မြန်မာနိုင်ငံတွင် စစ်တပ်အာဏာသိမ်းပြီးနောက်ပိုင်း အလုပ်ကိုင်အခွင့်အလမ်း ရှားပါးမှု၊ ဝင်ငွေမရှိမှုတွေကြောင့် သျှမ်းပြည်တောင်ပိုင်းတွင် ငွေလိမ်လည်သည့် လုပ်ငန်းများ ကြီးထွားလာကြောင်း စုံစမ်းသိရသည်။

ထိုငွေလိမ်လည်မှုများသည့် သျှမ်းပြည်တောင်ပိုင်းရှိ ကျေးရွာဒေသခံများကို ပစ်မှတ်ထားပြီး လိမ်လည်နေကြပြီး၊ ငွေလိမ်လည်မှုများလည်းပုံစံမျိုးစံရှိလကြောင်း ရွာငံ ဒေသခံများ ပြောပြချက်အရ သိရသည်။

ပြီးခဲ့သည့် ဒီဇင်ဘာလ (၁၅)ရက်တွင် ငွေလိမ်လည်သူနှစ်ဦးမှ ရွာငံမြို့နယ်ရှိ ကျေးရွာများသို့ အလှကုန်ပစ္စည်းနှင့် လျှပ်စစ်ပစ္စည်းများကို မဲဖောက်ပေးမည်ဟုဆို၍ ကျေးရွာအတွင်း ဝင်ရောက်ကာ ငွေလိမ်နေကြောင်း ကိုယ်တိုင်ကြုံတွေ့ခဲ့သည့် ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

“မိန်းကလေးတစ်ယောက်နဲ့ ယောကျာ်းလေးတစ်ယောက် အိမ်နားရောက်လာတယ်။ သူတို့က အလှကုန်ပစ္စည်းတွေ နဲ့ ရေခဲသေတ္တာတွေကို မဲဖောက်ပေးမယ် ပြောတယ်။ မဲလိပ်ကို စစချင်း ၁ သိန်းနဲ့ဝယ်ခိုင်းတယ်။ ပေါင်းအိုး မဲပေါက်တော့ ပစ္စည်းက မပါလာဘူး ပြန်ယူအုံးမယ်ဆိုပြီး သွားခဲ့တာ။” ဟု အဆိုပါအမျိုးသမီး တစ်ဦးက သျှမ်းသံတော်ဆင့်ကိုပြောသည်။

အဆိုပါ ငွေလိမ်သူ နှစ်ဦးကို ရွာသားတစ်ဦးမှ စစ်ဆေးမေးမြန်းရာ ၎င်းအုပ်စုသည် (၆)ဦးရှိကြောင်း၊ ၎င်းတို့မှာ ရန်ကုန်တိုင်းဘက်မှ လာရောက်ကြသည့် သူများဖြစ်ကြောင်း သိရသည်။
ထိုငွေကြေးလိမ်လည်သူ နှစ်ဉီးကို ဖမ်းဆီးပြီး စစ်ဆေးမေးမြန်းပြီးနောက် နောင် ရွာငံမြို့နယ်အတွင်းသို့ ပြန်မလာရန် မှာကြားပြီး ပြန်လွှတ်ပေးကြောင်း အသက် (၃၀)အရွယ်ရှိ ဒေသခံအမျိုးသားတစ်ဉီးက သျှမ်းသံတော်ဆင့်ကိုပြောသည်။

“ရဲစခန်းတိုင်လည်း ဘာထူးမှာတုန်း။ အရေးလည်း မယူပေးတော့ သူတို့ကို နောက်ထပ် လိုက်မလိမ်စားနဲ့တော့ဆိုပြီး ပြန်လွှတ်လိုက်တယ်။ လိမ်သွားတဲ့ငွေတွေတော့ ပြန်မရတော့ဘူး။ တစ်ရွာလုံးနဲ့ဆို (၂၀ )ဖိုးလောက် လိမ်သွားတာ။ရွာကလည်း အယုံလွယ်ကြတာကို။” ဟု အဆိုပါ ဒေသခံ အမျိုးသားက ပြောသည်။

အလားတူ ပြီးခဲ့သည့် (၂၀၂၂ ခုနှစ်) တွင်လည်း လွိုင်လင်မြို့နယ်ဘက်တွင် ထီရောင်းသည်ဟုဆိုကာ မက်လုံးပေးပြီး ငွေလိမ်သွားကြောင်း လွိုင်လင်ဒေသခံ တစ်ဦးကသျှမ်းသံတော်ဆင့်ကို ပြောသည်။

“ဘယ်ကလာမှန်းလဲ မသိဘူး။ နေအိမ်ထဲ အတင်းဝင်ပြီး ထီလာရောင်းတာ။ကျပ်( ၁၀ )သိန်းလောက် ပါသွားတယ်။ အယုံလွယ်ကြတော့ ပိုဆိုးတာပေါ့။ တို့ဆေးတွေများ ပါမလားမသိဘူး။ သူတို့အပြောမှာ မြောပြီးတော့ တောင်းသလောက် ပေးမိလိုက်ကြတာ။” ဟု လွိုင်လင် ဒေသခံ တစ်ဦးက ပြောသည်။

လိမ်လည်သူများသည် လိမ်နည်းအမျိုးမျိုးဖြင့် ရောက်လာနိုင်သောကြောင့် အယုံမလွယ်ကြရန် နှင့် ကျေးရွာအတွင်းသို့ သူစိမ်းများကို သေချာစစ်ဆေးပြီးမှ အဝင်ခံသင့်ကြောင်း အဆိုပါ ဒေသခံ တစ်ဦးက အသိပေး ပြောကြားထားသည်။

ပြီးခဲ့သည့် ၂၀၂၁ ခုနှစ် အာဏာသိမ်းပြီးနောက်တွင်လည်း ဟိုပုံးမြို့နယ်ရှိ ကျေးရွာများတွင် စောင်နှင့် အခင်းများရောင်းသည်ဟုဆိုကာအုပ်စုလိုက် လာရောက်ပြီး သက်ကြီးရွယ်အိုများရှိသည့် နေအိမ်တွင် ငွေကျပ်သိန်း( ၃၀) ကျော် လိမ်လည်သွားသည်ဟု ဟိုပုံးဒေသခံများထံမှ သိရသည်။

အလုပ်သင် သတင်းထောက် နန်းလရောင် ရေးသားသည်။