မြန်မာပြည်တွင်း အင်တာနက်လိုင်း ဈေးအဆမတန်တက်သွားမှုကြောင့် အွန်လိုင်းကို အသုံးပြုပြီး ပညာသင်ယူသူများနှင့် အလုပ်လုပ်နေသူများ အခက်တွေ့နေရကြောင်း အင်တာနက်သုံးစွဲသူများထံမှ သိရသည်။

လစဉ် အကန့်သတ်မဲ့ ဒေတာကျပ်ငွေ (၁၅၀၀၀)ဖိုးဝယ်သုံးလျှင် ယခင်က 30GBရသော် သော်လည်း ယခုအချိန်တွင် အကန့်သတ်မြ့ ပက်ကေ့ချ် ပမာဏာကို လျှော့ချလိုက်သည့်အတွက် 16 GB သာလျှင် ရရှိပြီး အွန်လိုင်းမှ ပညာ သင်ယူသူများအနေဖြင့် အဆင်မပြေမှုများဖြင့် ကြုံနေရကြောင်း အွန်းလိုင်း ပညာသင်ကြားနေသည့် အမျိုးသမီး တစ်ဉီးက သျှမ်းသံတော်ဆင့်ကိုပြောသည်

“ ရွာမှာက ဝိုင်ဖိုင်မတတ်နိုင်ဘူး။ ဖုန်းဘေလ် ( Phone Bill)ဝယ်ပြီး သုံးနေရတာ။ နေ့တိုင်း လိုင်းပေါ်က အတန်းတက်ရတယ်။ အရင်က လစဉ်ဒေတာ တစ်သောင်းခွဲ ဖိုးဝယ်ရင် 30GBတောင်ရတာ။ခုက 16GBပဲ ရတော့တာ။ လိုင်းကလည်းမကောင်းဘူး။ Zoom ဖွင့်ပြီး ဆွေးနွေးတဲ့အခါ လိုင်းက ခဏခဏကျတယ်။ ကိုယ်က ဝင်ငွေလည်း မရှိဘူး။ ပညာကလည်း သင်ချင်တယ်။ ဘေလ်ဖိုးနဲ့ မွဲတော့မယ်။” ဟု ဖုန်းအင်တာနက်သုံးစွဲသည့် အမျိုးသမီးက ဆိုသည်။

ထို့အပြင် အယ်ပလီကေးရှင်းအများစု (VPN )ခံမှ သာသုံးစွဲခွင့် ရပြီး အင်တာနက်သုံးစွဲရာတွင် စိတ်လုံခြုံမှု မရှိတော့သည်ကို ခံစားနေရကြောင်း ၎င်း အမျိုးသမီးက ပြောသည်။

မြန်မာနိုင်ငံတွင် စစ်တပ်ပိုင် မိုင်တဲလ်၊ အော်ရီဒူး၊ ATOMနှင့် MPTတို့ကို အဓိကအသုံးပြုနေကြပြီး အော်ပရေတာအားလုံး ဈေးတက်လာတာကြောင့် အခက်တွေ့နေရသည်ဟု သုံးစွဲသူထံမှ သိရသည်။

ယခင်က မြန်မာ ကျပ်ငွေ( တစ်ထောင်)ကို 3GB အထိရခဲ့ပြီး ယခု ကာလများတွင် ကျပ်(တစ်ထောင်)ကို 480 MBသာ ရရှိတော့သည်ဟု မိုင်တဲလ် သုံးစွဲသူတစ်ဦးမှ ပြောသည်။

“အရင်ကဆို ကျပ်( တစ်ထောာင်)ဖိုးဝယ်ရင် 3 GBရတယ်။ ခုမရတော့ဘူး။480 MBပဲရတော့တာ။ တစ်ရက်ကို ကျပ်(နှစ်ထောင်)လောက်ကုန်နေတာ။ဒါတောင်ချွေတာသုံးနေရတာ။ တခါတလေ လိုင်း ကို အပေါ်အောက်ဆွဲနေရင်း ဘေကုန်သွားတာ ဘာမှတောင် မကြည့်လိုက်ရဘူး။” ဟု အဆိုပါ မိုင်တဲလ် သုံးစွဲသူ တစ်ဦးက သျှမ်းသံတော်ဆင့်ကိုပြောသည်။

အင်တာနက်သုံးစွဲသည့်အခါ တစ်ပတ်လျှင် ၁သောင်း ဝန်းကျင်အထိ အကုန်ကျခံ သုံးစွဲနေရပြီး နေ့စဉ်နှင့်အမျှ အင်တာနက်လိုင်း အခက်အခဲကြောင့် သတင်းနှင့် လက်လှမ်းမမှီမှုများကြုံနေရသည်ဟု ၎င်းသုံးစွဲသူက ပြောသည်။

စစ်အာဏာသိမ်းပြီးနောက်ပိုင်း အင်တာနက်ကို လွတ်လပ်စွာ သုံးစွဲခွင့် မရဘဲ VPN တစ်ဆင့်ခံပြီးမှ သာသုံးစွဲခွင့် ရပြီး အင်တာနက် ဆက်သွယ်ရေးလိုင်းများကို စစ်တပ်မှ ထိန်းချုပ်ကာ နိုင်ငံရေးတက်ကြွလှုပ်ရှားသူများကို ခြေရာခံ ဖမ်းဆီးမှုများလုပ်ဆောင်လာသည်။

ထို့အပြင် စစ်ကောင်စီမှ လက်နက်ကိုင်များနှင့် စစ်ဖြစ်ရာဒေသကို ဖုန်းအင်တာနက်လိုင်းများ ဖြတ်တောက်ထားသောကြောင့် စစ်ရှောင်များကို ကျန်းမာရေးအပါဝင် လူမှုကယ်ဆယ်ရေးအကူညီ လုပ်ငန်းများ လုပ်ဆောင်ပေးဖို့ ခက်ခဲလာခဲ့သည်။

အလုပ်သင် သတင်းထောက် နန်းလရောင် ရေးသားသည်။