သျှမ်းပြည်တောင်ပိုင်း နှင့် ဗမာပြည်အောက်ပိုင်းပြည်မအထိ တော်လှန်ရေးတပ်ဖွဲ့အင်အားစုများနှင့်အတူတူ တိုက်ပွဲတွင် ပါဝင်သွားမည်ဟု ဓနုပြည်သူ့လွတ်မြောက်ရေးတပ်ဖွဲ့ DPLF/DPLA ထံစုံစမ်းသိရှိရသည်။
ပြီးခဲ့သည့် ဇန်နဝါရီ ၄ ရက်မှစ၍ ဇန်နဝါရီ ၇ ရက် အထိ သျှမ်းပြည် တောင်ပိုင်း ရပ်စောက်မြို့နယ် ကျောက်ဂူဒေသ ၊ အင်တောမြို့များတွင် စစ်ကောင်စီ နှင့် DPLA တို့၏ စစ်ရေးတင်းမာနေလျက်ရှိကြောင်း DPLF/DPLA ဥက္ကဌ ကိုထွန်းထွန်းနိုင်က သျှမ်းသံတော်ဆင့်ကို ပြောသည်။
“ ကျနော်တို့ ကျောက်ဂူဘက်မှာ တိုက်ပွဲစဖော်ကတည်းက ဒီချိန်ထိတော့ စစ်ရေးတွေတင်းမာနေဆဲရှိပါတယ်။ တိုက်ပွဲကတော့ အမြဲမဖြစ်ဘူး။ ရံဖန်ရံခါဖြစ်နေပါတယ်။ လက်ရှိကတော့ ကျနော်တို့လည်း နောင်ချို တောင်ခမ်းတိုက်ပွဲ ၊ ကျောက်ဂူအင်တောတိုက်ပွဲ ၊ အဲဒီ ၂ ခုကိုပဲ တိုက်ပွဲဖော်ဆောင်နေတာပဲရှိပါသေးတယ်” ဟု DPLF/DPLA ဥက္ကဌ ကိုထွန်းထွန်းနိုင်ကပြောသည်။
ထိုအပြင် ဓနုပြည်သူ့လွတ်မြောက်ရေးတပ်ဖွဲ့အနေဖြင့် ဓနုဒေသအပြင် မြန်မာပြည်မအထိ တော်လှန်ရေးတပ်ပေါင်းစုများနှင့် ပူးပေါင်းကာ တိုက်ပွဲပါဝင်သွားမည်ဟု ပြောသည်။
“ ကျနော်တို့ကတော့ ဓနုဒေသမှရယ်တော့မဟုတ်ဘူး။ သျှမ်းတောင်ဒေသ ၊ ဓနုဒေသ ၊ ဗမာပြည်အောက်ပိုင်း ပြည်ထိလည်း ကျနော်တို့တော်လှန်ရေးတပ်ပေါင်းစုတွေနဲ့အတူတူ တိုက်ပွဲဝင်ဖို့ရှိပါတယ်” ဟု ကိုထွန်းထွန်းနိုင်က ပြောသည်။
လက်ရှိ တိုက်ပွဲဖြစ်ပွားနေသည့် ကျောက်ဂူ – အင်တောဘက်မှာ DPLA တပ်ဖွဲ့တစ်ခုသာ စစ်ကောင်စီ နှင့် တိုက်ခိုက်နေပြီ တစ်ခြားမဟာမိတ်တပ်ဖွဲ့နှင့် ပူးပေါင်းဆောင်ရွက်တိုက်ခိုက်နေခြင်းမရှိကြောင်း ကိုထွန်းထွန်းနိုင်က ဆက်ပြောသည်။
DPLAသည်လက်ရှိသျှမ်းပြည်အတွင်း တိုက်ပွဲဖော်ဆောင်နေပြီ “၁၀၂၇ စစ်ဆင်ရေး” တွင်လည်း တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) နှင့်အတူ သီပေါ ၊ နောင်ချိုဘက် တိုက်ပွဲမှာ ပါဝင်တိုက်ခိုက်ခဲ့ကြောင်း သိရသည်။
သျှမ်းပြည်ရပ်စောက်မြို့နယ်အတွင်းကို DPLA က ဇန်နဝါရီ ၄ ရက်ကစပြီ တိုက်ပွဲဖော်ဆောင်ခဲ့ပြီ ယနေ့အထိ တင်းမာနေလျက်ရှိကြောင်းသိရသည်။
ထိုတိုက်ပွဲကာလအတွင်းမှာ DPLA မှ စစ်ကောင်စီ၏ ဒရုန်း ၁ စီးကို သိမ်းယူနိုင်ခဲ့ကြောင်း သိရသည်။
ရပ်စောက်မြို့နယ်သည် သျှမ်းပြည်မြောက်ပိုင်းနှင့် သျှမ်းပြည် တောင်ပိုင်းအကြား ချိတ်ဆက်ထားသည့် အချက်အချာ နေရာတွင် တည်ရှိပြီး စစ်ကောင်စီတပ်၏ ဗိုလ်သင်တန်း လေ့ကျင့်ရေးကျောင်းများနှင့် ခြေလျင် တိုက်ခိုက်ရေးတပ်များ အခြေစိုက်သည့် ဗထူးတပ်မြို့လည်း တည်ရှိသည်။
Leave a Comments