ကချင်ပြည် ဖားကန့်မြို့နယ် စပေါ့ကျေးရွာ နွံကန်ပေါက်ကျမှုကြောင့် သေဆုံးမှု နှင့် ပျောက်ဆုံးမှုများ ရှိနေသည့်အပြင် စစ်ကောင်စီဗုံး၏ လေကြောင်းဗုံးကြဲမှုကြောင့်  သေဆုံးသူ ၁၀ ဦးထက်မနည်းရှိနေကြောင်း သိရသည်။

ဖားကန့်မြို့နယ် ဆိပ်မူကျေးရွာအုပ်စု၊ စပေါ့ကျေးရွာ  ယနေ့ (ဇန်နဝါရီလ ၁၃ ရက် ) နံနက် ၁ နာရီခန့်တွင် နွံကန်ပေါက်ကျမှုကြောင့် လက်ရှိတွင် သေဆုံးသူ ၁၂ ဦးထိ တွေ့ရှိထားပြီး ၊ နေအိမ်များစွာလည်း ပျက်စီးခဲ့ရကြောင်း ဖားကန့်မြို့ ဒေသခံအမျိုးသားတစ်ဦးက သျှမ်းပြည်သံတော်ဆင့်ကို ပြောသည်။ 

“မြေပြိုတာမဟုတ်ဘူး။ နွံကန်ပေါက်‌တာ အရင်တုန်းက သူတို့ကျောက်တွေရှာတဲ့ ကန် အဲ့ကန် ပေါက်ကျ တာပေါ့။အခုကတော့ လူပျောက် တာကများတယ်။တချို့ကလည်း ရာချီတယ်လို့ပြောတယ် အတည်ပြုလို့တော့ မရသေးဘူး။အခုလက်ရှိတော့ အလောင်းကတော့ ၁၂ ယောက်လောက်ပဲ တွေ့အုံး မယ်။အိမ်ကတော့ ၅၀ ကျော်တယ်”ဟု ဖားကန့်မြို့ ဒေသခံအမျိုးသားတစ်ဦးက ပြောသည်။ 

အလားတူ ဖားကန့်မြို့နယ် ဆန်ခါနဲ့ မဇွပ်ယန်းကျေးရွာတွင် ယနေ့ (ဇန်နဝါရီလ ၁၃ ရက်) နံနက် ၁၀ နာရီခွဲ ဝန်းကျင်တွင် စစ်ကောင်စီမှ ဂျက်လေယာဉ်ဖြင့် လူစုလူဝေးလုပ်သည့်နေရာကို  ပစ်မှတ်ထား ဗုံးကြဲတိုက်ခိုက် မှုကြောင့် သေဆုံးမှုများရှိနေကြောင်း ဖားကန့်မြို့နယ်ဒေသခံအမျိုးသားတစ်ဦး ထပ်မံလောင်းပြောသည်။

“လေကြောင်းဗုံးကြဲတိုက်ခိုက်ခံရတဲ့ဟာက  ၅ ဦးသေဆုံးပြီးတော့ ၁၀ ဦးလောက်က ဒဏ်ရာရထားတယ်လို့တော့ သိထား ရတယ်။အဲ့ထက်လည်းများနိုင်မယ်။မှော်စီဆာ ဆန်ခါမှော်ဘက်က ရေမဆေးသမားကျောက် ရှာ တဲ့ လူတွေလည်း ပါသွားတယ်။”ဟု ဖားကန့်မြို့နယ်ဒေသခံအမျိုးသားတစ်ဦးက ပြောသည်။ 

ထို နွံကန်ပေါက်ကျမှုကြောင့် ပျောက်ဆုံးနေသူများကို လူမှုကူညီရေးအသင်းများ နှင့် ကုမ္ပဏီအဖွဲ့များက ပူပေါင်း၍ ဆက်လက်ရှာဖွေနေကြပြီး ဗုံးကြဲတိုက်ခိုက်ခံရသည့် နေရာသည်လည်း နွံပေါက်ကျသည့် နေရာနှင့်သာ အနည်းငယ်အလှမ်းဝေး‌ကြောင်း ဒေသခံများက ပြောသည်။