ခွင့်ပြချက်ရယူခြင်း မရှိဘဲ ဗီပီအန် (VPN) ထူတောင်ခြင်း (သို့မဟုတ်) ဝန်ဆောင်မှု ပေးခြင်းနှင့် အွန်လိုင်းလောင်းကစားစနစ် တည်ဆောက်ခြင်း ပြုလုပ်ပါက ထောင်ဒဏ်နှင့် ငွေဒဏ်များ ချမှတ်နိုင်မည့် ဆိုက်ဘာလုံခြုံရေးဥပဒေကို စစ်ကောင်စီက ဇန်နဝါရီလ ၁ ရက်တွင် ပြဋ္ဌာန်းလိုက်သည်။

အီလက်ထရောနစ် နည်းပညာအသုံးပြုပြီး ဆိုက်ဘာတိုက်ခိုက်ခြင်းကြောင့် နိုင်ငံအချုပ်အခြာအာဏာနှင့် တည်ငြိမ်းအေးချမ်းမှုကို ထိခိုက်စေခြင်းမှ ကာကွယ်ရန်၊ ဆိုက်ဘာမူခင်းများကို ထိရောက်စွာ စုံစမ်းဖော်ထုတ် အရေးယူနိုင်ရန် ပြဋ္ဌာန်းလိုက်ခြင်းဖြစ်ကြောင်း ဆိုသည်။

“တကယ်တော့ ဆိုက်ဘာလုံခြုံရေးနဲ့ ပတ်သက်တယ်ဆိုပြီး ဥပဒေဆိုတာက စကစဘက်က ရေးဆွဲခဲ့တာမဟုတ်ဘူး။ အရင် NLD လက်ထပ်ကတည်းက ဆိုက်ဘာလုံခြုံရေးဆိုပြီး ရေးဆွဲခဲ့ကြတယ်။ အဓိက အွန်လိုင်းပေါ်ကနေပြီးတော့ အမုန်းစကားပြောတာတွေ၊ Attack (တိုက်ခိုက်) လုပ်ခံရတာတွေ ကာကွယ်အောင်လို့သာ ပြောပေမဲ့ သတင်းအချက်လက် ထုတ်ဖော်ပြောဆိုခွင့်တွေ၊ VPN သုံးတဲ့သူတွေကို ပြန်ပြီးထိန်းချုပ်ဖို့ လုပ်နေတဲ့သဘောပါပဲ” ဟု ဆိုက်ဘာနည်းပညာနှင့်ပတ်သက်ပြီး ကျွမ်းကျင်သူ အမျိုးသမီးတစ်ဦးက ပြောသည်။

ထိုဥပဒေအရ မည်သူမဆို ဝန်ကြီးဌာန၏ ခွင့်ပြုချက်ကို ရယူခြင်းမရှိဘဲ VPN ကို ထူထောင်ခြင်း (သို့မဟုတ်) VPN ဝန်ဆောင်မှုပေးခြင်း ပြုလုပ်ကြောင်း ပြစ်မှုထင်ရှားစီရင်ခြင်းခံရလျှင် အနည်းဆုံး ထောင်ဒဏ် ၁ လမှ ၆ လအထိဖြစ်စေ၊ အနည်းဆုံးကျပ် ၁၀ သိန်းမှ အများဆုံးကျပ်သိန်း ၁၀၀ ထက်မပိုသော ငွေဒဏ်ဖြစ်စေ၊ ဒဏ်နှစ်လုံးဖြစ်စေ ချမှတ်မည့်အပြင် အမှုနှင့်သက်ဆိုင်သော သက်သေခံပစ္စည်းများအား နိုင်ငံဘဏ္ဍာအဖြစ်သိမ်းဆည်းရမည်ဟု ဖော်ပြထားသည်။

ထို့ပြင် ကျူးလွန်သူသည် ကုမ္ပဏီ (သို့မဟုတ်) အဖွဲ့အစည်းဖြစ်ပါက ကျပ်သိန်း ၁၀၀ အောက် မနည်းသော ငွေဒဏ်ချမှတ်ရမည့်အပြင် သက်သေခံ ပစ္စည်းများအား နိုင်ငံဏ္ဍာအဖြစ် သိမ်းဆည်းရမည်ဟုလည်း ဆိုထားသည်။

“အဓိက သူတို့ဘာတွေ လုပ်လို့ရနိုင်လဲ၊ အရင်တုန်းကဆို ၆၆ ဃ ပြောသလိုမျိုး လုပ်တာပဲနော်။ ဒါပေမဲ့အခုဥပဒေထုတ်လာပြီဆိုရင် ပိုတောင်မှ ပိုဆိုးသွားပြီပေါ့နော်။ အဓိက လူတွေကို ပိုပြီးတော့ ကြပ်လိုက်တဲ့သဘောပါပဲ။ အရင်တုန်းက ဒီတိုင်းဖမ်းတယ်၊ အခုက ဥပဒေနဲ့ ဖမ်းမယ် ဒါပါပဲ” ဟု အထက်ပါ အမျိုးသမီးတစ်ဦးက ထပ်လောင်းပြောသည်။

ထို့အတူ ခွင့်ပြုချက်မရှိဘဲ အွန်လိုင်းလောင်းကစားစနစ် တည်ဆောက်ပါကလည်း အနည်းဆုံး ၆ လမှ အများဆုံး၁ နှစ်အထိ ထောင်ဒဏ် ဖြစ်စေ၊ အနည်းဆုံး သိန်း ၅၀ မှ အများဆုံး ကျပ်သိန်း ၂၀၀ ထက်မပိုသော ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်ရမည့်အပြင် သက်သေခံပစ္စည်းများအား နိုင်ငံ့ဘဏ္ဍာအဖြစ်သိမ်းဆည်းပြီး ကုမ္ပဏီ (သို့မဟုတ်) အဖွဲ့အစည်းဖြစ်ပါက ကျပ်သိန်း ၂၀၀ အောက်မနည်းသော ငွေဒဏ်ချမှတ်၍ သက်သေခံပစ္စည်းများ နိုင်ငံ့ဘဏ္ဍာအဖြစ်သိမ်းဆည်းမည်ဟုလည်း ဆိုထားသည်။

မည်သူမဆို မရိုးမဖြောင့်သောသဘောဖြင့် ဆိုက်ဘာအရင်းအမြစ်ကိုအသုံးပြု၍ အခြားသူ၏ အွန်လိုင်းငွေကြေး တရပ်ရပ်အား ခိုးယူခြင်း (သို့မဟုတ်) အကျိုးဖျက်ဆီးခြင်းကို ကျူးလွန်ကြောင်း (သို့မဟုတ်) အခြားသူတဦးဦးကို ပြုလုပ်ရန်ခိုင်းစေကြောင်း ပြစ်မှုထင်ရှားစီရင်ခြင်းခံရလျှင် ထိုသူကို အနည်းဆုံး နှစ်နှစ်မှ အများဆုံး ခုနှစ်နှစ်အထိ ထောင်ဒဏ်ချမှတ်ရမည့်အပြင် ငွေဒဏ်လည်းချမှတ်နိုင်ကြောင်း ပြဋ္ဌာန်းထားသည်။

ပြီးခဲ့သည့် ၂၀၂၃ ဇူလိုင်တွင်လည်း စစ်ကောင်စီသည် အွန်လိုင်းစနစ်ဖြင့် ရောင်းချခြင်း လုပ်ငန်းနှင့် ပတ်သက်၍ ၆ လအတွင်း မှတ်ပုံမတင်ဘဲ ရောင်းချပါက ထောင်ဒဏ် ၆ လမှ အများဆုံး ထောင်ဒဏ် ၃ နှစ်အထိ ချမှတ်ရမည့်အပြင် ကျပ် ၅ သိန်းထက်မပိုသော ငွေဒဏ်လည်း ချမှတ်မည်ဖြစ်ကြောင်း ထုတ်ပြန်ခဲ့သည်။