ကချင်လွတ်လပ်ရေးတပ်ဖွဲ့ (KIO/KIA) ဉက္ကဋ္ဌ ဗိုလ်ချုပ်ကြီးအင်ဘန်လ ၏ တရုတ်နိုင်ငံ ခရီးစဉ်အတွင်း ကချင်ပြည်နယ်ရှိ KIA ထိန်းချုပ်ထားနိုင်သည့် တရုတ်နယ်စပ်ဂိတ်များ ပြန်ဖွင့်နေသော်လည်း ဖြတ်သန်းခွင့်မရသေးကြောင်း စုံစမ်းသိရသည်။

ယနေ့ (ဒီဇင်ဘာလ ၁၃ ရက်) နံနက်ပိုင်းမှ စတင်ပြီး ကချင်လွတ်လပ်ရေးတပ် KIA ထိန်းချုပ်ထားနိုင်သည့် မြန်မာ-တရုတ် နယ်စပ်တလျှောက် ဂိတ်များအားလုံးတွင် အတားအဆီးများ ဖယ်ရှားပြီး နှစ်ဘက်စလုံးမှ ပြန်လည်ဖွင့်လှစ်ထားသော်လည်း ယာဉ်နှင့် ကုန်ပစ္စည်းများအပြင် လူဖြတ်သန်းခွင့် မရသေးကြောင်း သိရသည်။

“ဖွင့်တာကတော့ ပြောပါတယ်၊ တံခါးတွေဖွင့်တာ ဂိတ်ဝတွေ ဖွင့်တာတော့ ဟုတ်ပါတယ်။ ဒါပေမယ့် လူတွေဝင်ထွက်လို့တော့ မရဘူး၊ ကားတွေလည်း ပေးမဝင်ဘူး ပေးမထွက်ဘူး။ လူလည်း ပေးမဝင်ဘူး ပေးမထွက်ဘူး ဖြစ်နေတာ၊ ပစ္စည်းတွေလည်း ဝင်ထွက်လို့ မရဘူး အဲ့လိုအခြေအနေ ဖြစ်နေတာ”ဟု KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက သျှမ်းသံတော်ဆင့်ကို အတည်ပြု ပြောဆိုသည်။

မြန်မာ-တရုတ် နယ်စပ်တလျှောက်ရှိ KIA ထိန်းချုပ်ထားသည့် ကန်ပိုက်တည်၊ လွယ်ဂျယ်၊ လိုင်ဇာ၊ မိုင်ဂျာယန်၊ ပန်ဝါ စသည့် နယ်စပ်ဂိတ်များအားလုံး ပြန်လည်ဖွင့်လှစ်ထားကြောင်း ဒေသခံများထံမှ သိရသည်။

KIA ဉက္ကဋ္ဌ ဗိုလ်ချုပ်ကြီး အင်ဘန်လ ၏ တရုတ်နိုင်ငံ ခရီးစဉ်မှ ပြန်မရောက်မီအချိန်တွင် KIA ထိန်းချုပ်ထားသည့် တရုတ်နယ်စပ်ဂိတ်များ ပြန်လည်ဖွင့်လှစ်သော်လည်း ဆွေးနွေးမှုရလဒ် အခြေအနေကို မသိရှိရကြောင်း ဗိုလ်မှူးကြီးနော်ဘူက ဆက်ပြောသည်။

“အစည်းအဝေးမှာ ဘာတွေဆွေးနွေးလဲဆိုတာ ကျနော်တို့လည်း မကြားသိရဘူးပေါ့။ ကျနော်တို့ ဉက္ကဋ္ဌကြီး အဖွဲ့တွေလည်း ပြန်မလာသေးဘူး။ ဘာကြောင့်ဖွင့်တယ်၊ ဘာရည်ရွယ်ချက်နဲ့ ပြန်ဖွင့်တယ် ဆိုတာကိုတော့ ကျနော်တို့ ပြောလို့ အဆင်မပြေဘူး၊ ဘာမှ မကြားသိရဘူးပေါ့”ဟု ဗိုလ်မှူးကြီးနော်ဘူက သျှမ်းသံတော်ဆင့်ကို ပြောသည်။

ပြီးခဲ့သည့် စက်တင်ဘာလအတွင်း စစ်ကောင်စီလက်အောက်ခံ ကချင်ပြည်နယ် အထူးဒေသ-(၁)ကို KIA က ထိုးစစ်ဆင်တိုက်ခိုက်ခဲ့ပြီး တရုတ်နယ်စပ်တလျှောက် တိုက်ပွဲပြင်းထန်ခဲ့ခြင်းကြောင့် တရုတ်-မြန်မာ နယ်စပ်ဂိတ်များကို တရုတ်ဘက်မှ ပိတ်ပင်ထားခဲ့သည်။

လတ်တလော ဗန်းမော်မြို့အထိ KIA တပ်ဖွဲ့မှ မြို့သိမ်းတိုက်ပွဲ ဆင်နွှဲနေပြီး အခြားတဘက်တွင် KIA ဉက္ကဋ္ဌ ဗိုလ်ချုပ်ကြီး အင်ဘန်လ ဦးဆောင်သည့် အဖွဲ့သည် တရုတ်နိုင်ငံမှ ဖိတ်ခေါ်မှုကြောင့် တရုတ်ပြည်သူ့နိုင်ငံရေး အတိုင်ပင်ခံကွန်ဖရင့် (CPPCC) နှင့် တွေ့ဆုံဆွေးနွေးနေကြောင်း သိရသည်။