သျှမ်းပြည်အရှေ့ပိုင်း တာချီလိတ်မြို့နယ်တွင် ကျင်းပပြုလုပ်မည့် မိုင်းဖုန်းဆရာတော်၏ မွေးနေ့မင်္ဂလာပွဲတော်သို့ လာရောက် ဖူးမျှော် ပူဇော်ကြမည့် မိဘပြည်သူများ ထောက်ခံစာ ယူလာကြရန် သတိပေးထားကြောင်း သတင်းရရှိသည်။

ဇန်နဝါရီလ ၁ ရက်မှ ၅ ရက်နေ့အထိ တာချီလိတ်မြို့နယ်တွင် ကျင်းပမည့် မိုင်းဖုန်းဆရာတော် အရှင်ဉာဏသံဝရ၏ ဝိဇာတပူဇာ မွေးနေ့မင်္ဂလာပွဲတော်ကို လာရောက်ဖူးမျှော် ပူဇော်ကြမည့် ဒကာ၊ ဒကာမ မိဘပြည်သူများ ထောက်ခံစာ ယူလာကြရန် သတိပေးထားပြီး၊ စစ်ဆေးရေးဂိတ်ရှိ သက်ဆိုင်ရာ တာဝန်ရှိသူများကို ခွင့်ပြုပေးရန် ပန်ကြားထားကြောင်း သျှမ်းပြည်အရှေ့ပိုင်း သံဃာ့နာယက ဥက္ကဋ္ဌ အရှင်ဉာဏသီရိမှ သျှမ်းသံတော်ဆင့်ကို မိန့်ကြားသည်။

“အထူးအားဖြင့် တာဝန်ရှိတဲ့ ဌာနဆိုင်ရာတွေကို သျှမ်းပြည်အရှေ့ပိုင်း သံလွင်မြစ်ကို ဖြတ်ကျော်ပြီး မိုင်းဖုန်းဆရာတော်ဘုရား မွေးနေ့ပွဲကို လာရောက် ဖူးမျှော်မယ့် ပုဂ္ဂိုလ်တွေကို မိမိတို့ရဲ့ သက်ဆိုင်ရာမြို့နယ် သံဃာ့နာယက ဥက္ကဋ္ဌဖြစ်ဖြစ်၊ သက်ဆိုင်ရာရပ်ကျေး ဥက္ကဋ္ဌဖြစ်ဖြစ် ဆရာတော်တွေဖြစ်ဖြစ် သူတို့ရဲ့ ထောက်ခံချက်နဲ့ လာရောက်တဲ့ ပုဂ္ဂိုလ်များအားလုံးကို ဂိတ်မှာ စစ်ဆေးနေတဲ့ တာဝန်ရှိ ပုဂ္ဂိုလ်တွေ ခွင့်ပြုပေးဖို့ ပန်ကြားလိုပါတယ်”ဟု သျှမ်းပြည်အရှေ့ပိုင်း သံဃာ့နာယက ဥက္ကဋ္ဌ အရှငဉာဏသီရိက မိန့်တော်မူထားသည်။

ယခုနှစ်တွင် ကျရောက်လာမည့် မိုင်းဖုန်းဆရာတော်၏ မွေးနေ့မင်္ဂလာပွဲတော်တွင် ယခင်နှစ်ကဲ့သို့ ပြုလုပ်သွားမည့်အပြင် ထီးတော်တင်လှူခြင်း၊ ရေစက်ချခြင်းတို့ကိုလည်း ပြုလုပ်ရန် ရှိကြောင်း အရှင်ဉာဏသီရိ က ဆက်လက် မိန့်ဆိုသည်။

“ကျရောက်လာမယ့် မွေးနေ့မှာ‌တော့ အရင်နှစ်လိုပါပဲ ပြုလုပ်သွားမှာပါ။ ဒီနှစ်မှာ ထူးခြားတာကတော့ မိုင်းဖုန်းမှာ ပူတာအိုကောင်းမူးလုံစေတီပုံတူ ထီးတော်တင်တာ ရှိမယ်၊ ဗုဒ္ဓဂါယာ စေတီတော်ကို ရေစက်ချတာ ရှိမယ်။ ပြီးတော့ ညောင်ရွှေဘုန်းကြီးကျောင်းကို ရေစက်ချတာရှိမယ်၊ အဲ့တာကိုတော့ တစ်ရက်ထဲမှာ လုပ်သွားမှာပါ။ အပြန်မှာတော့ မိုင်းဆတ်မှာ ထီးတင်ဖို့ ရှိတယ်”ဟု သျှမ်းပြည်အရှေ့ပိုင်း သံဃာ့နာယက ဥက္ကဋ္ဌ အရှင်ဉာဏသီရိက ဆက်လက် မိန့်ကြားသည်။

လာမည့် ၂၀၂၅ ဇန်နဝါရီလ ၅ ရက်တွင် ကျရောက်မည့် မိုင်းဖုန်းဆရာတော် ဘဒ္ဒန္တ ဉာဏသံဝရ ၏ သက်တော် (၆၁) နှစ်မြောက် ဝိဇာတပူဇာ မွေးနေ့ပွဲကို တာချီလိတ်မြို့နယ် မိုင်းဖုန်းကျောင်းတိုက်တွင် စည်ကားသိုက်မြိုက်စွာ ကျင်းပပြုလုပ်သွားမည် ဖြစ်ကြောင်း သိရသည်။
ပြီးခဲ့သည့် အောက်တိုဘာလတွင် တာချီလိတ်မြို့နယ် မိုင်းဖုန်းကျေးရွာအုပ်စုရှိ မိုင်းဖုန်းဆရာတော် တည်ထားသော ဓာတ်တော်စေတီနှင့် ဘုရားရုပ်ပွားတော်များ ဖျက်စီးခံခဲ့ရကြောင်း ဒေသခံများက ပြောသည်။