်းဖြည်း ဆက်တက်မယ်ထင်တာပဲ။ သင်္ကြန်ကာလ မတိုင်ခင်အထိ ဆွဲတက်သွားမယ် ထင်တယ်” ဟု ရန်ကုန် အခြေစိုက် ဝါရင့် ရွှေကုန်သည် တဦးက ပြောသည်။

ယခင်ကာလများကလည်း ရွှေနှင့် ဒေါ်လာဈေးတက်တိုင်း ကုန်သည်နှင့် လူမှုကွန်ရက် အသုံးပြု ရောင်းဝယ်သူများကို ဖမ်းဆီးလေ့ရှိသည့် စစ်ကောင်စီသည် ယခုအခါ Facebook ဂရု ၁၂ ခု၊ Facebook ပေ့ ၅ ခုနှင့် လူပုဂ္ဂိုလ် အကောင့် ၁၀ ခုတို့ကို အရေးယူမည်ဟု ထုတ်ပြန်ချက်တွင် ဖော်ပြသည်။

ထို့အပြင် လိုင်စင်ရ ငွေလဲ ကောင်တာများကို စစ်ဆေးမည်ဖြစ်ပြီး တရားမဝင် ငွေလွှဲလုပ်ငန်း လုပ်ကိုင်သည်ဟု ကျော်ဇောသူများနှင့် လုပ်ကိုင်သူများကို ဖမ်းဆီး စစ်ဆေး အရေးယူမည်ဟု ထုတ်ပြန်ချက်က ဆိုသည်။

ယမန်နေ့ (ဇန်နဝါရီ ၁၄ ရက်) နံနက်ပိုင်း ပြင်ပ စျေးကွက်၌ အခေါက်ရွှေဈေး တစ်ကျပ်သား ၆၅ သိန်းကျော် ရှိခဲ့ပြီး တစ်ဒေါ်လာ ကျပ် ၄,၆၀၀ ကျော် ဖြစ်ခဲ့သည်။

ပြီးခဲ့သည့် ဇန်နဝါရီလ ၁ ရက်နေ့က ပြင်ပ အခေါက်ရွှေဈေး တစ်ကျပ်သား ကျပ်သိန်း ၆၀ ကျော်ဝန်းကျင်နှင့် တစ်ဒေါ်လာ ကျပ် ၄,၄၄၀ ဝန်းကျင်သာ ရှိခဲ့ကြောင်း သိရသည်။

ပြီးခဲ့သည့်နှစ် သြဂုတ်လက တစ်ဒေါ်လာ ကျပ် ၇,၀၀၀ ကျော်အထိ ဈေးမြင့်တက်ခဲ့ပြီးနောက် အရောင်းအဝယ် သမားများကို ဖမ်းဆီးခံရပြီး ငွေလဲကောင်တာ ၁၉၄ ခု လုပ်ငန်း လိုင်စင် ပိတ်သိမ်းခံခဲ့ရသည်။

ယခုနှစ် ဆန်းပိုင်းကစ၍ ပို့ကုန်၊ သွင်းကုန် အခွန်နှုန်းကို ယခင် သတ်မှတ်ထားသည့် တစ်ဒေါ်လာ ၂,၁၀၀ကျပ် အစား တစ်ဒေါ်လာ ၃,၅၈၀ ကျပ်ဖြင့် ကောက်ခံမည်ဟု စစ်ကောင်စီက ကြေညာထားသည်။