ပိုင်ဆိုင်ထားသည့် လေယာဉ်၊ ရဟတ်ယာဉ်များနှင့် လက်နက်စနစ်များ၏ စွမ်းရည်ကို အပြည့်အဝအသုံးချ စစ်ဆင်ရန် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောကြားလိုက်သည်။

ယမန်နေ့ (ဒီဇင်ဘာလ ၁၅) ရက်တွင် ပြုလုပ်သည့် တပ်မတော် (လေ) ၇၇ နှစ်မြောက် နှစ်ပတ်လည်အနေ့ အခမ်းအနား၌ ထိုသို့စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောကြားခဲ့ခြင်းဖြစ်သည်။

စစ်ပွဲအောင်နိုင်ရေးအတွက် လေတပ်က အဓိကအရေးပါသည့် အခန်းကဏ္ဍက ပါဝင်နေကြောင်း၊ လေကြောင်းစွမ်းအား သာလွန်ကောင်းမွန်၍ ရန်သူအပေါ် လွှမ်းမိုးထိန်းချုပ် ချေမှုန်းနိုင်ပြီး မိမိတပ်ဖွဲ့များ၏ စိတ်ဓာတ်နှင့် တိုက်စွမ်းရည် ပိုမိုအားကောင်းတိုးတက်စေကြောင်း သိသာထင်ရှားစွာ တွေ့မြင်နေရကြောင်း ဆိုသည်။

ထို့အပြင် တပ်မတော် (လေ)မှ အရာရှိ၊ စစ်သည်များ စမ်းသပ်တီထွင်ထုတ်လုပ်ထားသည့် ကင်းထောက်လေယာဉ် အမျိုးအစားများဖြစ်သော MTX-1A နှင့် MTX-1B လေယာဉ်များကိုပါ ယမန်နေ့ ကျင်းပသည့် လေယာဉ်၊ ရဟတ်ယာဉ်များ တပ်တော်ဝင်ရာတွင် ပါဝင်ပျံသန်းခဲ့ကြောင်း စစ်ကောင်စီက ထုတ်ပြန်သည်။

ကင်းထောက်လေယာဉ်အမျိုးအစားဖြစ်သည့် အဆိုပါလေယာဉ်များကို Reverse Engineering နည်းလမ်းဖြင့် လေယာဉ်ထုတ်လုပ်မှုနည်းပညာနှင့် အတွေ့အကြုံများရရှိရန် ရည်ရွယ်၍ စမ်းသပ်ထုတ်လုပ် တပ်ဆင်ခဲ့ခြင်း ဖြစ်ကြောင်းဆိုသည်။

စစ်တပ်အာဏာသိမ်းပြီးနောက်ပိုင်း စစ်ကောင်စီတပ်သည် နိုင်ငံအနှံ့ တိုက်ပွဲဖြစ်ပွားရာဒေသများတွင် စစ်ဘက် အရပ်ဘက် မခွဲခြားဘဲ နေ့စဉ်ရက်ဆက် လေကြောင်းမှ ဗုံးကြဲတိုက်ခိုက်မှုများ ပြုလုပ်နေလျက်ရှိသည်။

စစ်တပ်အာဏာသိမ်းသည့် ၂၀၂၁ ဖေဖော်ဝါရီမှ ယခုနှစ် အောက်တိုဘာ ၆ ရက်အထိ လက်နက်ကိုင်ပဋိပက္ခများတွင် စစ်ကောင်စီက လေကြောင်းတိုက်ခိုက်မှု အကြိမ်ရေပေါင်း ၇,၁၀၀ ကျော် ပြုလုပ်ခဲ့ကြောင်း ISP-Myanmar က ပြီးခဲ့သည့် နိုဝင်ဘာ ၄ ရက်၌ ထုတ်ပြန်ထားသည်။

မြောက်ပိုင်းညီနောင်သုံးဖွဲ့၏ “၁၀၂၇ စစ်ဆင်ရေး” စတင်သည့် အောက်တိုဘာလ ၂၇ ရက်ပိုင်း ၂၀၂၃ နိုဝင်ဘာလမှ ၂၀၂၄ ဧပြီလအထိ ခြောက်လတာအတွင်း လေကြောင်းတိုက်ခိုက်အကြိမ်ရေ သုံးထောင်ကျော် (၃,၀၀၀) လုပ်ခဲ့ကြောင်း (ISP-Myanmar)၏ အောက်တိုဘာလထုတ် သုတေသနအချက်အလက် ဖော်ပြသည်။