သျှမ်းပြည်တောင်ပိုင်း ညောင်ရွှေမြို့နယ်အတွင်း ခုတ်ပြီးသားကြံပင်များအား မီးရှို့ခွင့်မပြုသည့်အတွက် ကြံစိုက်တောင်သူများ နောက်တကြိမ်စိုက်ပျိုးရန် စိုးရိမ်မှုများရှိနေကြောင်း ဒေသခံများထံမှ စုံစမ်းသိရှိရသည်။

ဇန်နဝါရီလ ပထမပတ်အတွင်း ညောင်ရွှေမြို့နယ်အတွင်းရှိ ကြံပင်စိုက်ပျိုးသည့် ကျေးရွာများမှ ကြံစိုက်တောင်သူများအား ခုတ်ပြီးသားကြံပင်များအား မီးရှို့ခြင်းမပြုလုပ်ရန် မြို့နယ်အထွေထွေ အုပ်ချုပ်ရေးဦးစီးဌာနမှ ခေါ်ယူသတိပေးစာထုတ်ထားကြောင်း လိုက်နာခြင်းမရှိပါက အရေးယူခံရမည်ဟု သတိပေးထားကြောင်း သိရသည်။

“မီးမရှို့ခိုင်းတဲ့အချက်ထဲမှာ ရှို့လိုက်တဲ့ မီးခိုးတွေ ထိုင်းကိုရောက်သွားတာကြောင့်လို့လည်းပါတယ်၊ ၊ ခုတ်ပြီးသားကြံတွေကိုမီးမရှို့ပဲထားရင် နောက်စိုက်ဖို့လည်းခက်တယ်၊ ကြံပင်ထွက်လာရင် အပင်မကောင်းတော့ဘူး” ဟု ကြံစိုက်တောင်သူတစ်ဦးမှ သျှမ်းသံတော်ဆင့်သို့ပြောသည်။

မိုးကုန်ပြီးကာလမှ မတ်လအထိသည် ကြံခုတ်သည့်ကာလဖြစ်ပြီး ခုတ်ပြီးသားကြံများအား မီးရှို့ခြင်းဖြင့် နောက်တကြိမ်ထပ်မံစိုက်ပျိုးရန် မြေများကိုရှင်းလင်းလေ့ရှိကြသည်။

ထိုသို့မီးရှို့ခြင်းသည် သဘာဝပတ်ဝန်းကျင်အား ထိခိုက်နိုင်သည့်အတွက် ယခုကဲ့သို့ မီးမရှို့ခိုင်းခြင်းဖြစ်ကြောင်း လည်း သိရသည်။

“မီးလုံးဝမရှို့ရဘူးလို့သတိပေးထားတယ်၊ ခုကြံစိုက်တဲ့သူတွေ တစ်ယောက်မှ မီးမရှို့ရဲသေးဘူး၊ ကြံပင်တွေလည်း ခုတ်လက်စပဲရှိသေးတာ၊ ရှို့ချင်ရင်တော့ တစ်ဧက ဘယ်လောက်ဆိုပြီး ငွေကောက်မယ်လို့ကြားတယ်၊ ဘယ်လောက်ကောက်မယ်ဆိုတာတော့ မသိရသေးဘူး” ဟု မြို့ခံတစ်ဦးကပြောသည်။

ညောင်ရွှေမြို့နယ်အတွင်း ကြံစိုက်ပျိုးသည့် တောင်သူများစွာရှိပြီး ကြံများခုတ်ပြီးပါက မီးရှို့ခြင်းဖြင့်သာ ခြံများကို ကုန်ကျစားရိတ်သက်သက်သာသာဖြင့် ရှင်းလင်းကြပြီး အခြားနည်းလမ်းများအား အသုံးပြုရန်ခက်ခဲကြောင်း တောင်သူများကပြောသည်။

ပြီးခဲ့သည့်၂၀၂၄ ခုနှစ် အောက်တိုဘာလအတွင်း ထိုင်းနိုင်ငံတွင်ပြုလုပ်ခဲ့သည့် “မြူကင်းစင်သော ကောင်းကင်” စီမံချက်ထုတ်ပြန်ကြေညာပြီးနောက် မြန်မာ-ထိုင်း-လာအို (၃) နိုင်ငံနယ်စပ်ဖြတ်ကျော် မီးခိုးမြူပြဿနာအား ပူးပေါင်းဖြေရှင်းရန်အတွက် စစ်ကောင်စီမှ တောင်ယာမီးရှို့မှုများကို တားဆီးလာခြင်းဖြစ်နိုင်ကြောင်းလည်း သိရသည်။

အလုပ်သင် သတင်းထောက် ယူဂျင်း ရေးသားသည်။