သျှမ်းပြည်တောင်ပိုင်း ကလောမြို့ပြင်၊ အင်းပြင်ကျေးရွာတွင် တည်ရှိသည့် စစ်ကောင်စီ ၏ခြေမြန်တပ်ရင်း ခမရ (၁၁၂) တပ်တွင်း လေးကောင်ဂျင် လောင်းကစားဝိုင်း ပြုလုပ်နေရာ လောင်းကစားသူများဖြင့် စည်ကားနေသည်ဟု ကိုယ်တိုင် သွားရောက်ခဲ့သူ တစ်ဦးက သျှမ်းသံတော်ဆင့်ကို ပြောသည်။

ကလော-တောင်ကြီး ပြည်ထောင်စုလမ်းမ ဘေးတွင် တည်ရှိသည့် ကလောမြို့ အခြေစိုက် နာမည်ကျော် တပ်မ (၅၅) လက်အောက်ခံ ခမရ (၁၁၂) တပ်တွင်း လေးကောင်ဂျင် လောင်းကစားဝိုင်း ပြုလုပ်နေသည်မှာ တပတ်ကျော် ကြာမြင့်နေပြီဖြစ်ကြောင်း လောင်းကစားသမားများ တပ်နောက်ဘက် အိုးစည်တောင်ခြေ ဂိတ်ပေါက်မှ ဝင်ထွက်ကြောင်း နီးစပ်သူ တဦးက ဆိုသည်။

“အောင်ပန်းက ဒိုင်တွေ ဦးစီးတာ။ တရက် အကောက် သိန်းရာချီရတယ်။ အောင်ပန်း၊ ပင်းတယ၊ ပင်လောင်း နယ်စုံက ဒိုင်တွေ ထိုးသားတွေ လာကစားတယ်။ တပ်ရန်ပုံငွေလို့ ပြောတာပဲ။ အထဲမှာ အစားအသေက်လည်း ကျွေးတယ်” ဟု ၎င်းကဆိုသည်။

ယခုကဲ့သို့ လေးကောင်ဂျင်ဝိုင်း တပ်တွင်း၌ ပြုလုပ်သဖြင့် စစ်ထောက်လှမ်းရေး (စရဖ)၊ ထွေအုပ်၊ ရဲ စသည်တို့ကိုကို လိုင်းကြေး မပေးရဘဲ စစ်တပ်ကသာ အကောက်အားလုံး ရရှိမည်ဟု ၄င်းကသုံးသပ်သည်။

လက်ရှိ ကလောမြို့ အထွက်ရှိ နာမည်ကျော် အိုးစည် တောင်ခြေတွင် ဂျင်ဝိုင်းသို့လာသည့် ကားများဖြင့် စည်ကားနေကြောင်း အစောင့် စစ်သားများက တပ်ပြင်၊ တပ်တွင်း ဓာတ်ပုံရိုက်ခွင့် တင်းတင်းကျပ်ကျပ် တားမြစ်ထားကြောင်း ဆိုသည်။

“ကျဆုံး စစ်သား မိသားစုတွေကို ထောက်ပံ့ဖို့ ရန်ပုံငွေရှာတာလို့လည်း ပြောတယ်။ အရင်နှစ်ထဲက ကလောက ၁၁၂ ကော ခလရ (၃) ကော တပ်မနဲ့ စစ်ဦးစီးကကော ကျတာ အရမ်းများတယ်လေ။ အခုလည်း ကျနေတာပဲ” ဟု ကလောမြို့ခံ တဦးက မှတ်ချက်ပြုသည်။

ပြီးခဲ့သည့် ၂၀၂၃ ခုနှစ် အတွင်း ကလောမြို့ အခြေစိုက် စစ်ကောင်စီတပ်များမှ တပ်အင်အား ရာချီ သေဆုံးထားပြီး ယခု ၂၀၂၄ ခုနှစ် အတွင်း ကရင်နီ၊ ကရင်၊ သျှမ်းမြောက်နှင့် ရခိုင်ပြည်နယ် တိုက်ပွဲများ အတွင်း ကလော အခြေစိုက် တပ်မ (၅၅) လက်အေက်ခံတပ်များ သေဆုံးမှုများနေကြောင်း တော်လှန်ရေးတပ်များက ထုတ်ပြန်ထားသည်။