သျှမ်းပြည်တောင်ပိုင်း ရပ်စောက်မြို့ စစ်ကောင်စီတပ်သည် သျှမ်းတောင်မှ သျှမ်းမြောက်သို့ တက်မည့် ကုန်ကားကြီးများကို ငွေကြေးဆောင်နိုင်မှသာ ဖြတ်သန်းခွင့်ပြုကြောင်း စုံစမ်းသိရသည်။
ပြီးခဲ့သည့် ၂၀၂၄ ခုနှစ် (စက်တင်ဘာလ)တွင် စတင်၍ ရပ်စောက်မြို့နယ်အတွင်းရှိ စစ်ကောင်စီဂိတ်များတွင် သျှမ်းတောင်မှ သျှမ်းမြောက်သို့ သွားမည် ခရီးသည်လိုင်းကားများ၊ ကုန်တင်ယာဉ်များကို စတင်ပိတ်ပင်ရာ ယနေ့ (ဇန်နဝါရီလ ၆ )ရက်၌ ၄ လနီးပါး ရှိပြီ ဖြစ်ကြောင်း ၎င်းလမ်းကို အသုံးပြုသည့် ကားသမားများက ပြောသည်။
အဆိုပါ ဂိတ်ကိုဖြတ်လိုသည့် ကုန်တင်ကားများ၊ ခရီးသည်တင်ယာဉ်များသည် စစ်ကောင်စီတပ်မှ တောင်းသည့် ငွေပမာဏပေးနိုင်မှသာ သွားခွင့်ပြုပြီး စစ်ဆေးရေးလည်း ယခင်ကထက် ပိုတင်းကြပ်နေကြောင်း ၎င်းလမ်းကြောင်းကို အသုံးပြုသည့် ကားသမားတစ်ဉီးက သျှမ်းသံတော်ဆင့်ကိုပြောသည်။
“ပိတ်တာတော့ တော်တော်ကြာနေပြီ ၄ လတောင်ရှိပြီ။ ကုန်တင်ကားမဟုတ်ဘဲ ဒီတိုင်းရိုးရိုး ဒီဘက်မြို့နဲ့ ဟိုဘက်ဆိုရင်တော့ ပိုက်ဆံထိုးပေးရင်ပေးဖြတ်တယ်။ အဓိက လိုင်းကားတွေ ကုန်ကားကြီးတွေဆို လုံးဝပေးမဖြတ်ဘူး။ ဖြတ်ချင်ရင်တော့ သူတို့တောင်းတဲ့ ငွေပမာဏပေးနိုင်ရင်တော့ ပေးဖြတ်တယ်၊ တချို့ဆို သိန်း (၁၀)လောက်ထိပေးရတဲ့သူလည်းရှိတယ်”ဟု ၎င်းက ပြောသည်။
ပြီးခဲ့သည့် ဒီဇင်ဘာလ နောက်ဆုံးပတ်မှ စတင်ပြီး ရပ်စောက်မြို့နယ်အတွင်းရှိ ကျောက်ဂူကျေးရွာဘက်တွင် စစ်ကောင်စီတပ်နှင့် ဓနုပြည်သူ့လွတ်မြောက်ရေးတပ် DPLA တို့ တိုက်ပွဲဖြစ်ပွားနေစဉ် သျှမ်းတပ်နှစ်တပ်လည်း အင်တောမြို့အနီး (၃) နေရာတွင် ထိတွေ့တိုက်ပွဲ ပြင်းထန်ခဲ့ကြောင်း သိရသည်။
ထို့အပြင် ရပ်စောက်မြို့အနီး၊ ကျောက်ဂူရွာတွင် ဓနုပြည်သူ့လွတ်မြောက်ရေး တပ်မတော်(DPLA)နှင့် စစ်ကောင်စီတပ် ပြီးခဲ့သည့် (ဒီဇင်ဘာလ ၁၈)ရက် တိုက်ပွဲပြင်းထန်ပြီး နေအိမ်များ ထိခိုက်ပျက်စီးသွားကာ ထမင်းပေါင်းရွာမှ အရပ်သား (၁) ဦး သေဆုံးခဲ့ကြောင်းသိရသည်။
၎င်းတိုက်ပွဲမှ စစ်ရှောင်သွားသည့် ဒေသခံများသည် ယခင် နေရပ်သို့ ပြန်နေထိုင်ရန် ရပ်ကွက်လူကြီး ထောက်ခံစာပါမှသာ ပြန်လည်နေထိုင်ခွင့်ပြုသည်ဟု စစ်ရှောင်အမျိုးသားတစ်ဦးက ပြောသည်။
“ကျောက်ဂူကနေ စစ်ရှောင်သွားတဲ့ စစ်ရှောင်တွေဆိုလည်း လူကြီးထောက်ခံစာပါမှ ပေးဝင်တာ။ ကိုယ့်အိမ်ပြန်တာတောင် သူတို့ထောက်ခံချက်ပါမှ ပေးဝင်တာ မဖြစ်သင့်ဘူး။ ကျနော်တို့လည်း ဝမ်းစာအတွက် ရုန်းကန်နေရသူတွေ အိမ်ကို ပြန်နေချင်ကြတယ်။ မပါရင် ဗထူးဂိတ်က ပေးမဖြတ်ဘူး။ ၁၃မျဉ်းစောင်းဆိုလည်း ခုထိ ပေးမဖြတ်သေးဘူး”ဟု ၎င်းက ပြောသည်။
ရပ်စောက်မြို့နယ်သည် သျှမ်းပြည်မြောက်ပိုင်းနှင့် တောင်ပိုင်းအကြား ချိတ်ဆက်ထားသည့် အချက်အချာ နေရာတွင် တည်ရှိပြီး စစ်ကောင်စီတပ်၏ ဗိုလ်သင်တန်း လေ့ကျင့်ရေးကျောင်းများနှင့် ခြေလျင် တိုက်ခိုက်ရေးတပ်များ အခြေစိုက်သည့် ဗထူးတပ်မြို့လည်း တည်ရှိသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments