နိုင်ငံတဝှမ်း အရှုံးဖြင့် ရင်ဆိုင်နေရသည့် စစ်ကောင်စီက နှစ်သစ်ကူးပွဲတော် ခြိမ့်ခြိမ့်သဲ စည်ကား သိုက်မြိုက်စွာ ကျင်းပရေး ပြည်နယ်နှင့်တိုင်း အလိုက် စီစဉ်ရန် ညွှန်ကြားထားကြောင်း သတင်းရင်းမြစ်က ယနေ့ (ဒီဇင်ဘာလ ၁၉ ရက်) တွင် ပြောသည်။

လက်ရှိ ရခိုင်ပြည်နယ်တွင် အရှုံးကြီး ရှုံးနေပြီး တိုင်းစစ်ဌာနချုပ် (အမ်း) ကျဆုံးရန် နီးကပ်နေစဥ် နေပြည်တော်နှင့် ရန်ကုန် အပါအဝင် နိုင်ငံတဝှမ်း စစ်ကောင်စီ ထိမ်းချုပ်ထားဆဲ မြို့ကြီးများတွင် နှစ်သစ်ကူးပွဲတော် စည်ကားသိုက်မြိုက်စွာ ကျင်းပနိုင်ရေး စီစဉ် ဆောင်ရွက်ရန် ညွှန်ကြားထားသည်ဟု ၎င်းက ဆိုသည်။

“နေပြည်တော်၊ ရန်ကုန်၊ တောင်ကြီး အဲလို မြို့ကြီးတွေမှာ ဒီဇင်ဘာလ ၂၉ ရက်နေ့ကနေ ၃၁ ရက် နှစ်သစ်ကူးည အထိ ပွဲလုပ်ဖို့ ညွှန်ကြားထားတာရှိတယ်။ ဈေးရောင်းပွဲတွေ၊ စတိတ်ရှိုးတွေ အစုံပါမှပေါ့။ ဒီမှာ (နေပြည်တော်) တော့ ပြင်ဆင်နေပြီ” ဟု ၎င်းကရှင်းပြသည်။

လက်ရှိ နေပြည်တော် ဝဏ္ဏသိဒ္ဓိ အားကစား လေ့ကျင့်ရေးကွင်း (၁) (၂) တွင် Myanmar Countdown ဟု ခေါင်းစဥ်တပ်ထားသည့် နှစ်သစ်ကူး ဖျော်ဖြေပွဲ ကျင်းပရန် စီစဉ်နေရာ စစ်ကောင်စီကို ထောက်ခံသည့် အနုပညာရှင် ၃၀ ကျော် ပါဝင်မည်ဖြစ်ပြီး ဒီဇင်ဘာလ ၂၉ ရက်နေ့မှ ၃၁ နေ့အထိ ကျင်းပမည်ဖြစ်ကြောင်း ကြေညာထားသည်။

လူစည်ကားစေရန် ဝင်ကြေး အခမဲ့ သတ်မှတ်ထားသည့် အဆိုပါ ပွဲတွင် Bobby Soxer၊ ပုံရိပ်၊ လွှမ်းပိုင်၊ ချမ်းမြေ့မောင်ချို၊ ထက်ယံ၊ Examplez ၊ Double J ၊ Team 143 ၊ ဝိုင်းစုခိုင်သိန်း၊ အိမ့်ချစ်၊ ဖြိုးပြည့်စုံ ၊ Jewel ၊ နေမင်းအိမ်၊ ဝေလ၊ ဘိုဖြူ၊ဟဲလေး၊ နောနော်၊ အိုင်းရင်းဇင်မာမြင့်၊ ရဲရင့်အောင်၊ ယွန်းမြတ်သူ၊ ရတနာမိုင်၊ J Fire ၊ အစ္စဏီ၊ သိန်းလင်းစိုး၊ အောင်ထက်၊ Jason Ace ၊ မဟော်၊ ချစ်ကောင်း၊ project K ၊ Awasome Boyz တို့ ပါဝင် ဖျော်ဖြေမည် ဖြစ်သည်။

နိုင်ငံတဝှမ်း စစ်ရှုံးနေစဉ် နေပြည်တော်၌ ပွဲတော် အမျိုးမျိုး ကျင်းပ တက်ရောက်နေသည့် စစ်ခေါင်းဆောင် မင်းအောင်လှိုင် အား “ပွဲတက် ဗျူဟာ” ကျင့်သုံးနေသည်ဟု စစ်တပ် ထောက်ခံသူများက လူမှုကွန်ရက်တွင် လှောင်ပြောင်နေသည်ကိုလည်း တွေ့ရသည်။

စစ်ခေါင်းဆောင် မင်းအောင်လှိုင် သည် လားရှိုး တိုင်းစစ်ဌာနချုပ် ကျဆုံးစဥ်က ဆိုကရေးတီး ပြိုင်ပွဲ၊ တောင်ကုတ် ဒစက ကျဆုံးစဥ် အမျိုးသား အားကစားပွဲများ တက်ရောက်နေသဖြင့် စစ်ကောင်စီ ထောက်ခံသူများ ပြင်းပြင်းထန်ထန် ဝေဖန်ခဲ့ပြီး ယခု တိုင်းစစ်ဌာနချုပ် (အမ်း) ကျဆုံးရန် နီးကပ်စဉ် နှစ်သစ်ကူးပွဲတော် ကျင်းပရန် စီစဉ်နေခြင်း ဖြစ်သည်။